Wan Wol We i No Gat Stil Man Long Hem
HEM i kamaot kwiktaem tumas. Wan man we i werem gudfala klos i poenem pistol long hed blong Antonio, fored long haos blong hem long Sao Polo, Brasil, i askem ol ki mo ol pepa blong trak blong hem, mo i tekem trak i ronwe kwik.
Long Rio de Janero, fo man we oli karem ol masket oli holemtaet Paulo, fored long pikinini gel blong hem we i gat ten yia. Nao, afta we oli tekem trak i go long haos blong hem, ol stil man ya oli go insaed mo oli stilim eni samting we oli wantem mo fulumap tufala trak blong Paulo. Oli talem se bambae oli kilim ded waef blong hem, nao oli holem waef blong hem mo wan wok man blong hem olsem ol prisena. Oli tekem tufala i go long taon, long stoa blong Paulo. Stoa ya i blong salem ol jen, ring mo ol samting blong putum long bodi. Nao oli tekem evri sas samting long stoa ya. Be sapraes se biaen ol stil man ya oli ring mo oli talem weples oli livim ol trak ya long hem.
!Tingting i save foldaon bigwan taem ol man oli stilim ol mane mo ol samting we yu stap wokhad from! Nating se Antonio mo Paulo tufala i no tekem aksin blong stretem samting ya, ol narafala man oli stap tekem aksin blong stretem samting olsem. Maet oli save kilim stil man, no maet stil man i save kilim olgeta i ded from. Eksampel, wan yangfala i karemaot waj blong wan woman Brasil mo i ronwe wetem, nao woman ya i kros tumas i pulumaot pistol long bag blong hem mo i sutum stil man ya, i kilim hem i ded. ?Biaen wanem i kamaot from? Magasin ya O Estado de S. Paulo i givim ripot ya se: “Ol man we oli luk samting ya oli presem aksin blong woman ya we oli no save hem, mo i no gat wan we i wantem givhan long polis blong faenem woman ya.” Nating se ol Kristin oli wantem tumas wan wol we i no gat ol man blong stil long hem, oli no stap givimbak olsem woman ya i mekem. From we fasin blong givimbak i blong God, oli lesin long ol tok long Proveb 24:19, 20 se: “Yu no mas kros long ol rabis man. Yu no mas kam jelas from ol rabis man. From we bambae i no gat fyuja long wan rabis man.”
?Sipos oli kam blong stilim yu, bambae yu mekem wanem? Wan samting we i hapen long Rio de Janero i soem from wanem i impoten blong yu no seksek. Wan Kristin woman we yumi save kolem hem Heloisa i stap pas long bas i go blong mekem wan Baebol stadi. Tu man i stat blong stilim olting blong ol pasenja. Taem oli kasem bas stop we Heloisa i mas kamaot long hem, hem i talem long tufala se hem i wan long ol Wetnes blong Jeova mo we bambae hem i go mekem wan Baebol stadi. Hem i soem Baebol mo buk blong hem long tufala. Tufala man blong stil ya tufala i letem hem i go, tufala i no stilim olting blong hem. Be, tufala i no letem wan narafala pasenja i goaot. Biaen draeva i talem se hem i neva luk wan samting olsem bifo.
Regina tu i no seksek taem tu man we oli gat masket oli givim oda blong hem i go insaed long trak blong hem. Regina i soem kopi blong Wekap! magasin mo i prij long tufala. From we tufala stil man ya oli no save wanem samting bambae tufala i mekem, Regina i askem tufala blong openem ples we hem i putum ol loli long hem. Be taem tufala i luk ol kaset blong Kingdom Melodies, tufala i stat blong lesin long ol myusek ya. Nao oli harem se oli fren moa, tufala stil man ya tufala i no mekem wan samting long Regina tufala i livim hem i stap long bigfala rod, mo talem long hem se bambae hem i save faenem wan gudfala man blong i halpem hem. Afta we hem i wokbaot long ten menet, hem i faenem wan haos, be man blong haos i no save bilivim store blong Regina, hem i se: “Yu no luk olsem se ol man oli atakem yu; yu yu no seksek nating.”
Nating se man i no kasem kil long bodi blong hem, be ekspiryens olsem i save spolem bigwan man ya biaen. O Estado de S. Paulo i givim ripot se, ‘Maet man ya i harem se hem i no sef, maet i no save laekem nating ol memba blong famle no olgeta ya we oli traem blong halpem hem, hem i no moa save trastem ol narafala man, oltaem bambae hem i tingbaot evri smosmol samting we i hapen, bambae i harem se wol ya i no stret.’ Be defren se, wan man we i trastem Jeova God i gat moa jans blong no kasem trabol long bodi mo long filing blong hem sipos hem i gotru long ekspiryens olsem. Nating se i olsem, ?yu ting se bambae yu glad sipos i no moa gat fasin blong brekem loa no samting we i mekem man i fraet?
“Man Blong Stil Hem i Mas Finis Long Stil”
Nating se plante man oli laekem fasin griri blong olgeta, Tok blong God i givhan long plante stil man finis blong oli jenisim ol samting we oli stap wantem tumas mo fasin blong olgeta. (Efesas 4:23) From we oli gat wan trufala risen blong stap laef we i stanap long Baebol, ol man ya oli folem ol tok ya se: “I gud moa blong gat smol samting wetem stret fasin bitim we yu gat plante samting be i no from stret fasin.” (Proveb 16:8) Claúdio i talem se: “Kolosap evriwan long famle blong mi oli Wetnes blong Jeova, be mi neva lesin long wanem oli wantem talem long mi long saed blong Jeova mo ol stampa tingting we hem i gat. Taem mi stap kambak long wan trip blong 2,000 kilomita long wan trak we mi stilim, mi mas pas plante taem long ol ples we ol polis oli blokem. Taem mi stap mekem olsem mi luksave se mi mas jenisim fasin blong laef blong mi. Mi bin traem blong mekem olsem finis be mi no save mekem. Naoia mi stat blong tingbaot ol famle blong mi we oli Wetnes blong Jeova mo mi luk se laef blong olgeta i defren, oli glad, oli hapi mo oli gat pis.” From samting ya, Claúdio i stat blong stadi long Tok blong God, hem i lego fasin blong tekem ol drag mo ol fren blong hem bifo, mo hem i kam wan Kristin minista.
Ol narafala tu naoia oli folem ol tok ya se: “Yufala i no trastem ol strong fasin ya blong stil blong kam rijman. Yufala i no putum tingting blong yufala long rod blong stil.” (Ol Sam 62:10) Jose i wan man blong tekem drag oltaem mo hem i stap mekem bisnes blong stil mo salem ol drag. Hem i kasem wan panis we kot i givim, from hem i traem blong kilim man i ded long taem blong stil. Afta hem i kasem blesing from Baebol stadi we tawean blong hem i mekem wetem hem. Hem i no moa tekem mo salem ol drag mo naoia hem i kam wan Wetnes we i wok strong.
Be samting ya i no min se, wan nyufala fasin i stap kam kwiktaem no olsem wan merikel. No gat. Oscar, we i stap joen bigwan long fasin blong yusum mo stilim ol drag, i talem se: “Mi stap prea strong oltaem long Jeova mekem se samtaem wora blong ae blong mi i mekem bigfala reva long floa.” Yes, antap long fasin blong stadi long Tok blong God, i nidim fasin blong prea oltaem wetem fulhat blong yu. Makem waes fasin long prea ya: “Mekem se mi no pua mo mi no rij tu. I gud mi mi solemdaon kwiktaem ol kakae we oli mekemrere from mi, blong bambae mi no haremgud long hem mo tanem baksaed long yu mo talem se: ‘?Hu ya Jeova?’ mo blong bambae mi no kam pua mo afta mi save stil mo spolem nem blong God blong mi.”—Proveb 30:8, 9.
Trufala lav i mas jenisim fasin blong man i tingbaot hem nomo: “Man we bifo i man blong stil, hem i mas finis long stil. Hem i mas hadwok long han blong hem long stret fasin, nao bambae i save givhan long ol pua man.” (Efesas 4:28) Olsem ol Kristin long faswan handred yia we bifo oli man blong ‘stil no oli stap wantem plante samting tumas,’ nao Jeova i yusum ransom blong Jisas Kraes blong soem sore long olgeta, i fogivim olgeta ya we oli tanem tingting blong olgeta. (1 Korin 6:9-11) !Yumi haremgud se nating we fasin blong laef blong yumi bifo i nogud olsem wanem, yumi save jenisim fasin blong laef blong yumi mo kasem gladhat blong God!—Jon 3:16.
Stap Sef Long Nyufala Wol Blong God
Tingbaot wan wol we i no gat ol man blong stil long hem. !Bambae yu no nidim wan rod we i sas olsem ol jaj, ol loea, ol polis, mo ol kalabus blong mekem se ol man oli folem loa! !Bambae hem i wan nambawan wol we olgeta man blong hem bambae oli respektem ol narafala mo olting blong olgeta! ?Yu harem se i hadwok blong bilivim? ?Bambae God i rili mekem wan samting mo finisim fasin blong brekem loa? Mifala i askem yu blong lukluk pruf se Baebol hem i Tok blong God mo we yu save trastem ol profet tok blong hem. Bambae yu faenem wan fandesen blong bilif se i gat wan jenis long fyuja. I no gat man i save blokem God blong i no givim gudfala promes ya se bambae hem i givim spel long olgeta ya we oli laekem stret fasin: “Bambae yu no jelas long ol man we oli stap mekem samting nogud. Nating we ol man nogud oli stap win, be bambae yu no harem nogud from. Bambae oli lus olsem gras we i drae, bambae oli ded olsem ol smosmol tri we oli ded long draetaem.” (Ol Sam 37:1, 2) Ol tok ya we oli raetem longtaem bifo bambae oli kamtru fulwan i no longtaem.
Kingdom blong God bambae i finisim ol trabol mo ol rabis fasin, we oli mekem se ol man oli no gat hop mo oli wari. Bambae ol man oli no save nidim wan samting we i save pulum olgeta blong oli stil. Profet tok i talem long yumi se: “Yu mekem we bambae i gat plante kakae long ples ya, we ol hil oli fulapgud long ol kakae. Yu mekem we graon long ples ya bambae i karem kakae olsem gudfala graon ya long Lebanon, mo we ol taon blong mifala oli fulapgud long man olsem we open ples i fulapgud long gras.” (Ol Sam 72:16) Tru ya, long Paradaes ya we i stanap bakegen, bambae i no gat samting i spolem pis blong ol man ya we oli save trufala God mo oli wosip long hem.—Aesea 32:18.
!Nambawan pei ya bambae yumi kasem from we yumi no wantem griri fasin blong wol ya! Proveb 11:19 i talem se: “Man we i stanap strong from stret fasin bambae hem i kasem laef, be man we i stap ronem rabis fasin bambae hem i ded.” Yes, afta we ol rabis man oli lus, bambae i no gat man i save fraet from laef no olting blong hem. Ol Sam 37:11 i givim promes ya long yumi se: “Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.”
[Bokis blong pija long pej 5]
Tingrere Long Stil We i Save Hapen Long Yu
LONG HAOS—From we ol stil man oli save kam stil long haos nating se yu no stap no yu yu stap long haos, i gud we oltaem yu sarem ol doa mo lokem olgeta. Ol man we oli stadi long bisnes ya oli talem se i gud blong gat ol alam we oli save krae taem stil man i kam no yu save gat wan dog. Talemaot long wan fren kolosap, we yu save trastem hem, taem bambae yu go long narafala ples blong spel. Stap kwaet—ol stil man oli save mekem eni samting kwiktaem, samting we yu no ting rere long hem, mo oli save jenisim plan kwiktaem sipos oli fraet lelebet. Sipos yu yu wan long ol Wetnes blong Jeova, talemaot long olgeta mo traem prij long olgeta. Maet yu save kasem fasin fren no fasin sore long olgeta. No stopem olgeta sipos oli no kilim yu.
LONG PABLIK—Yu mas kwik blong luksave sipos wan man i stap folem yu. Wokbaot long open ples, i no long saed rod kolosap tumas long bus. No wokbaot long ol rod we i tudak mo i no gat man long hem. Putumgud paos mo ol sas samting blong yu long ples we i sef. Wokbaot stret olsem se yu stap go long wan ples. No werem ol sas klos no ol flas jen mo ol ring. Go long stoa wetem wan fren sipos ples i no sef. Tekem stret mane nomo we yu nidim, putum ol mane ya long ol defdefren poket blong yu no long ol defren ples.
LONG TRAK—Sipos “fasin blong holemtaet man long trak” i stap kamaot plante taem long ples blong yu, no stap insaed long trak we yu stopem i stap. Jenisim rod we yu stap folem blong go mo kambak long ples blong wok. Folem wan rod we i sef moa, nating sipos rod ya i longwan moa. Bifo we yu stopem trak blong yu lukluk raon blong luk sipos i gat samting we yu luk se i no stret tumas. No openem biaen blong trak long ples we i no gat man. No livim ol sas samting long trak we man i save luk. Sipos ol stil man we oli stap stil taem oli gat jans oli luk wan lok jen no ol narafala samting blong stopem stil man long trak blong yu bambae oli no mekem wan samting.
[Bokis Blong Pija Long Pej 6]
“I nogud yufala i stap hivimap ol gudgudfala samting blong yufala long wol ya blong kam rijman. Long ples ya i gat kakros oli save kam kakae, mo rosta tu i save spolem ol samting. Mo i gat man blong stil we oli save brekem haos, blong oli stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting. Mo ol man blong stil oli no save kam brekem haos, blong oli stil.”—Matyu 6:19, 20