?Devel Setan i Mekem Yumi Sik?

SIK I NO STAP LONG PLAN BLONG GOD FASTAEM. God i wokem yumi blong laef foreva long wan gudfala helt. Spirit man ya, Setan, hem nao i stamba blong sik, fasin blong harem i soa, mo ded. Hem i mekem se ol trabol ya oli kasem olgeta man taem hem i pulum faswan papa mama blong yumi, Adam mo Iv, blong mekem sin.—JENESIS 3:​1-5, 17-​19; ROM 5:​12.

?SAMTING ya i minim se ol spirit man oli stamba blong olgeta sik we yumi kasem? Olsem yumi luk long faswan haf, plante man tede oli ting olsem. Bubu woman blong smol Owmadji, hem i gat tingting olsem. Be sik ya blong sitsit wota, we Owmadji i kasem​—we long ol hot ples, i save kilim ol smol pikinini oli ded​—?i rili kamaot long ol spirit we yumi no save luk?

Wok Blong Setan

Baebol i givim wan klia ansa long kwestin ya. Fastaem, hem i soem se ol spirit blong ol olfala bubu blong yumi oli no save mekem wan samting long olgeta we oli laef. Taem ol man oli ded, “oli no moa save wan samting.” Oli no gat wan spirit we i stap laef samples. Taem man i ded, i olsem we hem i stap slip nomo long beregraon. Long ples ya, “i no gat wok, mo tingting, mo save, mo waes.” (Prija 9:​5, 10) !Taswe, ol man we oli ded oli no save mekem olgeta we oli laef oli sik!

Be, Baebol i soemaot se ol rabis spirit oli rili stap. Faswan we i rebel agensem God, hem i wan spirit man we naoia yumi save nem blong hem se Setan. Sam narafala enjel oli joen wetem hem, mo yumi kolem olgeta se ol rabis spirit. ?Olsem wanem? ?Setan mo ol rabis enjel blong hem oli save mekem yumi sik? Yes, samting olsem i hapen finis. Sam long ol merikel we Jisas i mekem blong winim sik blong ol man, hemia taem hem i ronemaot ol rabis spirit long olgeta. (Luk 9:​37-​43; 13⁠:​10-​16) Be, plante sikman we Jisas i mekem olgeta oli kam gud bakegen, i no ol rabis spirit we i mekem olgeta oli sik. (Matiu 12⁠:15; 14⁠:14; 19⁠:⁠2) Samting ya i sem mak tede. Yumi save se sik i kamaot from ol samting raonabaot long yumi, i no from ol spirit man.

?Olsem wanem long ol man blong mekem kleva? Ol Proveb 18⁠:​10 (NW), i talem klia se: “Nem blong Jeova i olsem wan strong haos. Ol stret man oli resis blong go haed long hem, nao hem i lukaot long olgeta.” Jemes 4⁠:7 i talem se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.” Yes, God i save protektem ol trufala man blong hem long ol man blong mekem kleva mo ol narafala paoa we oli joen wetem rabis spirit. Hemia i laenap wetem tok ya blong Jisas se: “Trutok ya bambae i mekem yufala i fri man.”​—Jon 8:​32.

Maet samfala man oli askem se: ‘?Olsem wanem long Job? ?I no ol rabis spirit we oli mekem hem i sik?’ Si, Baebol i talem se Setan i mekem Job i sik. Be i gat spesel risen biaen long samting we i kamaot long Job. Longtaem finis, God i stap protektem Job long ol rabis spirit. Nao, Setan i tok agensem Jeova blong hem i mekem se Job i kasem bigfala sik. From we i gat sam impoten kwestin blong ansarem, Jeova i no moa protektem man ya we i stap mekem wosip long hem.

Be, God i no letem traem ya i go bitim mak. Taem hem i letem Setan blong mekem trabol long Job, Setan i save mekem Job i sik blong smol taem, be i no save kilim hem i ded. (Job 2⁠:​5, 6) Biaen, ol trabol soa we Job i kasem oli finis, mo Jeova i blesem hem bigwan from strong bilif blong hem. (Job 42⁠:​10-​17) Bigfala poen we Job i pruvum taem hem i holem strong long God, ol man oli raetemdaon i stap long Baebol blong longtaem finis, mo olgeta man oli save stori ya. I no nidim wan narafala traem bakegen long saed ya.

?Olsem Wanem Setan i Wok?

Wan samting nomo we yumi save talem se Setan i mekem blong givim sik long yumi, hemia taem hem i pulum faswan man mo woman blong foldaon long sin. Setan mo ol rabis enjel blong hem oli no stamba blong evri sik we oli kamaot. Nogat. Be, yumi save se Setan nao i stap traem pulum yumi blong no mekem ol waes disisen mo blong lego bilif blong yumi. Ale, from samting ya nao, maet biaen, yumi kasem problem long helt blong yumi. Setan i no bin mekem nakaemas long Adam mo Iv, mo hem i no kilim tufala i ded no mekem tufala i sik. Nogat. Hem i pulum Iv blong lego God, mo Adam i folem woman ya blong no obei. Sik mo ded hemia risal blong aksin ya blong tufala.​—Rom 5:​19.

Wan taem, ol man Isrel oli kam stap klosap long kantri blong Moab, nao king blong Moab i fraet tumas. Ale, hem i pem profet ya Balam we i no stap tru long God, blong singaot trabol i kam long nesen blong Isrel. Balam i traem singaot trabol i kam long Isrel, be hem i no save mekem from we nesen ya i stap aninit long han blong Jeova. Nao ol man Moab oli pulum ol man Isrel blong wosip long aedol mo blong mekem nogud long saed blong seks. Long rod ya, oli winim ol man Isrel, nao Jeova i no moa protektem olgeta.​—Namba 22:​5, 6, 12, 35; 24⁠:10; 25:​1-9; Revelesen 2:​14.

Yumi save lanem wan impoten samting long stori ya blong bifo. Ol trufala man blong wosip long God, God i protektem olgeta blong ol rabis spirit oli no mekem trabol long olgeta stret. Be, maet Setan i pulum wanwan long olgeta blong lego bilif blong olgeta. Maet hem i traem blong pulum olgeta blong mekem nogud long saed blong seks. No, olsem wan laeon, maet hem i traem mekem oli fraet, nao oli mekem wan samting we i mekem se God i no moa protektem olgeta. (1 Pita 5⁠:⁠8) Hemia nao risen from wanem aposol Pol i kolem Setan se, man “we i holem paoa blong ded.”​—Hibrus 2:​14.

Olfala bubu woman blong Owmadji i traem blong pulum Hawa blong yusum sam bidbid mo ston olsem wan rod blong blokem sik. ?Wanem bambae i hapen sipos Hawa i mekem olsem? Hem i soem se hem i no trastem Jeova God nating, mo hem i no moa save sua se bambae Jeova i protektem hem.​—Eksodas 20⁠:5; Matiu 4:​10; 1 Korin 10⁠:21.

Setan i traem blong pulum Job tu. Setan i mekem se Job i lusum famle blong hem, ol rij samting blong hem, i spolem helt blong hem. Antap long hemia, waef blong hem i givim nogud advaes long hem taem i talem se: “?From wanem tingting blong yu i stap strong yet long God olsem? !I moa gud yu tok nogud long hem blong yu yu ded!” (Job 2⁠:⁠9) Biaen, trifala “fren” i kam visitim hem, mo trifala i talem strong long hem se hem i sik from we i mekem fasin nogud. (Job 19:​1-3) Long rod ya, Setan i yusum trabol we Job i kasem blong traem mekem tingting blong hem i foldaon mo blong spolem fasin blong hem blong trastem stret fasin blong Jeova. Be, Job i gohed blong dipen long Jeova olsem hop ya nomo we hem i gat.​—Skelem wetem Ol Sam 55⁠:⁠22.

Taem yumi sik, maet tingting blong yumi tu i foldaon. Long taem olsem, Setan i hareap blong traem pulum yumi long sam rod we i save mekem yumi lego bilif blong yumi. Taswe, taem yumi sik, i impoten blong tingbaot se yumi stap safa from we yumi bon wetem sin be i no from rabis paoa blong ol spirit. Rimemba se Aesak we i wan trufala man blong God, hem i blaen sam yia bifo we hem i ded. (Jenesis 27⁠:⁠1) Hemia i no from ol rabis spirit, be from we hem i olfala. Rejel i ded taem hem i bonem pikinini blong hem, i no from Setan, be from we bodi blong hem i no strong. (Jenesis 35⁠:​17-​19) Mo tu, olgeta trufala man blong God bifo, oli ded​—i no from nakaemas no rabis spirit be from from sin we oli bon wetem.

I wan bigfala trap sipos yumi gat tingting se evri sik we oli kasem yumi oli kamaot long ol rabis spirit. Tingting ya i save mekem se yumi fraet long ol rabis spirit. Nao, taem yumi sik, bambae tingting ya i pulum yumi blong traem kwaetem ol rabis spirit i bitim we yumi stap longwe long olgeta. Sipos Setan i save mekem yumi fraet, nao yumi mekem ol fasin we oli joen wetem rabis spirit, i olsem we yumi gowe finis long trufala God, Jeova. (2 Korin 6:​15) Yumi mas letem gudfala fasin blong fraet gud long God i lidim yumi. Yumi no mas letem fasin blong fraet long Enemi blong Jeova i winim yumi.​—Revelesen 14⁠:⁠7.

Smol Owmadji i gat beswan samting finis blong protektem hem agensem ol rabis spirit. Tok blong aposol Pol i soemaot se, long tingting blong God, Owmadji hem i “tabu,” from we mama blong hem i gat bilif. Taswe, mama ya i save prea long God mo askem tabu spirit blong stap wetem smol gel blong hem. (1 Korin 7:​14) From we Hawa i gat stret save long God, hem i save lukaot wan stret meresin blong winim sik blong Owmadji, bitim we hem i dipen long ol bidbid.

Stamba Blong Ol Defren Sik

Plante man oli no bilif se i gat ol spirit man. Taem oli sik, oli go luk dokta​—⁠sipos oli gat inaf mane blong pem dokta. I tru, samtaem wan sikman i go luk dokta be sik blong hem i no finis. Ol dokta oli no save mekem merikel. Be plante man we oli fraet long ol rabis spirit, oli go luk dokta taem i let finis. Oli go luk kleva fastaem, nao taem kleva i no winim sik blong olgeta, oli go luk dokta. Plante long olgeta oli ded, we i no gat nid blong oli ded.

Sam narafala, oli ded wantaem from we oli no save se oli gat wan sik. Oli no luksave ol saen blong sik ya mo oli no save wanem samting oli mas mekem blong winim sik ya. Taem yumi save se yumi kasem wan sik, save ya i givhan long yumi blong no safa we yumi no nidim. I gud blong makem se ol mama we oli skul oli no lusum plante pikinini from sik, olsem ol mama we oli no go long skul. Yes, yumi save ded from sik we yumi no save se i stap long bodi blong yumi.

Wan narafala samting we i mekem yumi sik, hemia taem yumi no lukaotgud long olgeta. Eksampel, plante oli sik from we oli letem ol bebet oli wokbaot long kakae bifo we oli kakae mo maet hemia we i stap mekem kakae i no wasem han blong hem fastaem. Sipos man i no slip long moskito net long ol ples we i gat malaria, samting ya tu i denja.a Long saed blong helt, plante taem tok ya i tru se, “blong blokem wan sik i moa gud bitim we yu stap traehad blong winim.”

Plante milyan man oli sik mo oli ded taem oli no olfala yet, from we oli folem wan fasin blong laef we i no waes. Plante man, fasin blong dring tumas, slip olbaot, yusum drag, mo tabak, i spolem helt blong olgeta. Sipos wan man i gohed long ol fasin ya, nao i kam sik, ?yu ting se i stret blong talem se wan man i mekem nakaemas long hem, no wan rabis spirit i spolem hem? Nogat. Hem nomo i mekem se sik ya i kasem hem. Sipos yumi blemem ol rabis spirit, hemia i minim se yumi no akseptem se trabol ya i kamaot from we yumi folem wan fasin blong laef we i no waes.

I tru, i gat sam samting we yumi no save bos long olgeta. Eksampel, yumi save kasem ol jem we oli givim sik mo pulum doti win. Hemia nao samting we i hapen long Owmadji. Mama blong hem i no save se wanem nao i mekem se Owmadji i kasem sitsit wota. Ol pikinini blong hem oli no stap sik oltaem olsem ol narafala pikinini from we oltaem, hem i klinim gud haos mo yad blong hem mo oltaem, hem i wasem han blong hem bifo we i rerem kakae. Be wantaem nomo, ol pikinini ya, evriwan oli sik. I gat samwe 25 defren jem we oli save mekem man i kasem sitsit wota. Maet, i no gat wan man i save talem se weswan long ol jem ya we i mekem se Owmadji i sik.

Winim Sik Blong Olwe

God i no stamba blong ol sik. “I no gat samting nogud we i save pulum God blong mekem hem i gorong. Mo i no fasin blong God blong pulum man blong mekem hem i foldaon long sin.” (Jemes 1:​13) Sipos wan man blong Jeova i sik, Jeova i givhan long hem long saed blong spirit. “Taem oli sik, hem bambae i givhan long olgeta i mekem olgeta oli oraet bakegen.” (Ol Sam 41⁠:⁠3) Yes, God i gat sore. Hem i wantem givhan long yumi, i no blong mekem yumi harem nogud.

Yes, Jeova i gat wan rod blong winim ol sik blong olwe​—⁠rod ya, hemia taem Jisas i ded mo i laef bakegen. Tru long ransom sakrefaes blong Jisas, hem i pemaot olgeta we hat blong olgeta i stret, i mekem oli fri long sin, mo biaen, bambae oli no moa sik, mo oli laef blong olwe long paradaes long wol ya. (Matiu 5⁠:5; Jon 3:​16) Ol merikel we Jisas i mekem oli soem trufala fasin blong winim sik we bambae Kingdom blong God i mekem. Mo tu, bambae God i tekemaot Setan mo ol rabis enjel blong hem. (Rom 16⁠:20) Tru ya, Jeova i gat ol nambawan samting we bambae hem i givim long olgeta we oli soemaot bilif long hem. Samting we yumi mas mekem, hemia blong gat longfala tingting mo blong stanap strong longtaem.

Naoia, God i stap yusum Baebol mo ol man blong Jeova raonabaot long wol blong givim waes we i wokgud mo blong soem rod long saed blong spirit. Hem i soem long yumi olsem wanem blong blokem ol nogud fasin we oli save mekem problem long helt blong yumi. Mo hem i givim ol trufala fren long yumi, we bambae oli halpem yumi taem yumi kasem problem.

Tingbaot Job bakegen. !I nogud olgeta sipos Job i bin go luk wan kleva! Sipos hem i bin mekem olsem, bambae God i no moa protektem hem, mo bambae hem i lusum olgeta blesing we bambae hem i kasem afta long strongfala traem we hem i kasem. God i no fogetem Job, mo bambae hem i no fogetem yumi tu. Disaepol Jemes i talem se: “Yufala i harem finis tok blong fasin blong Job, we hem i mekem tingting blong hem i longfala. Mo yufala i save finis ol samting we Hae God i mekem long hem biaen.” (Jemes 5:​11) Sipos yumi no lego, yumi tu bambae yumi kasem ol nambawan blesing blong God long stret taem blong hem.

?Wanem i hapen long smol Owmadji? Mama blong hem i tingbaot wan haf insaed long Wekap!, wan magasin we oltaem, i kamaot wetem Wajtaoa. Haf ya i soem sam rod blong no lusum tumas wota long bodi.b Hem i folem olgeta advaes ya mo i meksemap meresin blong Owmadji i dring. Naoia smol gel ya i kam gud mo i gat gudfala helt.

[Ol futnot]

[Tok Blong Pija Long Pej 7]

Jeova i mekem plan finis blong winim ol sik blong olwe