‘Tempel’ Mo ‘Jif’ Tede

“Taem ol man oli kam insaed blong mekem wosip, [jif, NW] tu bambae i kam insaed, mo taem oli go afsaed, hem tu bambae i go afsaed.”​—ESIKEL 46:10.

1, 2. ?Wanem impoten trutok i halpem yumi blong kasem save long mining blong tempel long vison blong Esikel?

SAM tija blong bifo, oli no hapi wetem fulwan buk blong Esikel. Folem Talmud, sam long ol tija ya oli ting se i no stret blong kaontem buk blong Esikel wetem ol narafala buk long Hibru Baebol. Oli faenem se i hadwok tumas blong givim mining blong vison ya long saed blong tempel mo oli talem se man i no naf blong kasem save long vison ya. Sam narafala man blong stadi long Baebol, olgeta tu oli no kasem save long vison ya we Jeova i givim long Esikel. ?Olsem wanem long yumi?

² Stat long taem we klin wosip i stanap bakegen, Jeova i stap blesem ol man blong hem, i stap mekem se oli kasem plante save long saed blong spirit. Jeova i mekem se oli luksave mining blong tempel blong Hem long saed blong spirit​—⁠hemia plan blong Jeova long saed blong klin wosip.a Impoten trutok ya i givhan long yumi blong save mining blong vison we Esikel i luk long saed blong tempel. Bambae yumi lukluk i go moa long fo haf blong vison ya​—tempel, pris, jif, mo kantri blong Isrel. ?Ol samting ya oli minim wanem tede?

Tempel Mo Yu

3. ?Yumi lanem wanem from siling we i hae mo ol pija we oli katem long wol blong tempel?

³ Traem tingbaot se naoia, yumi stap visitim tempel long vison ya. Yumi kam kasem tempel, nao yumi wokbaot long seven step blong go antap long wan long ol bigfala doa blong hem. Taem yumi go insaed long doa ya, yumi sapraes bigwan long ol samting we yumi luk. !Siling blong haos ya i hae olsem 30 mita! Samting ya i mekem yumi tingbaot se ol mak we yumi mas kasem blong go insaed long plan blong Jeova long saed blong wosip, oli hae. Laet we i pastru long ol windo, i kam insaed long tempel, i saen i go long ol pija blong pamtri we oli katem long wol. Long Baebol, pamtri i saen blong stret fasin. (Ol Sam 92:12; Esikel 40:14, 16, 22) Ples ya i tabu, i blong olgeta we fasin blong olgeta i stret mo we oli klin long saed blong spirit. From samting ya, yumi wantem holem stret fasin oltaem blong mekem se Jeova i agri long wosip blong yumi.​—Ol Sam 11:7.

4. ?Hu i no gat raet blong go insaed long tempel, mo samting ya i tijim yumi long wanem samting?

⁴ Long evri doa, i gat trifala rum blong ol gad. ?Bambae ol gad oli letem yumi blong go insaed long tempel? Jeova i talem long Esikel se ol man blong narafala kantri, “we oli no obei,” oli no save go insaed. (Esikel 40:10; 44:9) Samting ya i minim se, God i save agri long wosip blong olgeta ya nomo we oli laekem loa blong hem mo oli mekem ol loa ya oli wok long laef blong olgeta. (Jeremaea 4:4; Rom 2:​29) Ol man olsem, God i akseptem olgeta blong oli kam insaed long haos tapolen blong hem long saed blong spirit, hemia haos wosip blong hem. (Ol Sam 15:​1-5) Stat long 1919, taem klin wosip i stanap bakegen, kam kasem tede, ogenaesesen blong Jeova long wol ya i gohed blong leftemap ol loa blong Jeova mo sloslou hem i bin mekem ol loa ya oli kam klia moa. Olgeta we oli no wantem obei, God i no save akseptem olgeta blong oli joen wetem ol man blong hem. Tede, ol Kristin oli stap folem rul ya blong Baebol we i talem se oli mas putumaot man we i no wantem tanem tingting from sin blong hem. Rul ya i blong mekem se wosip blong yumi i stap klin mo tabu oltaem.​—1 Korin 5:13.

5. (a) ?Wanem sam samting long vison blong Esikel we i sem mak long vison blong Jon long Revelesen 9-15? (b) ?Long vison blong Esikel, ol 12 laen blong Isrel we oli stap wosipim God long bigfala yad blong tempel, oli pija blong hu?

⁵ Nao doa i open, mo yumi go insaed long bigfala yad blong tempel. Long ples ya, ol man oli stap wosipim Jeova mo oli stap presem hem. Samting ya i mekem yumi tingbaot vison blong aposol Jon long saed blong “bigfala kampani,” we oli stap mekem wosip long Jeova ‘long tempel blong hem, long dei mo long naet.’ Long tufala vison ya, i gat pija blong pamtri. Long vison blong Esikel, ol pamtri oli flasem wol insaed long bigfala doa. Long vison blong Jon, ol man we oli stap wosip long Jeova, oli holem lif blong pamtri long han blong olgeta. Hemia i minim se ol man ya oli glad tumas taem oli presem Jeova mo taem oli akseptem Jisas olsem King blong olgeta. (Revelesen 7:​9-​15, NW) Long vison blong Esikel, ol 12 laen blong Isrel i minim “ol narafala sipsip.” (Jon 10:16; skelem wetem Luk 22:28-​30.) ?Yu yu wan long olgeta ya we i glad tumas blong presem Jeova taem yu stap talemaot Kingdom?

6. ?Ol kijin we oli stap long bigfala yad blong tempel, oli blong wanem, mo samting ya i mekem ol narafala sipsip oli tingbaot wanem blesing?

⁶ Taem yumi stap visitim bigfala yad blong tempel, yumi luk 30 kijin. Ol kijin ya, oli ples we ol man oli kam long hem blong kakae mit blong ol sakrefaes blong olgeta. (Esikel 40:17) I tru se tede, ol narafala sipsip oli no givim anamol blong mekem sakrefaes. Nating se i olsem, taem oli kam long tempel long saed blong spirit, oli no kam nating, we oli no karem wan presen, no gat. (Skelem wetem Eksodas 23:15.) Aposol Pol i raetem se: “From samting ya, oltaem yumi mas joen long Jisas, mo yumi mas leftemap nem blong God. Fasin ya i olsem we oltaem yumi stap mekem sakrefaes blong givim long hem. Evritaem, taem yumi talemaot nem blong Jisas long fes blong ol man, i olsem we yumi givim presen i go long God. Mo oltaem yufala i mas mekem ol gudfala fasin, mo yufala i mas givgivhan long yufala, from we ol fasin ya tu i olsem we yumi stap kilim anamol blong mekem sakrefaes i go long God, we hem i glad tumas long olgeta.” (Hibrus 13:15, 16; Hosea 14:2) I rili wan bigfala blesing blong givim ol sakrefaes olsem i go long Jeova.​—Proveb 3:​9, 27.

7. ?Fasin ya blong makem tempel i mekem yumi sua long wanem samting?

⁷ Taem Esikel i stap lukluk vison ya, hem i luk we wan enjel i makem tempel. (Esikel 40:3) Aposol Jon i luk wan samting we i klosap sem mak. Hem i harem wan tok we i talem long hem se: “Yu girap, yu go makem [tempel] blong mi. Mo yu go kaontem olgeta ya we oli stap mekem wosip long haos blong mi.” (Revelesen 11:1) ?Samting ya i minim wanem? Long tufala vison ya, i klia se fasin blong makem tempel i olsem wan promes, no wan saen blong soem se i no gat wan samting nating i save stopem Jeova blong no mekem stamba tingting blong hem, long saed blong klin wosip, i kamtru. Tede, samting ya i sem mak. Yumi sua se i no gat wan samting nating​—olsem fasin agens blong wan strongfala gavman​—we i save stopem klin wosip blong i no stanap bakegen.

8. ?Hu ya i gat raet blong go insaed long doa blong yad ya we i insaed olgeta, mo ol doa ya oli mekem yumi tingbaot wanem?

⁸ Nao, yumi wokbaot i go narasaed long bigfala yad blong tempel. Long ples ya, yumi luk trifala doa we i blong go long yad ya we i insaed olgeta. Trifala doa ya, oli sem mak nomo long ol doa blong bigfala yad blong tempel. (Esikel 40:​6, 20, 23, 24, 27) Ol pris nomo oli gat raet blong go insaed long yad ya we i insaed olgeta. Ol doa blong yad ya, oli mekem yumi tingbaot se, ol rul mo loa blong God we ol tabu man oli mas folem long laef blong olgeta, oli sem mak long ol rul ya we oli mas lidim evri trufala Kristin. ?Be wanem wok blong ol pris, mo samting ya i gat wanem mining tede?

Ol Pris We Oli Holemstrong Long God

9, 10. ?Olsem wanem ol ‘pris mo king,’ we oli sem mak long grup blong ol pris long vison blong Esikel, oli stap givim ol tijing long saed blong spirit?

⁹ Bifo long Kristin taem, ol pris oli wokhad insaed long tempel. Oli mas kilim ol anamol blong mekem sakrefaes, oli bonem ol anamol ya long olta, mo oli mas givhan long ol narafala pris mo ol man. I nidim bigfala paoa blong mekem olgeta wok ya. Be oli gat wan narafala impoten wok bakegen. Long saed blong ol pris, Jeova i talem se: “Oli mas tijim ol man blong mi blong oli luksave ol samting we oli tabu, mo ol samting we oli no tabu, mo ol samting we oli klin, mo ol samting we oli no klin long fes blong mi.”​—Esikel 44:23; Malakae 2:7.

¹⁰ ?Yu yu gat fasin tangkiu from ol hadwok mo traehad we ol tabu man, we oli ‘pris mo king,’ oli stap mekem blong leftemap klin wosip? (1 Pita 2:9) Olsem ol pris long laen blong ol Livaet bifo, tede ol tabu man oli stap lidim wok ya blong givim tijing long saed blong spirit. Oli stap givhan long ol man blong kasem save long ol fasin we oli klin mo we God i agri long olgeta, mo ol fasin we oli no klin. (Matiu 24:45) Ol tijing ya we yumi kasem tru long ol buk we oli stanap long Baebol, ol Kristin miting mo ol asembli, oli bin givhan long plante milyan man blong frengud wetem God.​—2 Korin 5:​20.

11. (a) ?Olsem wanem vison blong Esikel i soem se i impoten tumas we ol pris oli stap klin? (b) ?Long ol lasdei, olsem wanem ol tabu man oli kam klin long saed blong spirit?

¹¹ Be, ol pris oli mas mekem sam samting moa antap long wok ya blong tijim ol man blong stap klin. Olgeta tu oli mas stap klin. Taswe, Esikel i luk wok ya blong klinim ol pris blong Isrel. (Esikel 44:10-​16) Histri i soem se sem samting olsem i bin hapen long 1918. Long taem ya, Jeova i ‘klinim’ tempel blong hem long saed blong spirit, i jekemap grup ya we oli olsem pris. (Malakae 3:​1-5) Olgeta we hem i faenem se oli klin long saed blong spirit, we oli lego fasin blong wosip long aedol, hem i letem olgeta oli gohed blong wok long tempel blong hem long saed blong spirit. Be, ol tabu man ya, oli olsem ol narafala man. Sipos oli no lukaot gud, oli save kam doti long saed blong spirit mo fasin. (Esikel 44:22, 25-​27) Taswe, olgeta ya oli bin traehad blong ‘stap klin oltaem, we ol rabis fasin blong wol i no spolem olgeta.’​—Jemes 1:​27; skelem wetem Mak 7:​20-​23.

12. ?From wanem yumi mas gat bigfala tangkiu long wok blong ol tabu man?

¹² I gud we wanwan long yumi i askem se, ‘?Mi mi gat fasin tangkiu from eksampel we ol tabu man oli soem, taem oli holemstrong long wok blong God long plante yia? ?Mi mi gat strong bilif olsem olgeta?’ I gud we ol memba blong bigfala kampani oli tingbaot se bambae ol tabu man ya oli no stap oltaem wetem olgeta long wol ya. Jeova i tokbaot ol pris long vison blong Esikel, i se: “Bambae oli no save gat graon long Isrel olsem ol narafala laen blong yufala, mi bambae mi stamba blong evri samting long laef blong olgeta.” (Esikel 44:28) I sem mak, ol tabu man oli no gat wan stret ples blong olgeta long wol ya. Bambae oli go long heven. Taem we oli stap yet long wol ya, ol memba blong bigfala kampani oli tingbaot samting ya olsem jans blong sapotem olgeta mo leftemap tingting blong olgeta.​—Matiu 25:​34-​40; 1 Pita 1:​3, 4.

?Hu Ya Jif?

13, 14. (a) ?From wanem yumi save talem se jif i wan blong ol narafala sipsip? (b) ?Jif i pija blong hu?

¹³ Naoia, i gat wan kwestin we yumi intres tumas long hem. ?Jif i pija blong hu? Sam vas we i tokbaot vison ya oli soem se jif hem i wan man nomo, be sam narafala, oli soem se hem i wan grup blong man. Taswe, maet yumi save talem se jif ya i minim wan grup blong man. (Esikel 44:3; 45:​8, 9) ?Be wanem grup blong man? I sua se hem i no grup blong ol tabu Kristin. Long vison ya, jif i stap wok wetem ol pris, be hem i no wan pris. Jif i defren long ol pris, from we hem i gat wan pis graon long kantri blong Isrel. Samting ya i soem se jif i gat hop blong laef long wol ya long fiuja, i no long heven. (Esikel 48:21) Mo tu, Esikel 46:10 i talem se: “Taem ol man [olgeta we oli no kamaot long laen blong pris] oli kam insaed [long bigfala yad blong tempel] blong mekem wosip, [jif] tu bambae i kam insaed, mo taem oli go afsaed, hem tu bambae i go afsaed.” Jif ya i no go insaed long yad ya we i insaed olgeta, be hem i stap wosip long God long bigfala yad blong tempel. Taem ol man oli kam insaed, hem tu i kam insaed, mo taem oli go afsaed, hem tu i go afsaed. Ol samting ya oli pruvum se jif i wan memba blong bigfala kampani blong ol narafala sipsip.

¹⁴ I klia se jif i gat sam bigfala wok blong mekem long medel blong ol man blong God. Long bigfala yad blong tempel, hem i sidaon long rum we i stap long Doa long saed i go long Is. (Esikel 44:​2, 3) Samting ya i soem se jif i gat wok blong lukaot, i sem mak olsem ol olfala long Isrel we oli stap sidaon long bigfala doa blong taon blong stretem problem blong ol man. (Rut 4:​1-​12; Proveb 22:22) Tede, ?hu i gat wok blong lukaot long medel blong ol narafala sipsip? Hemia ol elda we tabu spirit i putumap olgeta, mo we oli gat hop blong laef long wol ya. (Ol Wok 20:28) Taswe, naoia grup we i olsem jif i stap kasem trening blong bambae oli save lukaot long ol wok long niufala wol.

15. (a) ?Olsem wanem vison blong Esikel i soem se ol elda we oli blong bigfala kampani oli wok wanples wetem ol pris we oli blong smol kampani? (b) ?Ol elda we tabu spirit blong God i makemaot olgeta, oli stap mekem wanem wok blong lidim ogenaesesen blong God long wol ya?

¹⁵ Be tede, ?olsem wanem ol tabu pris oli stap wok wanples wetem ol elda blong bigfala kampani, we oli gat sam wok blong lukaot? Vison blong Esikel i soem se ol tabu pris nao oli stap lidim ol wok long saed blong spirit. Ol elda we oli blong bigfala kampani, oli stap wok aninit long ol tabu pris ya blong sapotem mo givhan long olgeta. ?Olsem wanem oli sapotem mo givhan long ol pris ya? Tingbaot ol pris long vison blong Esikel. God i givim wok long olgeta blong tijim ol man long ol samting long saed blong spirit. God i talem long olgeta tu se oli mas stretem ol trabol. Antap long hemia, ol Livaet oli kasem wok ya blong “lukaot” long ol doa blong tempel. (Esikel 44:11, 23, 24) I klia se jif i mas stap daon mo letem ol pris oli lidim ol wok long saed blong spirit. Taswe, tede i stret nomo we ol tabu man oli lidim klin wosip. Eksampel, ol memba blong Hed Kampani blong ol Witnes blong Jeova, oli ol man we oli kamaot long grup ya we tabu spirit i makemaot olgeta. Plante yia finis, ol tabu elda ya we oli strong long bilif, oli bin trenem grup ya we i olsem jif. Oli stap rerem olgeta from taem ya we bambae oli kasem fulwan raet blong lukaot long wok long niufala wol blong God we bambae i kam.

16. Folem Aesea 32:​1, 2, ?olgeta elda oli mas mekem wanem?

¹⁶ Ol elda ya we naoia oli stap kasem trening blong karem moa wok olsem grup blong jif, ?oli wanem kaen man? Profet tok blong Aesea 32:​1, 2 i talem se: “!Olgeta! I gat taem i stap kam, we wan king bambae i stap rul long fasin we i stret olgeta, mo we ol [prins] blong hem bambae oli stap mekem i stret nomo. Olgeta ya evriwan bambae oli stap mekem i gud long ol man. Bambae oli olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Bambae oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.” Tede, profet tok ya i stap kamtru long olgeta Kristin elda​—ol tabu brata mo narafala sipsip. Ol elda ya evriwan oli stap lukaot gud long ol sipsip, oli stap sevem olgeta long taem blong “hariken,” we i minim fasin agens mo tingting we i foldaon.

17. ?Ol Kristin elda oli mas tingbaot olgeta wanwan olsem wanem, mo ol sipsip oli mas tingbaot ol elda ya olsem wanem?

¹⁷ Long Hibru lanwis, tufala tok ya “prins” mo “jif,” tufala i gat sem mining nomo. Ol man oli no stap yusum tufala tok ya olsem taetel blong leftemap ol man, no gat. Be, oli stap yusum blong makem bigfala wok we ol man ya oli stap mekem blong lukaot long ol sipsip blong God. Jeova i givim strong woning ya, se: “Yufala we i stap rul long Isrel, longtaem tumas yufala i stap mekem sin. Yufala i mas finis long fasin ya blong faet, mo fasin ya blong spolem ol narafala man. Yufala i mas mekem ol samting we i stret gud.” (Esikel 45:9) I impoten tumas we olgeta elda tede, oli obei long advaes ya. (1 Pita 5:​2, 3) Long rod ya, bambae ol sipsip oli luksave se ol elda ya ‘oli olsem presen we Jisas i givim i go nomo long ol man.’ (Efesas 4:8) Tok blong God i givim ol mak we olgeta ya oli mas kasem blong kam elda. (1 Timoti 3:​1-7; Taetas 1:​5-9) From samting ya, ol Kristin oli folem ol rod we ol elda ya oli givim blong lidim olgeta.​—Hibrus 13:7.

18. ?Wanem sam bigfala wok we grup blong ol jif i stap mekem naoia, mo wanem wok blong olgeta long fiuja?

¹⁸ Long taem blong Baebol, samfala jif oli gat plante wok, samfala oli gat smol nomo. Tede, ol elda blong bigfala kampani, oli gat plante defren wok blong mekem long ogenaesesen blong Jeova. Samfala, oli lukaot long wan kongregesen nomo. Sam narafala, oli lukaot long plante kongregesen, olsem ol elda blong visitim ol kongregesen. Sam narafala bakegen, oli ol memba blong Branj Komiti nao oli mas lukaot long olgeta wok blong wan kantri. Mo sam narafala bakegen, oli stap givhan blong mekem ol defren wok long Hed Kampani. Long niufala wol, bambae Jisas i putumap ‘ol prins long olgeta ples long wol,’ blong lidim ol man we oli stap wosip long Jeova long wol ya. (Ol Sam 45:16) I sua se plante long ol prins ya, bambae Jisas i jusumaot olgeta long ol elda we oli stap wok strong tede. Naoia, ol elda ya oli stap pruvum se oli save karem moa wok. Taswe, bambae plante long olgeta oli kasem moa wok long niufala wol we bambae i kam, taem Jisas i soemaot we wok blong olgeta we oli olsem jif, hem i olsem wanem.

Kantri Blong Ol Man Blong God Tede

19. ?Kantri long vison blong Esikel i pija blong wanem?

¹⁹ Vison blong Esikel i soem tu se kantri blong Isrel i stanap bakegen. ?Samting ya i minim wanem? Ol narafala profet tok long saed ya, oli talem se bambae kantri blong Isrel i kam wan paradaes, olsem Iden. (Esikel 36:34, 35) Tede, yumi haremgud tumas blong stap long wan “kantri” we i stanap bakegen. Kantri ya tu i olsem Iden. I sem mak, plante taem yumi tokbaot paradaes long saed blong spirit. Wan Wajtaoa i bin givim mining blong “kantri” blong yumi se hem i wan “ples blong wok” blong ol man we God i jusumaot.b Nomata weples wan man blong Jeova i stap long hem, hem i stap insaed long kantri ya we i stanap bakegen, sipos hem i traehad blong biaenem Jisas Kraes, mo leftemap tru wosip.​—1 Pita 2:​21.

20. ?Yumi save lanem wanem rul from “tabu graon” long vison blong Esikel, mo olsem wanem yumi save mekem rul ya i wok long laef blong yumi?

²⁰ ?Olsem wanem long pis graon ya we oli kolem “tabu graon”? Graon ya i wan presen we ol man oli givim blong sapotem ol pris mo taon. Long sem fasin, “evriwan we i stap long kantri ya” oli mas givim wan pis graon long man ya we i olsem jif. ?Samting ya i minim wanem tede? Hemia i no minim se ol man blong God oli mas pem ol lida blong skul, no gat. (2 Tesalonaeka 3:8) Be, i minim se, yumi mas sapotem ol elda long saed blong spirit. I minim se yumi givhan long olgeta long wok we oli stap mekem naoia mo soem tingting blong wok tugeta mo obei. Olsem long taem blong Esikel, presen ya we oli givim, oli stap givim i go ‘long Jeova,’ i no long wan man long wol ya.​—Esikel 45:​1, 7, 16.

21. ?Yumi save lanem wanem from fasin ya blong seraotem ol graon long vison blong Esikel?

²¹ I no ol jif mo ol pris nomo we oli gat graon long kantri ya we i stanap bakegen. Vison ya i soem se ol man Isrel oli seraotem graon blong kantri ya i go long ol wanwan 12 laen blong olgeta. Olsem nao, ol wanwan laen ya oli sua se bambae oli gat graon long kantri ya. (Esikel 47:13, 22, 23) Taswe, ol memba blong bigfala kampani oli gat ples long paradaes long saed blong spirit tede, be tu, bambae oli kasem wan pis graon taem oli kam aninit long rul blong Kingdom blong God long wol ya.

22. (a) ?Taon long vison blong Esikel i pija blong wanem samting? (b) ?Yumi save lanem wanem from ol doa raon long taon ya?

²² Laswan samting, se, ?taon long vison ya i pija blong wanem? Taon ya, i no blong heven, from we hem i stanap i stap long graon ya we i “no tabu.” (Esikel 48:15-​17) Taswe, hem i mas minim wan samting long wol ya. ?Wanem ya wan taon? Tok ya taon i givim tingting ya se ol man oli stap kam wanples, oli mekem wan grup mo wok folem plan blong stanemap wan samting. Olsem nao, taon ya i minim fasin blong lidim ol wok long wol ya blong givim blesing long ol stret man. Bambae taon ya i mekem fulwan wok blong hem long “niufala wol” we i stap kam. (2 Pita 3:​13) Ol bigfala doa raon long taon ya, wan doa blong ol wanwan laen blong Isrel, i minim se man i save kam insaed long taon ya enitaem nomo. Tede, ol man blong God oli no stap lidim wok long fasin haed, no gat. Ol brata ya we oli stap lidim ol wok, oli mas mekem ol narafala oli harem se oli fri blong kam klosap long olgeta. Evriwan i save gud ol rul we ol lida ya oli stap folem. Vison ya i soem se ol man blong evri laen oli mekem garen long graon ya we i blong taon. Samting ya i mekem yumi tingbaot se ol narafala sipsip oli sapotem plan blong lidim wok we ol man blong God raon long wol oli stap folem.​—Esikel 48:19, 30-​34.

23. ?Bambae yumi tokbaot wanem long haf we i kam biaen?

²³ ?Be wanem mining blong reva ya we i kamaot long olta blong tempel? Long namba tri haf we i kam biaen, bambae yumi luk wanem we reva ya i pija blong hem tede mo long fiuja.

[Ol futnot]

Ol Kwestin Blong Tingtingbak

◻ ?Tempel long vison blong Esikel i pija blong wanem samting?

◻ ?Ol pris we oli stap wok long tempel oli pija blong hu?

◻ ?Hu ya grup we i olsem jif, mo wanem sam bigfala wok blong olgeta?

◻ ?Wanem ya kantri long vison blong Esikel, mo i minim wanem taem oli seraotem graon long ol 12 laen blong Isrel?

◻ ?Taon i pija blong wanem?

[Map Blong Pija Long Pej 15]

(Lukluk niuspepa)

Fasin blong seraotem graon olsem we Esikel i luk long vison

OL TWELEF LAEN

Bigfala Solwota

Solwota Blong Galili

Jodan Reva

Ded Si

DAN

ASA

NAFTALI

MANASE

EFREM

RUBEN

JUDA

JIF

BENJAMIN

SIMEON

ISAKA

SEBULAN

GAD

MEKEM TABU GRAON I KAM BIGWAN MOA

A. “Jeova Hem Wan i Stap Long Ples Ya” (Jeova-Sama); B. Graon blong taon we i stap karem plante kakae

Graon Blong Ol Livaet

Haos Prea Blong Jeova

Graon Blong Ol Pris

B A B