Taem Ol Stilman Oli Mekem Trabol Long Yumi

LONG eria blong wan taon blong Wes Afrika, we nem blong hem Ikoyi, olgeta haos oli olsem kalabus nomo. Plante long ol haos ya oli gat ol bigbigfala stonwol oli goraon long olgeta, we samfala oli hae olsem 3 mita. Antap long ol stonwol ya i gat ol sap aean, ol glas we oli brokbrok, no babwaea. Ol man oli gad long ol bigfala get blong ol stonwol ya. I gat lok, aean mo jen i goraon long ol get ya blong mekem oli fasgud. Evri windo i gat aean blong blokem. Insaed long ol wanwan haos ya, i gat sam bigfala aean get we oli seraotem ol rum blong slip long ol narafala rum blong haos. Long naet, ol man oli letem ol bigfala rabis dog blong olgeta oli go fri long garen. Sam strongfala laet oli saenaot long tudak. Mo i gat sam spesel kamera mo alam oli stap rere blong singaot sipos man i pas klosap long olgeta.

Long tingting blong ol man long ples ya, fasin blong mekem haos i sefgud i no wan pleplei. Ol niuspepa oli gat sam stamba tok olsem: “Ol Man Wetem Masket Oli Stilim Olgeta Samting Long Vilej”; “Ol Pikinini We Oli Stil Oli Wael Olgeta”; mo “Ol Man Oli Go Krangke Taem Ol Stronghed Grup Oli Holem Taon Blong Olgeta.” Hemia nao laef we i stap long plante kantri. Olsem Baebol i talem finis, yumi rili stap long wan taem we laef i strong tumas.​—2 Timoti 3:1.

Fasin blong brekem loa mo fasin blong stil wetem masket, i kam antap bigwan long olgeta ples blong wol. Plante moa gavman oli no naf, mo oli no wantem, protektem ol man long kantri blong olgeta. Long sam kantri, ol polis oli no save mekem wan samting from we namba blong olgeta i smol tumas klosap long namba blong ol stilman, mo oli no gat samting we oli nidim blong mekem gud wok blong olgeta. Mo plante taem, ol man olbaot oli no wantem intres long ol trabol we oli hapen klosap long olgeta from we oli fraet blong karekil.

From we ol man oli no save dipen long polis mo oli no sua se ol man raonabaot long olgeta bambae oli halpem olgeta, ale, olgeta nomo oli mas faet blong protektem olgeta. Wan Kristin elda long wan pua kantri, i talem se: “Sipos yu traem singaot blong narafala man i halpem yu, ol stilman bambae oli katemaot wan haf blong bodi blong yu, no bambae oli kilim yu yu ded. Yu no mas dipen long narafala man blong i halpem yu. Sipos i gat man i kam blong givhan long yu, hemia i gud, be yu no mas ting se samting ya bambae i hapen oltaem. I nogud yu singaot blong kasem help, from we maet yu stap singaotem moa trabol nomo i kam.”

Olsem Wanem Tok Blong God i Givhan Blong Protektem Yu

I tru se ol Kristin oli no man blong wol. Be nating se i olsem, oli mas laef long wol ya. (Jon 17:​11, 16) Taswe, oli mas faenem rod blong protektem olgeta wanwan, olsem ol narafala man oli stap mekem. Be, defren olgeta long ol man ya we oli no stap mekem wok blong Jeova, ol man blong God oli lukaot samting blong protektem olgeta, we i laenap wetem ol Kristin rul.

Sam man long ol kantri blong Afrika, oli yusum majik blong protektem olgeta long ol stilman. Maet oli go luk wan kleva blong i katem han, jes, no bak blong olgeta. Nao, kleva ya bambae i putum smol meresin i go long ples ya we hem i katem, mo i toktok long hem, ale, ol man ya oli bilif se oli sefgud mo i no gat stilman i save spolem olgeta. Sam narafala man oli putum sam lif no spesel majik samting long haos blong olgeta, from we oli bilif se ol samting ya bambae oli blokem ol stilman blong mekem trabol long haos blong olgeta.

Ol trufala Kristin oli no joen nating long olkaen bisnes ya blong yusum majik. Baebol i tok agensem olkaen wok blong rabis spirit, mo i stret tu we hem i mekem olsem. Ol fasin ya oli pulum man blong wok wanples wetem ol devel, we olgeta nao oli stamba blong olgeta raf fasin blong wol. (Jenesis 6:​2, 4, 11) Baebol i tok klia se: “Yufala i no mas mekem ol bisnes blong posen mo kleva.”​—Levitikas 19:⁠26.

Sam man oli wantem tumas blong stap sef, ale, oli pem ol masket. Be, ol Kristin oli tinghevi long tok ya blong Jisas we i se: “Man we i stap tekem naef blong faet, hem bambae i ded long naef blong faet.” (Matiu 26:52) Ol man blong God oli ‘tanem ol naef blong faet blong olgeta i kam aean blong digim graon’ mo oli no pem masket blong protektem olgeta long ol man blong stil no man blong mekem trabol.​—Maeka 4:⁠3.

?Olsem wanem sipos yumi pem sam man we oli gat masket, blong oli gad long haos blong yumi? Sipos yumi mekem samting ya i olsem we yumi putum masket long han blong narafala man. ?Taem yu pem man blong i gad, yu wantem se hem i mekem wanem long stilman we i kam? ?Yu wantem se gad ya i sutum ol stilman ya, sipos i nidim, blong protektem ol man mo ol samting long haos blong yu?

Disisen ya we ol Kristin oli mekem blong no yusum majik no masket blong protektem olgeta, maet i wan krangke samting long tingting blong ol man we oli no save God. Be, Baebol i mekem yumi sua long wan samting se: “Sipos yu stap trastem Hae God, bambae yu save stap gud oltaem.” (Proveb 29:25) I tru se Jeova i lukaotgud long fulwan kampani blong ol man blong hem long wol, be i no evritaem we hem i mekem wan samting blong protektem ol wanwan man blong hem agensem ol stilman. No gat. Job i wan man we i strong long bilif. Be, God i letem ol stilman oli kam stilim olgeta buluk blong Job, mo oli kilim sam man blong wok blong hem tu oli ded. (Job 1:​14, 15, 17) Mo tu, God i letem aposol Pol i fesem denja “long ol man blong stil.” (2 Korin 11:⁠26) Nating se i olsem, God i tijim ol man blong hem blong oli mekem laef blong olgeta i laenap wetem ol rul blong hem. Ol rul ya oli save mekem ol man blong hem oli no kasem tumas trabol wetem ol man blong stil. Mo tu, God i givim save blong hem long ol man blong hem. Save ya i halpem olgeta blong waesgud long fasin we oli mekem taem ol stilman oli traem mekem trabol long olgeta. Long rod ya oli save blokem plante trabol we i save givim kil long olgeta.

No Pulum Denja Blong Stilman i Kam Long Yu

Wan waes man blong bifo i luksave se: “Rijman, hem i no save slip gud, oltaem i stap wekap nomo, from we i stap tingting tumas long ol samting we hem i gat.” (Eklesiastis 5:​12) Yes, hemia i soem se man we i gat plante sas samting bambae hem i stap wari tumas we ol samting ya oli lus, nao hem i no save slip.

Taswe, wan rod blong katem daon ol wari mo blong no pulum stilman i kam long yumi, hemia sipos yumi no hivimap plante sas samting. Tabu spirit i pusum wan aposol blong raetem se: “Ol fasin ya we i stap long wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo.” (1 Jon 2:​16) Tingting ya we i pusum man blong wantem pem ol sas samting hem i sem tingting ya we i stap pulum ol narafala man blong stil. Mo ol samting ya we ‘ae i luk mo we oli flas tumas’ oli save singaot man we i gat tingting ya blong stil.

Tru tumas, fasin ya blong no pulum ae blong man wetem ol sas samting blong yumi, i save protektem yumi long ol stilman. Be, wan narafala samting we i save mekem olsem, hemia sipos yumi soemaot se yumi ol trufala Kristin. Yumi mas soem lav long narafala, yumi no giaman long man, mo yumi bisi oltaem long Kristin wok blong prij. Long rod ya, bambae yu kasem wan gudnem long eria blong yu from we ol man oli luk se yu wan gudfala man, mo oli save respektem yu. (Galesia 5:​19-​23) Gudnem we yumi gat olsem Kristin man i save gat moa paoa blong protektem yumi i bitim wan masket.

Taem Ol Stilman Oli Kam Long Haos Blong Yu Wetem Masket

Be, ?olsem wanem nao sipos ol stilman oli kam insaed long haos blong yu mo oli wantem kilim yu? ?Bambae yu mekem wanem? Rimemba se laef blong yu i impoten moa i bitim ol sas samting blong yu. Jisas Kraes i talem se: “Bambae yu no givimbak long man we i mekem i nogud long yu. Sipos wan man i slavem fes blong yu long raet saed, yu mas letem hem i slavem fes blong yu long lef saed tu. Mo sipos wan man i . . . fosem yu blong yu givim sot blong yu long hem . . . be yu mas givim singglet blong yu tu long hem.”​—Matiu 5:​39, 40.

Advaes ya i waes tumas. Ol Kristin oli no nid blong talemaot long ol stilman wanem olgeta rij samting we oli gat. Be, ol stilman oli save kam raf sipos oli harem se yumi stap traem agensem olgeta, yumi no wantem wokgud wetem olgeta, no yumi giaman long olgeta. Plante long olgeta oli ‘no moa sem blong mekem ol rabis fasin,’ taswe oli save kros kwiktaem, mo mekem samting we i nogud.​—Efesas 4:⁠19.

Samuel i laef long wan stori haos. Ol stilman oli blokem bigfala doa blong stori haos ya, nao oli go long olgeta wanwan rum blong ol man mo oli stilim olgeta samting. Samuel i harem noes blong ol masket we i faerap, hem i harem we oli brekem ol doa, ol man oli stap singaot mo oli stap krae. I no gat rod blong ronwe. Samuel i talem long waef blong hem mo ol trifala pikinini boe blong hem blong nildaon long floa, putumap han blong olgeta, sarem ae mo wet. Taem ol stilman oli brekem doa i kam insaed, Samuel i no lukluk fes blong olgeta, from we maet oli fraet se bambae hem i save ripotem olgeta biaen. Nao hem i talem se: “Kam insaed. Wanem samting we yu wantem, yu tekem. Yu fri blong tekem eni samting. Mifala i Witnes blong Jeova, mo bambae mifala i no traem blokem yu.” Ol stilman oli sek long fasin ya. Long nekis aoa we i pas, samwe long twelef defren grup blong man oli pas. Oli stilim ol sas samting, mane, mo ol narafala samting long haos. Be, oli no kilim famle ya no katem olgeta wetem akis, olsem we oli mekem long ol man blong narafala rum. Famle blong Samuel i tangkiu long Jeova from we oli no ded.

Hemia wan eksampel we i soemaot se taem ol stilman oli wantem mane no sas samting, yumi save blokem olgeta blong givim kil long yumi sipos yumi letem olgeta oli tekem ol samting ya mo yumi no traem agensem olgeta.a

Samtaem wok blong prij we wan Kristin man i mekem, i save givhan long hem blong no kasem kil. Taem ol stilman oli kam insaed long haos blong Ade, Ade i talem long olgeta se: “Mi save se laef blong yufala i no isi taswe yufala i stap mekem wok ya. Mi wan Witnes blong Jeova, mo mifala i bilif se wan dei olgeta man bambae oli kasem inaf kakae blong fidim olgeta mo famle blong olgeta. Evri man bambae oli laef long pis mo oli glad tumas aninit long Kingdom blong God.” Tok ya i karemaot paoa blong ol stilman ya wantaem. Wan long olgeta i talem se: “Mifala i sore we mifala i mas kam long haos blong yu, be yu mas kasem save se mifala i no gat kakae.” Nating se oli stilim olting blong Ade, be oli no tajem hem mo famle blong hem.

Stap Kwaet

I no isi blong stap kwaet taem denja i stap, antap moa sipos stamba mak blong ol stilman i blong mekem man i fraet nao oli obei long olgeta. Prea bambae i halpem yumi. Nating se prea blong yumi i sot mo yumi mekem long hat blong yumi nomo, be Jeova i save harem. Baebol i leftemap tingting blong yumi se: “Hae God i stap lukluk long ol stret man, i stap lesin blong harem krae blong olgeta.” (Ol Sam 34:15) Jeova i harem yumi mo hem i save givim waes long yumi blong yumi stretem enikaen problem long kwaet fasin.​—Jemes 1:⁠5.

Antap long prea, i gat wan narafala samting we i save givhan long yumi blong stap kwaet. Hemia sipos yumi tingbaot naoia, wanem we bambae yumi mekem mo no mekem sipos wan man i kam stilim olting blong yu. I tru se, yumi no save olsem wanem wan stilman bambae i mekem taem hem i kamtru. Be, i gud blong putum sam rul i stap long tingting blong yumi, olsem we yumi mekem taem yumi tingbaot samting we bambae yumi mekem sipos yumi stap long wan haos we faea i stap kakae. Fasin blong tingrere i halpem yu blong stap kwaet, no wari, mo bambae i blokem yu blong kasem kil.

Tingting blong God long saed blong fasin blong stil, i klia nomo: “Mi, Jeova, mi laekem stret fasin. Be ol fasin blong stil, mo ol narafala fasin we man i stap brekem loa, mi mi no laekem nating.” (Aesea 61:⁠8) Jeova i pusum profet blong hem, Esikel, blong raetem se fasin stil, hem i wan bigfala sin. (Esikel 18:18) Nating se i olsem, buk ya blong Baebol i talem tu se God we i gat sore bambae i rere blong fogivim eniman we i tanem tingting blong hem mo i givimbak samting we hem i bin stilim.​—Esikel 33:​14-​16.

Nating se ol Kristin oli laef long wan wol we i fulap long ol fasin blong brekem loa, oli glad from we oli gat hop blong laef aninit long rul blong Kingdom blong God. Long taem ya, bambae i no moa gat fasin blong stil. Baebol i tokbaot taem ya, i promes se: “[Ol man blong God] bambae oli stap gud, mo oli gat pis olwe. Bambae oli save stap gud long ol plantesin blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet. Hae God i gat olgeta paoa, mo hemia tok blong hem.”​—Maeka 4:⁠4.

[Futnot]