Blesing Blong Jeova Long “Kantri” Blong Yumi

‘Long olgeta ples we reva ya i ron i go long hem, bambae i mekem olgeta samting oli laef.’​—ESIKEL 47:​9, NW.

1, 2. (a) ?Wota i impoten olsem wanem? (b) ?Reva long vison blong Esikel i pija blong wanem?

WOTA i wan impoten samting. Olgeta laef samting long wol ya, oli dipen long hem. I no gat wan man i save stap laef sipos hem i no dring wota. Yumi nidim wota blong klinim ol samting tu, from we wota i save ron mo i karemaot ol doti. Olsem nao, yumi yusum wota blong swim, wasem klos, mo klinim kakae blong yumi. Fasin ya blong yusum wota i sevem laef blong yumi.

² Long Baebol, wota i pija blong ol samting long saed blong spirit, we Jeova i stap yusum blong sevem man. (Jeremaea 2:​13; Jon 4:​7-​15) Sam long ol samting ya, hemia sakrefaes blong Kraes mo save long Tok blong God, we Hem i stap yusum blong klinim ol man blong hem. (Efesas 5:​25-​27) Long vison blong Esikel, reva we i kamaot long tempel, i saen blong ol blesing we oli save givim laef long man. ?Be wetaem reva ya i ron, mo samting ya i minim wanem long yumi tede?

Wan Reva i Ron Long Wan Kantri We i Stanap Bakegen

3. ?Esikel i luk wanem samting, olsem i stap long Esikel 47:​2-​12?

³ Ol man blong Esikel, we oli kalabus long Babilon, oli harem nogud tumas. Taswe, oli nidim Jeova blong i givhan long olgeta. Long vison blong Esikel, hem i luk wan wota i kamaot long haos prea, i stap ron i goaot long tempel. !Samting ya i leftemap tingting blong hem bigwan! Wan enjel i makem longfala blong reva ya, i go kasem faef handred mita. Fastaem, reva ya i no dip, i kavremap leg nomo. Biaen, taem reva ya i stap ron i go, hem i kam kasem ni, mo biaen bakegen, hem i dip, i kasem ples blong strap, mo afta, hem i kam wan bigfala reva we man i save swim nomo blong krosem. Reva ya i mekem ol samting oli laef mo i mekem graon i karem plante kakae. (Esikel 47:​2-​11) Esikel i talem se: “Long reva ya, bambae ol narnarafala tri oli stap gru long tufala saed blong hem, blong givim kakae long ol man.” (Esikel 47:​12a) !Taem reva ya i kasem Ded Si, hem i jenisim Ded Si, we i no gat laef samting long hem, i kam gudfala freswota, we i fulap long fis! Nao, Ded Si i kam wan nambawan ples blong hukum fis.

4, 5. ?Olsem wanem profet tok blong Joel long saed blong reva i sem mak long profet tok blong Esikel, mo from wanem samting ya i impoten tumas?

⁴ Ating naesfala profet tok ya i mekem se ol man Jyu we oli stap long kalabus, oli tingbaot wan narafala profet tok we i bin kamaot bitim tu handred yia bifo: “Wan springwota bambae i aot long haos blong mi, i ron i kam, mo wota ya bambae i ron i go long bigfala levelples ya Sitim.”a (Joel 3:​18) Profet tok blong Joel i klosap sem mak long profet tok blong Esikel. Joel i talem se bambae wan reva i kamaot long haos blong God, tempel, nao i ron i go long wan draeples, mo i mekem se i gat laef long draeples ya.

⁵ Longtaem finis i kam, Wajtaoa i bin eksplenem se profet tok blong Joel i stap kamtru long taem blong yumi.b Taswe, yumi sua se samting ya i sem mak long vison blong Esikel. Long kantri blong ol man blong God tede, olsem long Isrel bifo, ol blesing blong Jeova oli stap ron i kam long yumi olsem wan reva.

Ol Blesing We Oli Stap Ron i Kam Olsem Wan Bigfala Reva

6. ?Fasin ya we Esikel i saksakem blad long olta long vison, i mekem ol man Jyu oli tingbaot wanem?

⁶ Ol man blong God we oli gobak long kantri blong olgeta, oli kasem plante blesing. ?Ol blesing ya oli kamaot weples? Tingbaot se wota we i stap ron i go, hem i kamaot long tempel blong God. Samting ya i sem mak tede. Ol blesing we yumi stap kasem, oli kamaot long bigfala tempel blong Jeova long saed blong spirit​—plan we Jeova i putumap long saed blong klin wosip. Vison blong Esikel i soem klia wan narafala impoten samting. Long yad ya we i insaed olgeta, wota ya i ron, i pas klosap long olta, long saed i go long saot. (Esikel 47:1) Long vison ya, olta i stap stret long medel blong tempel. Jeova i eksplenem gud samting ya long Esikel mo i talem long hem se hem i mas tekem sam blad blong anamol mo saksakem i go long olta. (Esikel 43:13-​18, 20) Olta ya i gat bigfala mining long olgeta man Isrel. Kontrak we Jeova i bin mekem wetem olgeta i stanap longtaem finis, long taem ya we Moses i kafsaedem blad long wan olta klosap long Hil Sinae. (Eksodas 24:​4-8) Long vison ya, God i talem long Esikel blong saksakem blad i go long olta. Samting ya i mekem ol man Isrel oli tingbaot se taem oli gobak long kantri blong olgeta, oli mas tinghevi long kontrak we Jeova i mekem wetem olgeta. Long rod ya nomo, bambae ol blesing blong Jeova oli ron i kam long olgeta olsem reva.​—Dutronome 28:​1-​14.

7. ?Tede, olta i minim wanem long ol Kristin?

⁷ Long sem fasin, ol man blong God tede oli stap kasem blesing from wan kontrak we i moa gud, hemia niufala kontrak. (Jeremaea 31:31-​34) Niufala kontrak ya tu, blad blong Jisas Kraes i bin mekem i stanap longtaem finis. (Hibrus 9:​15-​20) Tede, i nomata we yumi wan tabu man, we i joen long kontrak ya, no yumi blong ol “narafala sipsip,” we oli stap kasem blesing from kontrak ya, yumi luksave bigfala mining blong samting ya we i olsem olta. Olta ya i saen blong ol samting we God i wantem mekem, we oli joen wetem sakrefaes blong Jisas. (Jon 10:16; Hibrus 10:10) Olta ya i stap long medel blong tempel long saed blong spirit. Long sem fasin, sakrefaes blong Kraes i stamba samting long klin wosip. Sakrefaes ya i mekem se God i fogivim sin blong yumi, mo hem i rod ya nomo blong kasem evri samting we yumi gat hop blong kasem. (1 Jon 2:2) Taswe, i gud we yumi traehad blong mekem laef blong yumi i laenap wetem loa blong niufala kontrak, hemia “loa blong Kraes.” (Galesia 6:2) Sipos yumi mekem olsem, bambae yumi kasem blesing from ol rod we Jeova i stap yusum blong givim laef.

8. (a) ?Wanem samting i no gat long yad ya we i insaed olgeta? (b) ?Ol pris oli save yusum wanem blong wasem han mo leg blong olgeta?

⁸ Wan long ol blesing ya, hemia se yumi kam klin long lukluk blong Jeova. Long yad ya we i insaed olgeta, long tempel we Esikel i luk long vison, wan samting i no stap. Samting ya i impoten tumas long yad blong haos tapolen bifo mo long tempel blong Solomon​—hemia bigfala besin, we biaen oli kolem solwota, we ol pris oli stap wasem han mo leg blong olgeta long hem. (Eksodas 30:18-​21; 2 Kronikel 4:​2-6) Long tempel long vison blong Esikel, ?bambae ol pris oli yusum wanem blong wasem han mo leg blong olgeta? !Bambae oli yusum reva ya we i ron i pastru long yad ya we i insaed olgeta! Yes, bambae Jeova i blesem ol pris ya taem hem i givim ol samting we oli nidim blong stap klin, mo tabu long fes blong hem.

9. ?Olsem wanem olgeta we tabu spirit i makemaot olgeta wetem bigfala hif blong man tede, oli save stap klin long fes blong God?

⁹ Tede tu, ol tabu man oli kasem blesing ya blong stap klin long fes blong Jeova. Jeova i luk olgeta olsem we oli tabu, mo i talem se oli stret man. (Rom 5:​1, 2) ?Olsem wanem long “bigfala kampani,” we ol narafala laen blong Isrel oli pija blong olgeta? Yes, bigfala kampani ya, oli stap mekem wosip long God long bigfala yad blong tempel. Mo semfala reva long vison blong Esikel i ron i go long ples ya tu. !Taswe, i stret nomo we aposol Jon i luk we bigfala kampani ya, oli stap werem ol waet klos we oli klin gud, taem oli stap wosip long God long bigfala yad blong tempel long saed blong spirit! (Revelesen 7:​9-​14, NW) Nomata we ol man long wol ya oli mekem i nogud tumas long olgeta, be oli sua se, sipos oli gohed blong soemaot bilif long ransom sakrefaes blong Kraes, bambae Jeova i luk olgeta olsem we oli klin. ?Olsem wanem oli save soemaot bilif blong olgeta? Hemia taem oli folem gud eksampel blong Jisas, mo trastem sakrefaes blong hem fulwan.​—1 Pita 2:​21.

10, 11. ?Wanem wan narafala impoten mining blong wota ya long vison, mo olsem wanem samting ya i joen wetem reva we i stap kam bigwan moa?

¹⁰ Olsem we yumi talem finis, i gat wan narafala impoten mining blong samting ya we i olsem wota​—hemia save. Taem ol man Isrel oli gobak long kantri blong olgeta, Jeova i yusum ol pris blong givim ol tijing blong Baebol long ol man blong hem. (Esikel 44:23) Long sem fasin, tede Jeova i stap yusum grup blong ‘ol pris mo king’ blong givim fulap tijing long ol man blong hem, long saed blong Trutok we i kamaot long Baebol. (1 Pita 2:9) Long taem blong ol lasdei ya, save long saed blong Jeova God, ol stamba tingting blong hem long saed blong ol man, mo antap moa, save long saed blong Jisas Kraes mo Kingdom blong Mesaea, oli stap ron i kam bigwan moa oltaem olsem wan bigfala reva we i no save drae. !Ol samting long saed blong spirit we yumi stap kasem blong mekem yumi harem gud, oli dip olsem wan bigfala reva!​—Daniel 12:4.

¹¹ Reva ya we enjel i makem long vison, sloslou hem i stap kam dip moa. Long sem fasin, ol blesing blong Jeova we oli save givim laef long man, oli stap kam fulap moa blong givhan long olgeta man we oli stap kam insaed long kantri ya blong yumi long saed blong spirit. Wan narafala profet tok long saed blong kantri we i stanap bakegen, i talem se: “Hemia we i smolwan bambae i kam taosen man, mo hemia we i olsem nating nomo bambae i kam wan strongfala nesen. Mi, Jeova, mi mekem wok ya i spid moa long stret taem blong hem.” (Aesea 60:​22, NW) Ol tok ya oli kamtru finis​—!plante milyan man oli kam joen wetem yumi long klin wosip! Jeova i givim fulap “wota” long ol man we oli stap lukluk i go long hem. (Revelesen 22:17) Hem i mekem se ogenaesesen blong hem long wol ya i seremaot Baebol mo ol buk we oli tokbaot Baebol, long olgeta man raon long wol, long plante handred lanwis. Mo tu, hem i mekem se i gat ol Kristin miting mo ol asembli raonabaot long wol. Long rod ya, olgeta man oli save kasem wota blong trutok we i klingud. ?Wota ya i gat paoa long laef blong ol man olsem wanem?

!Wota Ya i Givim Laef!

12. (a) ?From wanem ol tri long vison blong Esikel oli grugud? (b) Long ol lasdei, ?ol tri ya we oltaem nomo oli karem frut, oli pija blong wanem?

¹² Reva we Esikel i luk long vison, i karem laef mo i mekem ol sikman oli kamgud bakegen. Taem Esikel i luk ol tri we oli stap gru klosap long reva ya, enjel i talem long hem se: “Neva bambae lif blong olgeta i save drae, bambae oli stap karem frut oltaem nomo. . . . Ol tri ya, ol frut blong olgeta i gud blong kakae, mo ol lif blong olgeta, bambae ol man oli save yusum blong mekem ol sikman i gud bakegen.” ?From wanem ol tri ya oli grugud? “From we reva ya we i kamaot long haos blong Hae God i stap givim wota long olgeta.” (Esikel 47:12b) Ol tri long vison ya, oli pija blong olgeta samting we God bambae i mekem long man blong oli kam stret gud bakegen, tru long ransom sakrefaes blong Jisas. Long taem blong yumi, smol grup blong ol tabu man long wol, oli stap lidim wok ya blong fidim ol man mo blong mekem oli kamgud bakegen long saed blong spirit. Afta we ol 144,000 oli kasem pei blong olgeta long heven, bambae oli wok wetem Kraes olsem ol king mo pris. Nao, bambae oli gohed blong givim blesing long ol man, go kasem laswan faet blong winim ded we Adam i stamba blong hem.​—Revelesen 5:​9, 10; 21:​2-4.

13. Long taem blong yumi, ?wanem fasin blong mekem man i kamgud bakegen i bin gohed?

¹³ Reva long vison ya i ron i go long Ded Si, we i no gat laef samting insaed, nao i mekem evri samting we i ded, i gat laef. Ded Si, hem i pija blong wan ples we ol man blong hem oli ded long saed blong spirit. Be bambae i gat laef “long olgeta ples we reva ya i ron i go long hem.” (Esikel 47:9) Samting olsem i stap kamaot tu long ol lasdei ya. Ol man oli kasem laef long saed blong spirit long evriples we wota blong laef i pas long hem. Ol faswan man we wota ya i mekem oli laef, hemia smol grup blong ol tabu man long 1919. I olsem we oli girap long ded, wan ples we i no gat wok, oli laef long saed blong spirit. (Esikel 37:​1-​14; Revelesen 11:​3, 7-​12) Stat long taem ya, impoten wota ya i ron i go kasem ol narafala man we oli ded long saed blong spirit. Ale, ol man ya oli laef mo oli mekemap grup ya blong ol narafala sipsip we namba blong olgeta i stap go antap bigwan. Ol man ya, oli lavem Jeova mo oli stap mekem wok blong hem. I no longtaem, bambae wota ya i ron i go kasem olgeta ya we bambae oli laef bakegen long ded, we oli plante tumas.

14. ?Ded Si we i kam wan ples blong hukum fis i laenap wetem wanem samting tede?

¹⁴ Man we i laef long saed blong spirit, hem i save karem plante frut. Hemia i stret wetem solwota ya we bifo i ded, i no gat fis long hem, be biaen, hem i fulap long fis, nao ol man oli save go huk long hem. Jisas i talem long ol man blong hem se: “Bambae mi mekem yufala i man blong pulum man.” (Matiu 4:​19) Long ol lasdei, fasin ya blong pulum fis i stat wetem wok blong hivimap ol tabu man we oli stap yet long wol. Be wok ya blong pulum fis i no finis. Wota blong laef we i kamaot long tempel blong Jeova long saed blong spirit, wetem stret save, i stap wok long laef blong ol man blong olgeta nesen. Long olgeta ples we reva ya i go long hem, bambae i mekem olgeta samting oli laef long saed blong spirit.

15. ?Wanem i soem se i no evriwan we bambae oli akseptem rod blong God blong givim laef, mo ol man ya bambae oli kasem wanem frut?

¹⁵ Yes, i no olgeta man we oli glad blong lesin long mesej blong laef. Bambae samting ya i sem mak long olgeta we oli laef bakegen long ded, long Wan Taosen Yia Rul blong Kraes. (Aesea 65:20; Revelesen 21:8) Enjel i talem se, sam haf blong Ded Si i jenis i kam freswota. Be ol narafala ples we oli no jenis i kam freswota, ‘oli fulap long sol nomo.’ (Esikel 47:11) Long taem blong yumi, i no olgeta man we oli akseptem wota blong laef we i kamaot long Jeova. (Aesea 6:​10) Long Amageden, olgeta we oli jusum blong stap olsem we oli ded mo oli sik long saed blong spirit, bambae oli kam olsem sol, we i min se bambae oli ded blong olwe. (Revelesen 19:11-​21) Be, olgeta we oli gohed blong dring long wota blong laef, bambae oli gat hop blong stap laef mo luk we profet tok ya i kamtru fulwan.

Reva i Ron Insaed Long Paradaes

16. ?Wetaem mo olsem wanem bambae vison blong Esikel long saed blong tempel i kamtru laswan?

¹⁶ Olsem ol narafala profet tok long saed blong Isrel we i stanap bakegen, vison blong Esikel long saed blong tempel bambae i kamtru laswan long Rul blong Wan Taosen Yia. Long taem ya, bambae i no moa gat wan long ol pris long wol ya. “Olgeta ya bambae oli pris blong God mo blong Kraes, mo bambae oli joen wetem Kraes we hem i King [long heven], nao oli rul wetem hem, gogo wan taosen yia i pas.” (Revelesen 20:6) Ol pris ya blong heven, bambae oli joen wetem Kraes blong givim olgeta blesing we oli kamaot from ransom sakrefaes blong Kraes i kam long man. !Long rod ya, bambae God i sevem ol stret man, mo i mekem oli kam stret gud bakegen!​—Jon 3:​17.

17, 18. (a) ?Revelesen 22:​1, 2, i talem wanem long saed blong reva ya we i save givim laef, mo wetaem bambae vison ya i kamtru? (b) Long Paradaes, ?from wanem reva ya blong wota blong laef bambae i ron, i kam bigfala moa?

¹⁷ Long taem ya, reva we Esikel i luk bambae i ron i kam wetem wota ya blong laef we i gat bigfala paoa. Hemia stret taem we profet tok long Revelesen 22:​1, 2 i kamtru, se: “Nao enjel ya i soemaot wan bigfala reva long mi. Reva ya i stap ron, mo hem i wota blong laef. Hem i stap saen olsem glas, mo i stap kamaot long bigfala jea ya we God wetem Smol Sipsip blong hem, tufala i stap sidaon long hem. Wota ya i ron, i pas long medel blong rod blong bigfala taon ya. Mo long tufala saed blong hem, i gat ol tri blong laef, we oli stap karem frut blong olgeta, twelef taem long wan yia, wan taem long wan manis. Mo lif blong ol tri ya oli blong tekemaot sik blong ol man blong ol kantri long wol.”

¹⁸ Long Rul blong Wan Taosen Yia, olgeta sik​—long saed blong bodi, tingting, mo filing​—bambae oli finis. ‘Ol tri we lif blong olgeta i save tekemaot sik blong ol man blong olgeta kantri long wol,’ oli pija blong samting ya. From ol samting we Kraes mo ol 144,000 oli mekem long ol man, “bambae i no moa gat man olbaot long kantri ya we i save talem se hem i sik.” (Aesea 33:24) Mo long taem ya, bambae reva ya i ron bigwan. Bambae hem i ron bigfala mo i kam dip moa. Olsem nao, ol milyan man we bambae oli laef bakegen long ded, bambae oli save dring long wota ya blong laef we i klingud. Reva long vison blong Esikel i mekem Ded Si i kamgud bakegen, mo olgeta ples we reva ya i ron i go long hem, hem i mekem olgeta samting oli laef. Long Paradaes, ol man mo woman bambae oli laef fulwan olsem we God i wantem, mo bambae oli fri long ded blong Adam, sipos oli soemaot bilif long ol blesing we oli kasem from ransom. Revelesen 20:12 i talem se long taem ya, bambae “ol buk” oli open, blong mekem ol save oli kam moa klia. Olgeta we oli laef bakegen, bambae oli kasem blesing from ol save ya. Sore tumas, samfala man naoia mo long Paradaes tu, bambae oli no wantem blong kamgud bakegen. Ol man olsem, bambae oli kam ‘olsem sol,’ we i minim se bambae oli ded blong olwe.​—Revelesen 20:​15.

19. (a) ?Olsem wanem fasin blong seraotem graon bambae i kamtru long Paradaes? (b) ?Taon i pija blong wanem samting we bambae i kamtru long Paradaes? (c) ?Fasin ya we taon i stap longwe long tempel i minim wanem?

¹⁹ Long taem ya tu, fasin ya blong seraotem graon long vison blong Esikel bambae i kamtru laswan. Esikel i luk we oli seraotem gud graon ya. Long sem fasin, ol wanwan Kristin we oli stap tru long God oli sua se bambae oli gat wan ples, wan pis graon, long Paradaes. Maet, fasin we man i wantem gat wan prapa haos blong hem mo kea gud long haos ya bambae i kamtru folem gudfala oda. (Aesea 65:21; 1 Korin 14:33) Taon we Esikel i luk, i minim plan blong lukaot long ol wok we Jeova i gat tingting blong mekem long niufala wol. I no longtaem, bambae grup ya blong pris i no moa stap wetem ol man long wol ya. Vison ya i makem poen ya taem hem i soem se taon we i stap long graon we “i no tabu” i stap longwe long tempel. (Esikel 48:15) Nomata we ol 144,000 bambae oli rul wetem Kraes long heven, be King ya i gat sam man we oli wok long nem blong hem long wol. Ol bigfala blesing bambae oli kasem olgeta man blong Kraes long wol ya from we grup ya we i olsem jif, bambae oli rul long olgeta wetem lav. Be, prapa gavman bambae i stap long heven, i no long wol ya. Olgeta man long wol ya, wetem grup ya blong ol jif tu, bambae oli stap aninit long Kingdom blong Mesaea.​—Daniel 2:​44; 7:14, 18, 22.

20, 21. (a) ?From wanem taon ya i gat wan nem we i stret nomo? (b) Taem yumi kasem save long vison blong Esikel, ?samting ya i mas pusum yumi blong askem wanem kwestin?

²⁰ Makemgud ol laswan tok ya long profet tok blong Esikel: “I stat long taem ya i go, bambae yufala i talem nem blong taon ya, se ‘[Jeova] i stap long ples ya.’ ” (Esikel 48:35) Taon ya i no blong givim paoa no haenem long ol man. Hem i no wan taon blong mekem samting we wan man long wol ya i wantem. Hem i taon blong Jeova. Bambae taon ya i soemaot tingting blong Jeova, lav blong hem, mo ol rod blong hem we oli no strong tumas. (Jemes 3:​17) Samting ya i mekem se, long hat blong yumi, yumi sua se ol man we oli mekemap “niufala wol,” bambae Jeova i blesem olgeta gogo i no save finis.​—2 Pita 3:​13.

²¹ ?Yu yu harem gud tumas from hop we i stap long fored blong yumi? Sipos yes, i stret nomo we wanwan long yumi i askem ol kwestin ya se: ‘?Mi mi mekem wanem taem mi kasem save long ol nambawan blesing we vison blong Esikel i soemaot? ?Mi mi sapotem gud ol wok we ol elda blong smol kampani mo blong bigfala kampani we i olsem grup blong jif, oli stap mekem wetem lav? ?Mi mi mekem klin wosip i kam stamba samting long laef blong mi? ?Mi mi stap dring long wota blong laef we i stap ron i kam long yumi tede?’ !I gud we yumi evriwan i gohed blong dring long wota blong laef mo haremgud long ol blesing blong Jeova oltaem gogo i no save finis!

[Ol futnot]

?Bambae Yu Yu Ansa Olsem Wanem?

◻ ?Wota ya we i kamaot long tempel i pija blong wanem?

◻ ?Olsem wanem Jeova i yusum reva ya long vison, blong mekem ol man oli kam gud, mo from wanem reva ya i stap kam bigfala moa?

◻ ?Ol tri we oli stap klosap long reva oli pija blong wanem?

◻ ?Bambae taon i pija blong wanem long Wan Taosen Yia Rul, mo from wanem i stret nomo we taon ya i karem nem ya?

[Tok Blong Pija Long Pej 23]

Reva blong laef i pija blong rod we God i yusum blong sevem man