Jeova i Stap Soem Long Yumi Olsem Wanem Blong Kaontem Ol Dei
“Soem long mifala olsem wanem blong kaontem ol dei blong mifala, blong mifala i save kam waes.”—OL SAM 90:12, NW.
1. ?From wanem i stret nomo blong askem long Jeova blong soem long yumi ‘olsem wanem blong kaontem ol dei blong yumi’?
JEOVA GOD i Man we i Wokem yumi mo i Givim Laef long yumi. (Ol Sam 36:9; Revelesen 4:11) From samting ya, i no gat wan narafala man we i moa gud long hem, blong soem long yumi olsem wanem blong yusum ol yia blong laef blong yumi long waes fasin. Taswe, man blong raetem Sam 90 i prea long God se: “Soem long mifala olsem wanem blong kaontem ol dei blong mifala, blong mifala i save kam waes.” (Ol Sam 90:12, NW ) I gud we yumi tingting dip long olgeta vas blong Sam ya. Be, fastaem, bambae yumi traem luk bigfala tingting insaed long singsing ya we God i pusum man ya blong raetem.
2. (a) ?Hu i wokem Sam 90, mo maet hem i raetem Sam ya wetaem? (b) ?Sam 90 i mas mekem se yumi gat wanem tingting long saed blong laef?
2 Smol toktok antap long Sam 90, i talem se “Sing ya, Moses, man blong wok blong God i wokem” (NW ). Sam ya i makem se laef blong man i sot nomo. Taswe, ating Moses i wokem Sam ya taem ol man Isrel oli stap wokbaot long draeples blong 40 yia, afta we oli kam fri long fasin slef long Ijip. Long draeples ya, plante taosen blong olgeta oli ded, olgeta we oli no moa trastem God oli lus evriwan. (Namba 32:9-13) Be, nating se Moses i raetem Sam 90 ya weples, ol tok blong hem oli soemaot se laef blong ol man we oli gat sin i sot tumas. Taswe i klia se, evri dei i sas mo yumi mas yusum olgeta dei blong yumi long waes fasin.
3. ?Wanem ol bigfala tingting long Sam 90?
3 Ol Sam 90, vas 1 kasem 6 i soemaot se Jeova i olsem hom blong yumi, i stat bifo olgeta kam kasem tede, mo bambae i stap olsem gogo i no save finis. Vas 7 kasem 12 i soemaot wanem we yumi nidim, blong yumi save yusum ol sotfala yia blong yumi long fasin we God i glad long yumi. Mo ol tok blong vas 13 kasem 17 i makem se yumi wantem tumas blong kasem lav, kaen fasin mo blesing blong Jeova. I tru, ol samting we Sam ya i tokbaot oli no kamaot long laef blong evri man blong Jeova. Nating se i olsem, yumi wanwan i mas lesin gud mo traem folem ol tingting we prea ya i soemaot. Naoia, yumi we i givim laef blong yumi long God finis, bambae yumi lukluk gud long Sam 90.
Jeova—“Hom” Blong Yumi
4-6. ?Olsem wanem Jeova i olsem “hom” blong yumi?
4 Fastok blong Sam ya i olsem: “Masta. I stat bifo olgeta kam kasem tede, oltaem, yu yu olsem hom blong mifala. Bifo, taem we yu no mekem ol hil ya [“ol hil oli no bon,” NW ] yet, long taem ya we yu no wokem wol ya nating yet [“bifo we yu hadwok blong mekem wol ya olsem wan woman we i harem i soa blong bonem pikinini,” NW ], be yu yu stap fastaem finis. Yu yu God we yu stap we yu stap.”—Ol Sam 90:1, 2.
5 God ya Jeova we “i stap oltaem nomo, gogo i no save finis,” hem i “hom” blong yumi, wan sefples long saed blong spirit. (Rom 16:26) Yumi harem se yumi stap sef from we oltaem nomo hem i stap blong givhan long yumi, hem i “stap ansa long ol prea” blong yumi. (Ol Sam 65:2) Long prea, yumi sakem ol wari blong yumi oli go long Papa blong yumi long heven, tru long nem blong gudfala Pikinini blong hem. From samting ya, ‘pis we hem i givim, we i bigfala moa, i bitim save blong yumi, hem i putum long tingting blong yumi, blong lukaot gud long yumi.’—Filipae 4:6, 7; Matiu 6:9; Jon 14:6, 14.
6 Yumi stap sef long saed blong spirit, from we Jeova i olsem “hom” blong yumi. Hem i givim ‘ol rum insaed long haos’ tu, ating hemia i minim ol kongregesen blong ol man blong Hem, we oli olsem sefples long saed blong spirit. Ol man blong lukaot long sipsip, we oli gat lav, oli givhan bigwan blong mekem yumi harem se yumi stap sefgud. (Aesea 26:20, NW; 32:1, 2; Ol Wok 20:28, 29) Mo tu, sam long yumi i stap long ol famle we oli joen longtaem finis long wok blong God, mo yumi luk wetem prapa ae blong yumi olsem wanem Jeova i olsem ‘hom blong yumi, i stat bifo olgeta kam kasem tede.’
7. ?Wanem mining blong tok ya ol hil oli “bon” mo God i hadwok blong mekem wol “olsem wan woman we i harem i soa blong bonem pikinini”?
7 Jeova i stap bifo we ol bigfala hil oli “bon” mo bifo we hem i hadwok blong mekem wol ya “olsem wan woman we i harem i soa blong bonem pikinini.” Long tingting blong yumi ol man, i hadwok tumas blong wokem wol wetem olgeta samting we oli stap long hem. Taem man blong raetem Sam 90 i talem se ol hil oli “bon” mo God i hadwok blong mekem wol “olsem wan woman we i harem i soa blong bonem pikinini,” hem i stap soem respek long Jeova from bigbigfala wok blong hem blong mekem olgeta samting ya. ?Yumi tu, yumi gat respek mo tangkiu from ol nambawan wok blong Man we i Wokem olgeta samting?
Jeova i Stap Oltaem Blong Givhan Long Yumi
8. ?Wanem mining blong tok ya se Jeova i “stap oltaem”?
8 Man blong raetem Sam 90 i singsing se: “Yu yu God we yu stap we yu stap, mo bambae yu save stap oltaem, gogo i no save finis.” Sam samtaem, tok ya “stap oltaem” i save minim se wan samting bambae i finis be yumi no save wetaem bambae i finis. (Eksodas 31:16, 17; Hibrus 9:15) Be long Ol Sam 90:2 mo sam narafala ples long Hibru hanraet blong Baebol, “stap oltaem” i minim se i “stap gogo i no save finis.” (Prija 1:4) Tingting blong yumi i no naf blong kasem save olsem wanem God i bin stap olwe. Nating se i olsem, Jeova i no stat samtaem, mo bambae i no finis samtaem. (Habakuk 1:12) Bambae hem i laef i stap olwe, we hem i rere blong givhan long yumi.
9. ?Man blong raetem Sam 90 i talem se wan taosen yia i olsem wanem long tingting blong God?
9 Tabu spirit i pusum man we i raetem Sam ya blong talem se, long tingting blong Man we i Wokem yumi mo we i laef olwe, wan taosen yia i wan sot taem nomo. Man ya i toktok i go long God, i se: “Fastaem yu tekem graon, yu mekem mifala long hem, mo oltaem yu stap mekem mifala i gobak long graon bakegen [“yu mekem mifala i kam olsem graon we oli brebrekem i kam ases nomo,” NW ]. Yu stap talem se, ‘Ol man long wol, yufala i mas gobak long graon.’ Long yu, wan taosen yia i olsem wan dei nomo, i olsem yestedei we i pas finis, i olsem wan aoa nomo [“fo aoa we wajman i gad,” NW ] long naet, we i pas kwiktaem nomo.”—Ol Sam 90:3, 4.
10. ?Olsem wanem God i mekem yumi “kam olsem samting we oli brebrekem”?
10 Man i save ded, nao God i mekem hem i “kam olsem graon we oli brebrekem i kam ases nomo.” Hemia i min se hem i gobak long “graon” bakegen, hem i kam olsem ases nomo. I olsem we Jeova i talem se: ‘Gobak long graon ya we mi mi wokem yu long hem fastaem.’ (Jenesis 2:7; 3:19) Samting ya i stap kamaot long olgeta man, nating se oli strong no oli slak, nating se oli rij no oli pua. I no gat wan sinman we hem i naf blong “pemaot laef blong hem blong bambae i no go long beregraon. Man i no save pem laef blong hem long God blong bambae i stap laef olwe.” (Ol Sam 49:6-9) Be, yumi talem bigfala tangkiu long God we ‘hem i givim stret Pikinini blong hem, wan nomo we hem i gat, blong olgeta man we oli bilif long hem bambae oli gat laef we i no save finis.’—Jon 3:16; Rom 6:23.
11. ?From wanem yumi save talem se wan longfala taem i sot nomo long tingting blong God?
11 Nating se man i laef plante yia olsem Metusela we i kasem 969 yia, be long lukluk blong Jeova laef blong ol man i sot moa i bitim wan ful dei. (Jenesis 5:27) God i stap luk wan taosen yia olsem we i 24 aoa nomo, olsem yestedei we i pas. Mo tu, man blong raetem Sam ya i talem se, long lukluk blong God, wan taosen yia i olsem fo aoa we wajman i gad long naet. (Jajes 7:19) Ale, i klia se wan longfala taem long tingting blong yumi, i sot tumas long Jeova God, we i laef olwe.
12. ?Olsem wanem God i “brumumaot” ol man?
12 Taem yumi skelem laef blong man wetem God we i laef olwe, i tru se laef blong yumi i sot tumas. Man blong raetem Sam 90 i talem se: “Yu yu stap tekemaot mifala, olsem wota we i ron bigwan, we i brumumaot ol samting. Mifala i no save stap longtaem, mifala i olsem drim [“wan sot slip,” NW ] nomo. Mifala i olsem gras we i stap gru olbaot. Long moning, hem i karem flaoa, be long sapa, flaoa i drae, i foldaon.” (Ol Sam 90:5, 6) Long draeples, Moses i luk we plante taosen man Isrel oli ded, God i “brumumaot” olgeta, olsem wota we i ron bigwan i save mekem. Wan Baebol i tanem haf ya olsem: “Yu brumumaot ol man long wan slip we i blong ded nomo.” (New International Version) Be laef blong ol sinman tu i olsem “wan sot slip” nomo, maet olsem taem man i spel long naet.
13. ?Long wanem fasin yumi olsem “gras we i stap gru olbaot,” mo olsem wanem samting ya i mas gat paoa long tingting blong yumi?
13 Yumi olsem ‘gras we long moning i karem flaoa,’ be bifo we sapa i kam, bigfala san i mekem i drae. Yes, laef blong yumi i no save stap longtaem, olsem gras we i save drae long wan dei nomo. From samting ya, yumi no mas westem laef ya we i sas tumas. Yumi mas traem letem God i soem long yumi olsem wanem blong yusum ol yia blong laef we bambae yumi gat yet long olfala wol ya.
Jeova i Givhan Long Yumi “Blong Kaontem Ol Dei”
14, 15. ?Olsem wanem tok blong Ol Sam 90:7-9 i stret long ol man Isrel?
14 Man blong raetem Sam 90 i tokbaot God se: “Yu yu kros, nao yu spolem mifala. Yu yu kros tumas long mifala, nao mifala i fraet we i fraet nogud. Yu stap mekem we ol sin blong mifala i kamaot klia long fes blong yu, yu stap luk ol rabis fasin ya we mifala i stap mekem long haed nomo. Yu yu kros, nao yu stap katem laef blong mifala i kam sotfala. Mifala i stap lus, olsem win we i godaon, i finis.”—Ol Sam 90:7-9.
15 God i kros long ol man Isrel we oli no moa trastem hem, ale hem i ‘spolem olgeta.’ Oli “fraet we i fraet” long kros blong hem, no ‘oli seksek nogud taem hem i agensem olgeta.’ (New International Version) Sam long olgeta “oli ded olbaot long draeples” olsem wan panis we God i givim. (1 Korin 10:5) Jeova i ‘mekem we ol sin blong olgeta i kamaot klia long fes blong hem.’ Hem i jajem olgeta from ol nogud samting we oli mekem long fes blong ol man, be hem i “stap luk” ol samting we oli mekem long “haed” tu, no ol sin we oli kavremap. (Ol Proveb 15:3) God i kros long ol man Isrel ya we oli no tanem tingting blong olgeta from ol sin, taswe oli “lus, olsem win we i godaon, i finis.” Sotfala laef blong yumi tu, i olsem smosmol win we i pas long maot blong yumi taem yumi pulum win.
16. ?Sipos samfala oli stap mekem sin long fasin haed, oli mas mekem wanem naoia?
16 Sipos eniwan long yumi i stap mekem sin long fasin haed, maet yumi save haedem samting ya blong smoltaem long fes blong ol man. Be rabis fasin we yumi haedem bambae ‘i kamaot klia long fes blong Jeova,’ mo bambae yumi no moa save frengud wetem hem. Blong kam klosap long Jeova bakegen, yumi mas prea blong askem fogif blong hem, nao yumi mas lego ol rabis fasin blong yumi, mo glad blong harem tok blong ol Kristin elda taem oli halpem yumi long saed blong spirit. (Ol Proveb 28:13; Jemes 5:14, 15) Hemia i moagud i winim we yumi ‘lus olsem win we i godaon,’ mo maet yumi mestem gudfala fiuja, hemia laef we i no save finis.
17. ?Plante man oli laef hamas yia, mo ol yia ya oli fulap long wanem samting?
17 Long saed blong laef blong ol sinman, Sam ya i talem se: “Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti, be oltaem mifala i stap kasem trabol, mifala i stap harem nogud nomo. Laef blong mifala i save finis kwiktaem nomo, nao mifala i go lus olgeta.” (Ol Sam 90:10) Plante man oli laef kasem 70 yia. Kaleb i talem se bodi blong hem i strong gud, taswe hem i kasem 85 yia. I gat samfala we oli laef longtaem moa, olsem Eron (123 yia), Moses (120 yia), mo Josua (110 yia). (Namba 33:39; Dutronome 34:7; Josua 14:6, 10, 11; 24:29) Be long saed blong ol man Isrel we oli kamaot long Ijip mo oli no moa trastem God, olgeta we oli gat 20 yia i go antap, oli ded bifo we 40 yia i pas. (Namba 14:29-34) Tede, long plante kantri, ol man oli save kasem seventi no eiti yia, olsem man blong raetem Sam i talem. Be long olgeta yia ya, yumi stap ‘kasem trabol, yumi stap harem nogud nomo.’ Ol yia ya oli pas hareap, nao yumi “lus olgeta.”—Job 14:1, 2.
18, 19. (a) ?I minim wanem se yumi “kaontem ol dei blong yumi, blong yumi save kam waes”? (b) ?Waes fasin bambae i pusum yumi blong mekem wanem?
18 Nao man blong raetem Sam 90 i singsing se: “I no gat man samtaem we i kasem fulpaoa blong kros blong yu. I no gat man yet we i savegud fasin blong yu blong kros, nao i fraet gud long yu from. Plis yu mekem mifala i save we laef blong mifala i sotfala nomo, blong mifala i save kam waes.” (Ol Sam 90:11, 12) I no gat wan long yumi we i save fulpaoa blong kros blong God mo se kros blong hem i save kasem wanem mak. From samting ya, yumi mas fraet moa blong mekem Hem i kros. Mo samting ya i mas pusum yumi blong askem long Hem ‘olsem wanem blong kaontem ol dei blong yumi, blong yumi save kam waes.’
19 Ol tok blong Sam ya i olsem wan prea blong askem Jeova blong tijim ol man blong hem olsem wanem blong waes, blong oli tinghae long ol dei blong laef blong olgeta we oli stap yet, mo blong oli yusum olgeta long fasin we God i glad long hem. Sipos yumi laef kasem 70 yia, yumi gat 25,500 dei blong yusum. Nating sipos yumi no olfala olsemia yet, be ‘yumi no save nating wanem bambae i save kamtru long laef blong yumi tumora. Yumi olsem smok blong hil nomo. Smok ya i save kamtru we i stap smoltaem nomo, nao biaen i lus bakegen.’ (Jemes 4:13-15) Yes, “samting we yumi no tingbaot i save kamaot long yumi enitaem nomo,” taswe yumi no save hamas dei no yia we bambae yumi laef yet. From samting ya, yumi mas prea blong yumi waes i naf blong winim ol traem, mo blong yumi mekem i stret long ol narafala, mo blong yumi mekem bes blong yumi naoia—tede—long wok blong Jeova. (Prija 9:11, NW; Jemes 1:5-8) Jeova i stap yusum Tok blong hem, spirit blong hem, mo ogenaesesen blong hem, blong lidim yumi. (Matiu 24:45-47; 1 Korin 2:10; 2 Timoti 3:16, 17) Sipos yumi waes, fasin ya bambae i pusum yumi blong ‘lukaot Kingdom blong God fastaem,’ mo blong yusum ol dei blong yumi long fasin we i givim ona long Jeova mo i mekem hat blong hem i glad. (Matiu 6:25-33, NW; Ol Proveb 27:11) I tru se, sipos yumi wosip long Jeova wetem fulhat blong yumi, bambae samting ya i no save tekemaot ol trabol long laef blong yumi, no gat. Be i sua se bambae yumi kasem bigfala glad from.
Blesing Blong Jeova i Givim Glad
20. (a) ?Long wanem rod, God i “sore” long yumi? (b) ?Jeova i save mekem wanem sipos yumi tanem tingting blong yumi from wan bigfala sin?
20 !Bambae i gud tumas sipos yumi save glad fulwan long olgeta dei blong laef blong yumi we oli stap yet! Long saed ya, Moses i prea se: “[“Kambak O Jeova,” NW ] ?Bambae yu yu stap kros long mifala gogo kasem wetaem? Mifala i man blong wok blong yu, plis yu sore long mifala. Plis yu mekem we evri moning, mifala i savegud we oltaem yu yu lavem mifala tumas [“yu yu gat lav we i stap tru oltaem,” NW ], nao bambae mifala i save singsing, mifala i save glad oltaem long laef blong mifala.” (Ol Sam 90:13, 14; futnot long NW ) God i no save mekem wan mastik. Be taem hem i kros, hem i save “sore” mo ‘tanraon’ blong i no moa kros, mo blong i no moa givim panis, sipos man we i mekem sin i lesin long woning blong hem, i tanem tingting blong hem, mo i jenisim fasin blong hem. (Dutronome 13:17) Taswe, sipos yumi mekem wan bigfala sin be biaen yumi rili tanem tingting blong yumi, Jeova i save ‘mekem yumi savegud we hem i lavem yumi tumas,’ nao bambae yumi “save singsing” from glad. (Ol Sam 32:1-5) Sipos yumi gohed blong folem stret rod, bambae yumi haremsave lav blong God we i stap tru oltaem, mo bambae yumi save ‘glad oltaem long laef blong yumi’—gogo laef blong yumi i finis.
21. ?Maet Moses i stap askem wanem long God long Ol Sam 90:15, 16?
21 Man blong raetem Sam 90 i prea se: “Long ol yia we i pas finis, yu yu stap mekem mifala i harem nogud tumas. Plis naoia, yu mekem mifala i harem gud, stret long mak we bifo yu bin mekem mifala i harem nogud. Mifala i man blong wok blong yu. Plis yu letem mifala i luk ol bigbigfala wok blong yu, mo yu letem olgeta we bambae oli stap kamaot biaen long mifala oli luk bigfala paoa blong yu.” (Ol Sam 90:15, 16) Maet Moses i stap askem long God blong blesem ol man Isrel wetem glad we i stap longtaem, stret long mak blong ol dei mo yia blong trabol we oli bin safa long hem. Hem i askem God blong letem ol man blong hem oli luk “bigbigfala wok” blong hem blong blesem ol man Isrel, mo blong letem ol pikinini we oli kamaot biaen long olgeta oli luk bigfala paoa blong hem. I stret we yumi tu yumi prea se fulap blesing bambae oli kasem ol man we oli obei long God long niufala wol we God i promes blong mekem.—2 Pita 3:13.
22. ?Ol Sam 90:17 i soemaot se i stret blong prea from wanem?
22 Long lastok blong Sam 90, Moses i askem long God se: “God, yu yu Masta blong mifala. Plis yu givim ol gudgudfala samting blong yu long mifala, mo yu mekem we bambae mifala i stap win oltaem long olgeta samting we mifala i stap mekem.” (Ol Sam 90:17) Ol tok ya i soem se i stret we yumi prea blong askem God blong blesem ol traehad blong yumi long wok blong hem. Nating se yumi wan Kristin we tabu spirit i makemaot no wan long “ol narafala sipsip” we oli joen wetem ol tabu Kristin ya, yumi save glad tumas se Jeova i stap ‘givim ol gudgudfala samting blong hem long yumi.’ (Jon 10:16) Mo yumi harem gud tumas we hem i stap ‘mekem yumi win oltaem’ long wok blong talemaot Kingdom mo long plante narafala wok tu.
Gohed Blong Kaontem Ol Dei Blong Yumi
23, 24. ?Olsem wanem Sam 90 i save givhan long yumi sipos yumi tingting dip long hem?
23 Taem yumi tingting dip long Sam 90, samting ya i mas mekem se yumi dipen moa long Jeova we i olsem “hom” blong yumi. Taem yumi tingbaot ol tok blong Sam ya se laef blong yumi i sot tumas, yumi mas luksave moa se yumi nidim blong lukluk i go long God oltaem blong halpem yumi blong kaontem ol dei blong laef blong yumi. Mo sipos yumi gohed oltaem blong lukaot mo soemaot waes we i kamaot long Jeova, bambae yumi sua blong kasem lav, kaen fasin, mo blesing blong Hem.
24 Jeova bambae i gohed nomo blong soemaot long yumi olsem wanem blong kaontem ol dei blong yumi. Mo sipos yumi lesin long ol tijing we hem i givim, bambae yumi save gohed blong kaontem ol dei blong yumi gogo i no save finis. (Jon 17:3) Be, sipos yumi rili wantem kasem laef we i no save finis, yumi mas mekem Jeova i kam olsem sefples blong yumi. (Jud 20, 21) Samting ya i stap kamaot klia moa long ol gudfala tok blong leftemap tingting long Sam 91, we bambae yumi tokbaot long nekis stadi.
?Bambae Yu Yu Ansa Olsem Wanem?
• ?Olsem wanem Jeova i olsem “hom” blong yumi?
• ?From wanem yumi save talem se Jeova i rere oltaem blong givhan long yumi?
• ?Olsem wanem Jeova i stap givhan long yumi ‘blong kaontem ol dei blong yumi’?
• ?Wanem i save givhan long yumi blong ‘glad oltaem long laef blong yumi’?
[Tok blong pija long pej 11]
Taem ‘ol hil oli no bon yet,’ Jeova hem i God
[Tok blong pija long pej 12]
Nating se man i laef plante yia olsem Metusela we i kasem 969 yia, be long lukluk blong Jeova laef blong ol man i sot moa i bitim wan ful dei
[Tok blong pija long pej 14]
Jeova i mekem se yumi ‘win oltaem long olgeta samting we yumi stap mekem’