?From Wanem Fasin Stil i Stap Kam Antap?
LONG Rio de Janero—Sande, Oktoba 18, 1992. Sanbij blong Kopakabana mo Ipanema we plante man oli savegud long tufala, oli fulapgud long ol man. Wantaem nomo, ol grup blong ol yangfala oli kam long ol sanbij ya, oli mekem faet bitwin olgeta mo oli stilim eni samting we i gat bigfala praes long hem, long ol man ya we oli stap long sanbij. Smol namba nomo blong ol polis long taem ya oli stanap i stap—oli no save mekem wan samting. Long tingting blong ol man ples mo ol turis, samting ya we oli luk long dei nomo i olsem wan nogud drim.
I tru, fasin blong brekem loa olsem stilim olting blong narafala man, i stap hapen oltaem. Long ol bigfala taon, ol man oli save se ol stilman oli stap stil long ol yangfala—mo samtaem oli kilim olgeta i ded—blong tekem ol sus blong olgeta. Ol stilman oli go insaed long ol haos nating se ol man oli stap no oli no stap. Ol haosgel we oli stap stil, oli stap stilim ol jen mo ol ring mo ol mane afta we oli savegud ol ples insaed long haos we olting ya oli stap long hem, biaen oli ronwe. Ol man oli stil long ol stoa. Ol grup we oli stap wokem plan blong stil oli save stilim ol man tu, olsem yumi luk long namba blong fasin ya blong holemtaet man olsem prisena mo askem mane, we i stap gru long Brasil. Mo maet yu save talem sam narafala eksampel long prapa ekspiryens blong yu no long samting we i hapen long ples blong yu. ?Be from wanem fasin stil i kam plante?
?From Wanem Ol Man Oli Stil?
Nating se tu bigfala risen hemia fasin pua mo fasin blong yusum ol drag, ansa ya i no klia tumas. The New Encyclopædia Britannica i talem se: “Ol man oli lego finis tingting blong faenemaot wan samting we i stap mekem se i gat fasin blong brekem loa, from hem i no karem frut.” Be, buk ya i talem se ol problem olsem fasin blong stil, “oli kamaot from ol filing blong ol yangfala we oli harem se oli no naf mo oli kros se oli no kasem ol samting we oli wantem mo pei blong laef.” Yes, from pablisiti we i pulum man blong pem samting, plante man oli luk se i no gat narafala rod blong oli kasem ol samting ya we oli wantem tumas, be blong stilim nomo.
Be, wan samting blong tingbaot se, The World Book Encyclopedia i poenemaot se: “Fasin blong brekem loa i no kam antap tumas long ol ples we ol man oli bilif se fasin blong laef blong olgeta bambae i stap sem mak. Fasin blong brekem loa i stap kam antap long ol ples we i gat kwik jenis long ples we ol man oli laef long hem mo wok we oli stap mekem—mo hop blong olgeta long fyuja.” Buk ya i ademap moa i se: “Ol yangfala oli no moa gat plante jans blong faenem wok. I gat ol wok we oli no nidim spesel trening from be i luk olsem se oli no spesel mo i slou bitim fasin stil we man i save kasem samting kwiktaem. Ol yangfala tu oli rere blong tekem jans blong stil from we oli no gat plante samting blong lusum sipos polis i holemtaet olgeta.”
Be, plante man we oli no gat wok no oli gat wok we oli stap kasem smol mane nomo long olgeta, oli no stap stil, be bighaf blong ol man we oli stap wok long ofis mo olgeta we oli wok afsaed oli stap stil long ples blong wok olsem se hemia i haf blong pei blong olgeta. I tru, long sam fasin blong stil, i nidim wan spesel wok blong yu save mekem. ?Yu yu bin harem fasin blong stilim ol bigfala mane we ol man blong politik, ol wokman blong gavman, mo ol bisnesman oli stap mekem? Samting ya i tru tumas, fasin blong stil i no fasin blong ol puaman nomo.
Tingbaot tu, ol sinema mo ol program long televisin, plante taem oli soem fasin blong stil olsem wan pleplei nomo (maet strongman we oli stap soem hem i man blong stil tu), samting ya i mekem se ol man oli agri moa long fasin blong stil. I tru, ol man oli save talem se ol samting olsem, oli blong lukluk nomo, be long sem taem sinema olsem i soem rod blong stil long olgeta ya we oli stap lukluk. ?Yu no ting se samting ya i givim tingting blong akseptem fasin blong stil? Yes, fasin blong wantem evri samting, fasin les, mo tingting ya se evriwan oli stap stil be oli no kasem panis from, oli mekem se fasin blong stil i stap kam antap. I tru, yumi laef long wan taem we Baebol i talem finis se “laef long wol ya bambae i kam strong tumas” ol fasin blong man i tingbaot hem nomo mo fasin blong wantem mane tumas oli kam plante.—2 Timote 3:1-5.
Bambae Yufala i No Stil
Nating se fasin blong ol man long wol i defren, hem i impoten long yumi blong obei long loa ya se: “Man we bifo i man blong stil, hem i mas finis long stil.” (Efesas 4:28) Wan man we i wantem tumas blong gat plante samting no i laekem ol samting we hem i save haremgud long hem, man ya i save ting se i gud blong tekem jans blong stil. Be fasin blong stil i wan bigfala samting long lukluk blong God mo fasin ya i soem se man ya i no gat lav long narafala man. Mo tu, fasin blong stilim ol smosmol samting i save mekem hat blong man i kam strong long fasin ya. ?Mo olsem wanem sipos ol man oli stap tingbaot yu olsem wan stil man? ?Hu bambae i trastem wan stil man? Tok blong God i waes, i se: “Man we i kilim man, no i stil no i brekem loa, . . . hem bambae i panis. Be i no stret sipos wan long yufala i panis from ol fasin olsem.”—1 Pita 4:15.
I tru, yu no laekem fasin blong stil we i stap kam antap, ?be olsem wanem ol man long ol ples we fasin stil i bigwan long hem, oli save winim? ?Olsem wanem sam man blong stil bifo oli jenisim fasin blong laef blong olgeta? ?Bambae fasin stil i finis wan dei long ful wol? Mifala i askem yu blong ridim nekis haf, “Wan Wol We i No Gat Stil Man Long Hem.”