Wan Kwestin

?Wanem Tingting Blong Ol Witnes Blong Jeova Long Saed Blong Vot?

Baebol i givim ol klia rul we oli givhan long ol man blong God blong gat stret tingting long saed blong kwestin ya. Be, i luk olsem se i no gat wan stret rul agensem fasin blong vot. Eksampel, i no rong sipos wan komiti blong ol daerekta oli vot taem oli mas mekem sam disisen long saed blong kampani blong olgeta. Plante taem ol kongregesen blong ol Witnes blong Jeova oli mas mekem disisen long saed blong taem blong miting mo fasin blong yusum mane blong kongregesen. Blong mekem olsem oli putumap han blong olgeta blong vot from samting we oli wantem.

Be, ?olsem wanem blong vot long wan eleksen long saed blong politik? I tru se, long sam demokratik kantri, bitim 50 pesen blong ol man oli no kam blong vot long dei blong eleksen. Long saed blong ol Witnes blong Jeova, oli no blokem raet blong narafala man blong vot; mo oli no mekem ol bigfala toktok blong pulum ol man blong agensem ol eleksen. No gat. Ol Witnes oli gat respek mo oli wokgud wetem gavman we ol man oli jusum tru long vot blong olgeta long taem blong eleksen. (Rom 13:​1-7) Long saed blong kwestin ya se bambae oli vot long wan kandidet no nogat, ol wanwan Witnes blong Jeova oli mas mekem disisen blong olgeta. Be disisen ya i mas stanap long tingting we olgeta wanwan oli bin trenem folem Baebol, mo save we oli gat long saed blong wok we wanwan man i gat long fored blong God mo gavman. (Matiu 22:21; 1 Pita 3:​16) I gat sam defren samting we ol Witnes oli tingbaot blong mekem prapa disisen blong olgeta.

Faswan samting, Jisas Kraes i tokbaot ol man blong hem se: “Olgeta oli no man blong wol, olsem we mi mi no man blong wol.” (Jon 17:14) Ol Witnes blong Jeova oli tinghae long rul ya. From we oli “no man blong wol,” samting ya i minim se oli no joen long ol bisnes blong politik blong wol ya.​—Jon 18:36.

Namba tu samting, aposol Pol i tokbaot hem wan olsem wan “ambasada” we i wok long nem blong Kraes long fored blong ol man long taem blong hem. (Efesas 6:​20; 2 Korin 5:​20, NW) Ol Witnes blong Jeova oli bilif se naoia Jisas Kraes i sidaon long jea blong hem finis, olsem King long Kingdom blong God long Heven. Mo olgeta, we oli olsem ol ambasada, oli mas talemaot nius ya long ol nesen. (Matiu 24:14; Revelesen 11:15) Ol ambasada oli save se taem gavman blong olgeta i sanem olgeta i go long wan kantri, oli no mas joen long ol problem blong kantri ya. Ol Witnes blong Jeova oli harem se olgeta tu oli mas mekem sem mak. Oli no save joen long politik blong kantri we oli stap long hem, from we oli wok long nem blong Kingdom blong God we i stap long Heven.

Namba tri poen blong tingbaot, hemia se taem yu vot from wan kandidet, eni samting we man ya i mekem, bambae i responsabiliti blong yu tu. (Skelem wetem 1 Timoti 5:​22, The New English Bible.) Ol Kristin oli mas tingtinggud fastaem, sipos oli rili wantem tekem responsabiliti ya.

Namba fo samting, ol Witnes blong Jeova oli tinghae bigwan long Kristin fasin joengud we i stap bitwin long olgeta. (Kolosi 3:​14) Taem wan jos i joen long politik, plante taem risal blong samting ya, hemia se ol memba blong hem oli seraot. Ol Witnes blong Jeova oli folem eksampel blong Jisas Kraes. Oli no joen nating long politik, mo long rod ya oli save holemtaet Kristin fasin joengud.​—Matiu 12:25; Jon 6:​15; 18:36, 37.

Namba faef mo laswan poen hemia se, ol Witnes blong Jeova oli stap longwe long politik, taswe i no gat samting i blokem olgeta blong tokbaot impoten mesej blong Kingdom long enikaen man, nomata wanem pati blong politik we ol man ya oli joen long hem.​—Hibru 10:35.

From ol rul ya blong Baebol, we yumi jes tokbaot, ol Witnes blong Jeova long plante kantri oli mekem prapa disisen blong olgeta blong no vot long ol eleksen blong politik, mo loa blong kantri ya i sapotem raet blong olgeta blong mekem disisen ya. Be, ?olsem wanem sipos loa i talem se man i mas vot? Sipos i olsem, ol wanwan Witnes oli mas mekem disisen blong olgeta we i stanap long tingting we oli trenem folem Baebol. Sipos wan man i jus blong go long ofis blong vot, hemia disisen blong hem. Wanem we hem i mekem long ofis blong vot i bisnes blong hem mo God.

Wajtaoa long Engglis blong Novemba 15, 1950, pej 445 mo 446, i talem se: “Long ol kantri we Sisa i putumap loa se evriwan i mas vot . . . [ol Witnes] oli save go long ofis blong vot. Long ples ya oli askem ol man blong makem pepa blong vot blong olgeta blong soemaot jus blong olgeta. Ol man blong vot oli fri blong mekem wanem we oli wantem mekem wetem pepa ya. Ale long ples ya, long fored blong God, ol witnes blong hem oli mas mekem samting we i laenap wetem ol loa blong hem mo bilif blong olgeta. I no bisnes blong yumi blong talem long olgeta wanem oli mas mekem wetem pepa blong vot.”

?Olsem wanem sipos wan hasban we i no bilif i talem strong long Kristin waef blong hem se hem i mas go vot? I tru se hem i mas obei long hasban blong hem, olsem we ol Kristin oli mas obei long gavman. (Efesas 5:​22; 1 Pita 2:​13-​17) Sipos hem i obei long hasban blong hem mo hem i go long ples blong vot, hemia prapa disisen blong hem wan. I no gat man i mas tok agens long hem from.​—Skelem wetem Rom 14:4.

?Olsem wanem long wan kantri we oli no putumap loa ya se evriwan i mas vot, be ol man oli agensem bigwan olgeta we oli no go long ples blong vot? Maet from samting ya laef blong olgeta i stap long denja. Mo, ?olsem wanem long ol man we oli kasem strong panis sipos oli no go long ples blong vot, nating se i no gat loa we i talem se evriwan i mas vot? Long ol samting olsemia, wan Kristin i mas mekem prapa disisen blong hem wan. “Evri man i gat basket blong hem blong karem.”​—Galesia 6:​5, Niu Testeman long Bislama.

Maet i gat sam man we oli trabol sipos oli luk se long taem blong eleksen long kantri blong olgeta, sam Witnes blong Jeova oli go long ples blong vot mo sam narafala Witnes oli no go. Maet oli talem se, ‘Bilif blong ol Witnes blong Jeova i olbaot nomo.’ Be, ol man oli mas luksave se long ol taem olsemia, we wanwan man i mas yusum prapa tingting blong hem, ol Kristin wanwan oli mas mekem disisen blong olgeta fored long Jeova God.​—Rom 14:12.

Nomata wanem disisen we ol wanwan Witnes blong Jeova oli mekem long saed blong ol defren kwestin ya, be oli mas lukaotgud blong holemtaet Kristin fasin blong no joen long politik mo no spolem fasin fri we oli gat blong talemaot mesej blong olgeta. Oli trastem Jeova God blong mekem tingting blong olgeta i strong, blong givim waes long olgeta, mo blong halpem olgeta blong no mekem wan samting we i agensem bilif blong olgeta. Long rod ya, oli soemaot se oli trastem tok blong man we i raetem Sam: “Yu nao yu sefples blong mi, yu nomo yu strong ples blong mi blong haed. Plis yu go fastaem, yu lidim mi, from we yu nao yu sefples blong mi.”​—Ol Sam 31:3.