Plan Blong Sam Stilman Long Wes Afrika i Foldaon

Eunice Ebuh i talem stori ya

“Wan grup blong stilman we oli holem masket, oli plan blong kam long haos blong mifala stret long dei we oltaem mifala i stap mekem Kongregesen Buk Stadi long haos blong mifala. Long dei ya mifala i openem bigfala get blong mifala blong ol brata mo sista mo ol man we oli intres, blong kam insaed. Ol stilman ya oli savegud samting ya mo taem blong miting tu. Mifala i sua se oli bin stilim wan trak long wan narafala ples nao oli stop klosap long get blong mifala long dei mo taem ya we mifala i mas mekem buk stadi.

“Be long wik we oli kam, hemia semfala wik we seket elda i visitim kongregesen blong mifala. Taswe, mifala i no mekem miting long haos blong mifala, mifala i go long Haos Kingdom. Afta we miting i finis, ol elda oli gat miting blong olgeta. Long ol taem olsemia, mi mi stap tekem ol pikinini i gobak long haos fastaem, be long naet ya, hasban blong mi, we i wan elda, i askem mifala blong wet long hem. Hem i se bambae miting blong olgeta i no stap longtaem. Taswe, mifala i wet long hem.

“Biaen, mifala i no save statem trak blong mifala. Seket elda mo hasban blong mi, tufala i no faenem rod blong fiksimap trak ya. Mifala i singaot wan mekanik, be man ya tu i no save fiksimap trak ya.

“Ol pikinini oli wokbaot i gohom. Smoltaem biaen, mi tu mi wokbaot i gohom. Mi kam kasem haos samples long ten klok. Mi, mo ol pikinini tu, mifala i no bin kam long wan trak, i minim se mifala i no nidim blong openem bigfala get blong yad blong mifala blong go long haos.

“Taem mi go insaed long rum blong mi, mi harem noes blong masket we i faerap bigwan. Mi wantem save se wanem i hapen. Mi traem telefon i go long polis, be telefon i no wok. Mi ron i go daon long ol step mo mi lokem bigfala aean doa blong mifala, ale, mi spid i go lokem narafala doa long medel blong haos blong mifala. Mi kilim ol laet. Ol pikinini blong mi oli seksek, taswe mi talem long olgeta blong stap kwaet. Mifala i prea long Jeova blong i protektem mifala. Long semtaem ya, hasban blong mi i stap yet long Haos Kingdom, i stap traehad blong statem trak.

“Mi lukluk i go afsaed long windo, mo mi luk wan man i stap slip long rod afsaed long get blong mifala. I luk olsem we ol stilman oli go finis, ale, mi go karem man ya, mi putum hem long trak blong mi mo mi spid i go long hospital. Maet mi putum laef blong mi long denja taem mi mekem olsem, be mi ting se mi mas mekem wan samting blong givhan long man ya. Sore tumas, be man ya i ded long nekis dei.

“Nating se smol trabol ya i hapen, be maet ol samting oli save nogud moa long naet ya. Visit blong seket elda i mekem se mifala i no gat buk stadi long haos blong mifala. From we trak i brokdaon, mifala i no bin go kasem haos tugeta long wan trak. Hasban blong mi, we i sua se ol stilman ya oli wantem holem hem, i kamhom nomo long let naet. Ol samting ya mo narafala samting bakegen, oli mekem mifala i laki long naet ya.

“Jeova i strong haos blong yumi mo sefples blong yumi. I olsem we Baebol i talem se: ‘Sipos Jeova i no givhan long wajman we i stap lukaot long taon, wok blong man ya i blong nating nomo.’ ”​—Ol Sam 127:⁠1.