2000—?Wan Spesel Yia?
?I GAT wan samting we i spesel long saed blong yia ya 2000? Ol man long ol kantri blong Wes oli tingbaot yia ya olsem faswan yia blong namba tri mileniam. Oli mekem ol bigfala plan finis blong mekem lafet long taem ya. Oli stanemap ol bigfala klok we oli wok wetem lektrik blong kaontem ol laswan seken go kasem we niufala mileniam i stat. Ol man oli rerem sam spesel danis we bambae oli mekem long Niufala Yia ya. Ol smolsmol stoa long bus wetem ol bigfala stoa long taon oli salem ol sot we oli raetem toktok long saed blong en blong mileniam ya.
Ol bigfala jos mo ol smol wan tu, oli joen long lafet ya we bambae i gohed blong ful yia. Long stat blong nekis yia, Pop John Paul 2 i plan blong lidim ol man Katolik oli go long Isrel blong joen long wanem we oli kolem “lafet blong Katolik Jos blong makem jubili blong mileniam.” Ol man oli talem se, maet bambae i gat tu mo haf milyan go kasem sikis milyan turis we oli plan blong visitim Isrel nekis yia—sam long olgeta ya oli man we oli strong long saed blong skul blong olgeta, mo samfala bambae oli go blong lukluk nomo.
?From wanem fulap man oli plan blong visitim Isrel? Roger Cardinal Etchegaray, wan man blong Vatikan, i talemaot tingting blong pop, i se: “Yia ya 2000 i wan lafet blong tingbaot Kraes mo laef blong hem long kantri ya. Taswe i stret nomo we Pop i kam long ples ya.” ?Olsem wanem yia 2000 i laenap wetem Kraes? Ol man oli ting se yia ya 2000 i makem stret 2,000 yia stat long taem we Kraes i bon. ?Be samting ya i tru? Bambae yumi luk.
Yia ya i impoten tumas long ol memba blong sam jos. Olgeta ya oli sua se samtaem long nekis yia, bambae Jisas i kambak long Hil blong ol Oliftri mo faet blong Amageden, we buk blong Revelesen i tokbaot, bambae i kamaot long level ples blong Megido. (Revelesen 16:14-16) Blong mekemrere from spesel taem ya, plante handred man long Yunaeted Stet oli salem haos blong olgeta mo olting blong olgeta, mo oli muf i go long Isrel. Blong givhan long olgeta we oli no save lego ol haos blong olgeta, wan prija long Yunaeted Stet i promes blong soem Jisas long televisin, taem hem i kambak—!long kala!
Long ol kantri blong Wes, ol plan blong statem yia 2000 oli kam strong moa. Be, ol man long ol narafala kantri blong wol, oli stap gohed nomo wetem laef blong olgeta evri dei. Ol man ya—we oli mekemap bighaf blong ol man long wol—oli no bilif se Jisas blong Nasaret, hem i Mesaea. Mo oli no agri tu long fasin blong kaontem ol yia wetem B.K.T. mo K.T. Eksampel blong samting ya, hemia se plante Muslim oli stap yusum prapa kalenda blong olgeta, we i soemaot se nekis yia hem i yia 1420—i no 2000. Ol Muslim oli kaontem ol yia i stat long yia ya we profet Muḥammad i ronwe i aot long Meka i go long Medina. Long ful wol, ol man oli yusum samwe long 40 defren kalenda.a
?Yia ya 2000 i impoten long tingting blong ol Kristin? ?Janewari 1, 2000, i rili wan spesel dei? Bambae yumi tokbaot ol kwestin ya long nekis haf.
[Futnot]
a Plante man oli makemaot ol yia wetem tufala tok ya “B.C.” mo “A.D.” Faswan, “B.C.” (long Engglis, before Christ) i stret long ol yia bifo we Jisas i bon; mo oli yusum tok ya “A.D.” (Anno Domini—“long yia blong Masta blong yumi”) blong makemaot ol yia afta we Jisas i bon. Be, sam man blong save, oli laekem moa blong yusum tufala tok ya “B.C.E.” (before our Common Era) mo “C.E.” (of our Common Era.) Long Bislama, mifala i yusum “B.K.T.” (Bifo Kristin Taem) mo “K.T.” (Kristin Taem).