?Bambae Fasin Fraet i Finis Wetaem?

?YU YU sapraes blong save se trufala seftaem i joen wetem wan man we i laef 2,000 yia bifo? Blong soem from wanem man i mas gat lav, Jisas Kraes i talem wan nambawan parabol, se: “I gat wan man i aot long Jerusalem, i stap godaon long Jeriko. Nao long rod, sam man blong stil oli kam holem hem. Olgeta ya oli stilim olgeta samting blong hem, mo oli kilim hem long stik, nao oli ronwe long hem we hem i stap hafded long rod.” Tufala man we i pas, tufala i tanem baksaed long man ya. Be wan man Sameria we i gat kaen fasin, i sore long hem. ?Be tede, hu i stap tingbaot man we narafala i kilim no i stilim olting blong hem? ?Yumi save bilif se wanem samting bambae i tekemaot fraet long fyuja?​—Luk 10:​30-37.

Nating se plante man oli talem se oli bilif long God, oli ting se ol man nao, oli mas fosem ol narafala blong folem ol loa mo stret oda. ?Be fasin blong panisim ol man nogud ya wetem moa yia long kalabus, no blong givim moa pei long ol polis, bambae i stopem raf fasin blong kilim man? ?Yu yu rili bilif se ol man we oli wok blong fosem ol man blong obei long loa, mo oli traehad blong putum smol seftaem, bambae oli finisim ol fasin olsem yusum drag, ol grup we oli mekem plan blong kilim man, mo fasin pua? Nating se yu tingting olsem wanem, fasin blong yumi blong hanggri mo tosta from stret fasin i no blong nating nomo.​—Matyu 5:6.

Ol Sam 46:1 i talem se: “God, hem i sefples blong yumi, hem i paoa blong yumi. Oltaem hem i rere blong givhan long yumi long taem blong trabol.” Bambae yumi luk se ol tok ya oli no jes ol naesfala vas nomo.

Olsem yu save finis, evri dei, radyo mo nyuspepa i givim ripot blong ol man we oli ded long ol faet bitwin ol manples mo long han blong ol man we oli kilim man mo sakem bom from politik. Long sam ples long wol, plante taem oli kilim i ded ol pikinini we prapa famle blong olgeta i no wantem olgeta, mo tu, oli kilim i ded man we i save givim wetnes long kot blong pruvum hu i bin kilim narafala man i ded. ?From wanem laef i kam olsem we i nating nomo? Maet i gat plante risen we i mekem se man i kilim narafala, be i gat wan risen we yumi no mas fogetem.

Tok blong God, Baebol, i talem se, ‘ful wol i stap long paoa blong Setan.’ (1 Jon 5:​19) Mo, Jisas Kraes i soemaot se Devel Setan i man blong gyaman, mo antap long samting ya, hem i “man blong kilim man” tu. (Jon 8:44) Speret man ya we i gat bigfala paoa i stap pulum ol man long plante defren rod, mo hem i stap mekem se, fasin blong kilim man i kam antap bigwan. Revelesen 12:12 i talem se: “Sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smol taem nomo blong hem i stap yet.” Be yumi glad tumas se ‘nyufala skae mo nyufala wol, we stret fasin nomo i stap long hem,’ bambae i tekem ples blong rabis wol ya.​—2 Pita 3:13.

Antap long nambawan hop ya blong wan nyufala wol, ?wanem samting i save givhan long yumi naoia?

Bifo we yumi faenem wan stret ansa long kwestin ya, i gud blong tingbaot oltaem se, ol trufala Kristin oli no kasem wan promes se bambae oli stap sef fulwan we oli no kasem fasin blong brekem loa. Aposol Pol i tokbaot sam denja we hem wan i bin fesem. Kolosap hem i lusum laef blong hem ‘from ol wora we i ron bigfala, mo from ol man blong stil, from ol man blong ples blong hem, mo from ol hiten man tu. Kolosap hem i lusum laef blong hem long ol bigfala taon, mo long bus, mo long medel solwora.’ (2 Korin 11:26) Be Pol i laef tru long ol denja ya. Samting ya i sem mak tede. Sipos yumi lukaotgud, yumi save gohed blong mekem ol wok blong yumi, olsem oltaem. I gud yumi luk sam rod we oli save halpem yumi.

Sipos wan man i stap long wan eria we i denja, ol gudfala fasin blong hem oli save kam olsem samting we i lukaotgud long hem, from ol man oli stap luklukgud ol narafala. Nating se ol stilman oli mekem plan mo oli stil, plante blong olgeta oli ting se oli olsem ol narafala man nomo. Yu no mas tok smosmol agens long samting we oli mekem. Mo yu no mas traem blong faenemaot wanem we oli joen long hem. Olsem nao, bambae oli no wantem blong givimbak long yu from wan samting. Yu no mas fogetem se ol stilman oli traem blong faenemaot hu i bin pem wan nyufala samting, no hu i stap go blong spel mo i aot long haos blong hem. Taswe yu mas waes long samting we yu talemaot long ol narafala.

Plante Wetnes blong Jeova oli faenem se, gudnem blong olgeta olsem ol Kristin minista, i bin lukaot long olgeta long nambawan fasin. Plante taem, ol man blong brekem loa oli soem se oli respektem ol Kristin man ya, we oli soem fasin blong mekem i sem mak long olgeta man, taem oli yusum taem blong olgeta blong halpem ol man long ples blong olgeta. Ol Wetnes oli no man blong kilim man i ded mo oli no stilman, mo oli no ‘man we oli stap go insaed long ol bisnes blong narafala man.’ Taswe, ol narafala oli no fraet long olgeta.​—1 Pita 4:15.

Seftaem Long Nyufala Wol Blong God

Yumi no wantem nating ‘ol fasin blong brekem loa we oli stap kam bigfala moa’ we Jisas Kraes i talemaot finis. Be yumi no mas wari bitim mak long samting ya. I moa gud we yumi trastem God fulwan se i no longtaem, bambae hem i tekemaot ol nogud fasin blong naoia. Bifo we Jisas i talem se wok blong talemaot “gud nyus blong Kingdom” bambae i gohed raonabaot long wol, hem i mekem ol disaepol blong hem oli tingbaot se: “Man we i stanap strong gogo kasem en, bambae God i sevem hem.”​—Matyu 24:​12-14, NW.

Yumi save sua se olgeta we oli stap kilim ol narafala, mo we samtaem oli kilim long fasin we i nogud olgeta, bambae God i tekemaot olgeta. Proveb 22:​22, 23 i talem se: “Yu no mas stilim man we i daon long ol narafala from we hem i stap daon, mo yu no mas mekem i strong tumas long man we i kasem trabol finis long get. Bambae Jeova i toktok from olgeta, mo bambae hem i karemaot laef blong olgeta we oli stap stilim olgeta.” Bambae Jeova i tekemaot ol man nogud, olsem ol man blong stil, ol man blong kilim man i ded, mo ol man blong mekem nogud long saed blong seks. Mo tu, bambae hem i no fogetem olgeta we oli safa from ol fasin nogud ya. Bambae hem i givimbak ol samting we oli lusum mo i mekem helt blong olgeta i kamgud fulwan.

Yes, olgeta we ‘oli tanem baksaed long ol samting nogud,’ bambae oli kasem laef we i no save finis. Bambae oli pastru long bigfala trabol we i kolosap nao, sipos no, bambae oli laef bakegen long ded. “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:​27-29) Bambae oli kasem ol blesing ya tru long ransom sakrifaes blong Jisas. (Jon 3:16) ?Be bambae laef i olsem wanem long wol ya we i kam Paradaes bakegen?

Aninit long Kingdom blong God, bambae ol man oli save haremgud tumas long laef. Jeova i talem se: “Ol man blong mi oli mas stap long wan ples we i gat pis, mo long ol haos we oli no save fraet nating, mo long ol ples blong spel we i no gat trabol long olgeta.” (Aesea 32:18) Olgeta we oli kasem laef we i no save finis, oli jenisim ol stampa fasin blong olgeta bifo long taem ya. Bambae i no gat man i mekem ol fasin nogud no i mekem i no stret long narafala, mo bambae i no gat man i harem nogud long han blong wan man olsem. Profet Maeka i talem se: “Bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek.” (Maeka 4:4; Esikel 34:28) !Samting ya i defren tumas long plante ples tede, we oli denja tumas!

[Bokis blong pija long pej 6]

LUKAOTGUD

Plante man blong brekem loa oli mekem fasin ya oltaem, oli mekem olsem we hemia i prapa wok blong olgeta. Maet oli wok long ol grup we i gat tu man no tri man, nating sipos wan nomo i poenem masket long yu. I gat plante pruf i stap kamaot blong soem se, man blong brekem loa we i moa yang, hem i denja moa. ?Yu save mekem wanem sipos wan man blong brekem loa i traem blong stilim no kilim yu?

Yu mas stap kwaet, blong mekem se stilman i no fraet​—sipos hem i no save wanem blong mekem, maet hem i kilim yu ded. Sipos yu wan Wetnes blong Jeova, talem long hem se yu wan Wetnes. Be yu mas rere blong givim wanem we stilman i wantem. Denja i save kam antap moa, sipos yu slou. Biaen, maet bambae yu harem se i sef blong askem hem blong givimbak ol kad blong pruvum se yu yu hu, no mane blong bas.

Plante taem, yu no save luksave wan man blong brekem loa. Sam stilman, oli man blong yusum drag no oli gat gudhan blong mekem ol fasin blong brekem loa, sam narafala oli wantem blong kasem kakae nomo. Nating se i olsem wanem, yu no mas karem bigfala mane wetem yu. Ol samting olsem gol jen, gol ring, no ol hanwaj we oli sas, yu no mas soemaot klia. Wokbaot mo mekem trep long ol ples olsem ol narafala man nomo, yu no mas soem se yu fraet. Yu no mas lukluk wan man strong tumas, olsem we yu wantem save se hem i hu. Sipos oli stap sut wetem ol masket long rod, kwiktaem nomo, yu mas slip daon long graon. Yu save wasem klos blong yu biaen.​—Wan man we bifo, hem i wan polis long Rio de Janero.

[Tok blong pija long pej 5]

Yu mas stap kwaet, mo givim samting we stilman i wantem. Denja i save kam antap moa, sipos yu slou