Baebol i Ansa Long Ol Impoten Kwestin Blong Taem Blong Yumi

?BAEBOL i stret long laef blong yumi tede? Sipos yumi ansa se yes, hemia i min se olfala buk ya i naf blong givim advaes we ol man tede, oli intres long hem mo we oli stret wetem laef blong olgeta. ?Baebol i givim ol gudfala advaes long saed blong ol samting we oli rili impoten long laef blong wol tede?

Bambae yumi tokbaot tu problem we oli stap long wol tede. Taem yumi mekem olsem, bambae yumi luk wanem we Baebol i talem long saed ya.

?From Wanem God i Letem Man i Safa?

Ol trabol we oli stap hapen long wol tede, oli mekem man i askem kwestin ya oltaem se: ?From wanem God i letem ol gudfala man oli safa? I stret nomo we man i askem kwestin ya, from we naoia plante moa man oli stap safa from raf fasin, kruked fasin, fasin blong kilim i ded wan ful laen blong man, bigfala trabol long laef, mo plante narafala trabol bakegen.

Eksampel, long Jun 1998, long not blong Jemani, wan tren i bangem wan brij mo i kilim i ded bitim wan handred man. Ol dokta mo ol faeaman we oli traem sevem olgeta we oli kasem kil mo faenem dedbodi blong ol man, oli harem nogud from bigfala trabol ya. Wan bisop blong Jos blong ol Evanjelis i askem se: “God blong mi, ?From wanem samting olsem i mas hapen?” Bisop ya i no naf blong givim wan ansa.

Ol samting we oli hapen finis oli soem se, taem ol man oli safa bigwan we i no gat risen from, oli stat tingting nogud long saed blong God. Long taem ya nao, Baebol i save givhan. Baebol i save eksplenem from wanem ol man we oli stap gud nomo, oli kasem trabol mo oli safa.

Taem Jeova God i wokem wol mo ol samting we oli stap long hem, hem i no gat tingting blong mekem man i trabol from rabis fasin mo fasin blong safa. ?Olsem wanem yumi sua long samting ya? Hemia from we taem God i wokem olgeta samting, ‘hem i luk we olgeta wok ya oli gud we i gud tumas.’ (Jenesis 1:​31) Askem kwestin ya long yu wan se, ‘?Sipos mi luk wan samting we i rabis, bambae mi save talem se samting ya i “gud tumas”?’ !No gat! Long sem fasin, taem God i talem se olgeta samting oli “gud tumas,” i minim se i no gat rabis fasin i stap long wol. Taswe, ?wetaem mo olsem wanem, rabis fasin i stat?

Smoltaem afta we God i wokem faswan papa mo mama blong yumi, Adam mo Iv, wan spirit man we i gat bigfala paoa i kam long Iv mo i tok agensem Jeova se Hem i man blong giaman mo Hem i no gat raet blong rul long man. (Jenesis 3:​1-5) Biaen, enjel ya Devel Setan, i strong blong talem se ol man bambae oli no save stap tru long God taem oli kasem trabol. (Job 2:​1-5) ?Jeova i mekem wanem blong stretem bisnes ya? Hem i letem taem i pas blong pruvum se taem ol man oli lego hem, oli no naf blong bos long prapa laef blong olgeta long fasin we i stretgud. (Jeremaea 10:23) Taem ol man oli brekem ol loa mo rul blong God, oli kasem frut blong samting ya hemia sin, we biaen i karem plante nogud trabol i kam. (Prija 8:9; 1 Jon 3:4) Be, nating se i gat hadtaem olsem, Jeova i save se i gat sam man we bambae oli holemstrong long hem.

Stat long taem ya we faswan man mo woman oli rebel agensem God long Iden, 6000 yia i pas finis. ?Taem ya i longfala tumas? Jeova i save spolem Setan mo ol stronghed man blong hem, plante handred yia bifo finis. Be, ?yu no ting se i moagud we hem i wet go kasem we ol man oli luksave raet we Jeova i gat blong rulum ol man mo blong luk sipos i gat sam man we bambae oli holemstrong long hem? Tede tu, samtaem i nidim plante yia blong kot i jajem wan bisnes blong pruvum se hu i gat raet mo hu i rong.

From ol impoten kwestin we oli stanap long saed blong Jeova mo ol man​—raet blong rulum heven mo wol mo hu i save holemstrong long God​—i rili waes tumas blong letem taem i pas. Naoia yumi luksave klia wanem i hapen taem ol man oli no wantem obei long ol loa blong God mo taem oli lidim prapa laef blong olgeta. Ol nogud frut we oli kamaot hemia rabis fasin long olgeta ples. Mo hemia from wanem plante gudfala man oli stap safa tede.

Be yumi glad from we Tok blong God i eksplenem se rabis fasin bambae i no save stap blong olwe. Yes, i no longtaem Jeova bambae i finisim ol trabol mo olgeta we oli stamba blong ol trabol ya. Ol Proveb 2:​22 i talem se: “Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smolsmol tri long garen.” Defren olgeta, ol man we oli bilif long God oli stap wet long taem ya we klosap nao, bambae “i no moa gat man i ded, mo . . . bambae i no moa gat man i krae, mo bambae man i no moa harem nogud long bodi blong hem.”​—Revelesen 21:4.

Taswe, Baebol i eksplenem klia from wanem ol gudfala man oli stap safa. Mo tu, Baebol i leftemap tingting blong yumi se klosap, rabis fasin mo fasin blong safa bambae oli lus. Be, from we yumi kasem ol traem long laef blong yumi, yumi nidim blong ansa long wan narafala impoten kwestin.

?Wanem Mining Blong Laef?

Long ol handred yia we oli pas ol man oli traehad oltaem blong faenem mining blong laef. Be, tede, kwestin ya i impoten moa long tingting blong olgeta i winim bifo. Plante man oli stap askem long olgeta wan se: ‘?From wanem mi stap laef? ?Olsem wanem mi save faenem mining blong laef blong mi?’ Ol defren kaen samting we oli stap hapen long laef blong man i pusum olgeta blong askem ol kwestin ya.

Maet wan bigfala trabol i kamaot long laef blong wan man, mo i spolem hem olgeta. Eksampel, long stat blong 1998, long Bavaria, Jemani, sam man oli karemaot wan smol gel blong 12 yia long famle blong hem, nao oli kilim hem i ded. Wan yia biaen, mama blong gel ya i talem se stat long taem ya i kam, hem i stap spenem evri dei blong traem faenem mining blong laef​—be hem i no faenem ansa. Sam yangfala oli wantem save mining blong laef tu. Oli wantem gat wan laef we i sefgud, oli wantem mekem samting we i gat mining, mo oli wantem joengud wetem ol man, be sore tumas, tingting blong olgeta i foldaon from we ol man raonabaot long olgeta oli gat tu fes mo oli fulap long kruked fasin. Sam narafala man oli putum ful laef blong olgeta long wok, be oli luksave se paoa, haenem, mo ol samting long saed blong bodi, oli no save mekem man i glad, mo oli no save halpem olgeta blong faenem mining blong laef.

Nomata wanem samting i pusum wan man blong askem kwestin long saed blong mining blong laef, kwestin ya i nidim wan gudfala ansa. Bakegen, Baebol i save givhan. Hem i soem se Jeova i wan God blong mekem ol stamba tingting blong hem oli kamtru, hem i wan God we i gat wan risen biaen long evri samting we hem i wokem. Tingbaot, ?Bambae yu wokem wan haos sipos yu no gat wan gudfala risen? Ating yu no save mekem olsem from we blong wokem wan haos i nidim mane mo hem i save tekem plante manis no plante yia. Sipos yu wokem wan haos, hemia from we yu no wan narafala man i save stap long hem. I sem mak wetem Jeova. Hem i no traehad blong wokem wol mo ol samting we oli laef long hem, sipos hem i no gat wan gudfala risen, no wan mak, biaen long hem. (Skelem wetem Hibrus 3:4.) ?Wanem stamba tingting blong God long saed blong wol?

Profet tok blong Aesea i tokbaot Jeova se: “Hem nao i God. Hem i wokem wol ya, mo i mekem i strong, blong i save stap longtaem. Taem hem i mekem, hem i no mekem blong i ples nating nomo, hem i mekem blong man i save stap long hem.” (Aesea 45:18) Yes, stat long taem ya we Jeova i wokem wol, stamba tingting blong hem hemia se ol man oli stap long hem. Ol Sam 115:16 i talem se: “Heven i ples blong Hae God nomo, be wol ya, hem i givim long man.” Taswe, Baebol i soemaot se Jeova i wokem wol ya blong ol gudfala man oli stap long hem, mo blong oli lukaotgud long hem.​—Jenesis 1:​27, 28.

Taem Adam mo Iv tufala i mekem stronghed, ?Jeova i jenisim stamba tingting blong hem? No gat. ?From wanem yumi sua long samting ya? Tingbaot poen ya: Man i raetem Baebol plante taosen yia afta we Adam mo Iv tufala i mekem stronghed long Iden. Sipos God i lego stamba tingting we hem i gat fastaem, ?from wanem oli no raetem samting ya long Baebol? Ansa i klia nomo se, stamba tingting blong God long saed blong wol mo ol man i no jenis.

Mo tu, stamba tingting blong Jeova i neva save foldaon. Tru long profet Aesea, God i givim promes ya: “Tok blong mi i olsem sno mo ren, we i aot long skae, i folfoldaon long graon blong wasem ol ples, blong mekem ol garen oli gru gud, nao i gat plante kakae i stap blong ol man oli kakae, mo blong oli planem garen bakegen. Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”​—Aesea 55:10, 11.

Samting We God i Wantem Yumi Blong Mekem

Yumi save trastem stamba tingting blong God long saed blong ol gudfala man we oli mas stap blong olwe long wol ya. I klia se hem i mas kamtru. Sipos yumi wantem gat jans blong laef blong olwe long wol, yumi mas folem advaes blong waes King Solomon taem hem i talem se: “Yu mas tinghevi long God, yu mas ona long hem, mo yu mas obei long ol tok blong hem, from we hemia nao samting we hem i mekem yumi from.”​—Prija 12:13; Jon 17:3.

Man we i mekem laef blong hem i laenap wetem stamba tingting blong God i min se man ya i kasem save long saed blong trufala God mo i folem ol samting we oli stap long Tabu Baebol. Sipos yumi mekem samting ya naoia, yumi save gat hop blong laef olwe long wan paradaes long wol, we bambae yumi gohed blong lanem ol niufala samting long saed blong God mo ol naesfala samting we hem i wokem. (Luk 23:43) !Jans ya i mekem yumi haremgud tumas!

Plante man we oli wantem faenem mining blong laef, oli lukluk i go long Baebol mo oli kasem bigfala glad naoia. Eksampel, wan yangfala man we nem blong hem Alfred i no save faenem mining blong laef. Hem i no laekem nating ol skul we oli joen long faet, mo hem i harem nogud from fasin tu fes mo kruked fasin we hem i luk long politik. Alfred i go luk ol Indian we oli stap laef long Not Amerika from we hem i gat hop blong kasem moa save long saed blong mining blong laef. Alfred i no faenem ansa, mekem se tingting blong hem i foldaon bigwan, ale hem i gobak long Yurop. Hem i lusum hop, ale, hem i stat tekem drag mo hem i lesin long ol rabis myusek. Be biaen, from we Alfred i stat stadi long Baebol oltaem, samting ya i halpem hem blong luksave mining blong laef we i karem trufala glad.

Wan Gudfala Laet Blong Rod Blong Yumi

Taswe, ?yumi save talem wanem naoia, long saed blong Baebol? ?Hem i stret long taem blong yumi? Yes, from we hem i givim advaes long saed blong ol problem blong tede. Baebol i eksplenem se God i no stamba blong ol rabis fasin. Baebol i halpem yumi blong faenem wan gudfala mining long laef. Mo tu, Baebol i talem plante narafala samting bakegen we man i intres long hem mo we i save halpem man tede. Baebol i tokbaot olgeta samting ya, olsem mared, fasin blong tijim pikinini, fasin joengud bitwin ol man, mo hop blong ol dedman.

Jekemap ol tok we oli stap long Baebol, sipos yu no mekem samting ya yet. Taem yu faenem ol gudfala advaes we hem i givim blong lidim laef, bambae yu gat sem filing olsem man ya blong raetem Sam, we i dipen long Jeova God blong lidim hem. Hem i singsing se: “Tok blong yu i olsem laet. Oltaem hem i stap soemaot rod blong mi, mo i stap lidim mi.”​—Ol Sam 119:105.

[Tok Blong Pija Long Pej 6]

Yu yu save from wanem God i letem ol man oli safa?

[Tok Blong Pija Long Pej 7]

Yu yu save kasem wan laef we i gat mining