?From Wanem Taem i Sot?

TAEM. Maet i no isi blong talem stret mining blong wod ya, be yumi save finis se neva yumi gat i naf taem. Yumi save tu se, taem i pas kwiktaem nomo. Plante taem, yumi talem se, “Taem i flae.”

Nating se i olsem, wan man Engglan, Austin Dobson, we i stap raetem ol buk, i talem tru moa se: “?Yu talem se taem i pas kwik? !No gat! Taem i stap, be yumi nao, yumi stap pas i go.” Dobson i ded long 1921, mo stat long taem ya i kam, i mekem 80 yia finis we hem i go; be taem i stap gohed yet.

Taem Blong Yumi i Plante

Baebol i tokbaot Man ya We i Wokem ol man, i se: “Bifo, taem we yu no mekem ol hil ya yet, long taem ya we yu no wokem wol ya nating yet, be yu yu stap fastaem finis. Yu yu God we yu stap we yu stap, mo bambae yu save stap oltaem, gogo i no save finis.” (Ol Sam 90:⁠2) The New Jerusalem Bible i tanem vas ya se, “stat bifo olgeta, gogo kasem taem we i no save finis, yu yu God.” Taswe, bambae taem i stap, gogo i no save finis​—!olsem God!

God i gat fulap taem from we hem i stap blong olwe. Be long saed blong ol man, yumi ridim tok ya se: “Yu yu kros, nao yu stap katem laef blong mifala i kam sotfala. Mifala i stap lus, olsem win we i godaon, i finis. Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti, be oltaem mifala i stap kasem trabol, mifala i stap harem nogud nomo. Laef blong mifala i save finis, kwiktaem nomo, nao mifala i go lus olgeta.”​—Ol Sam 90:​9, 10.

Baebol i talem se stamba tingting blong God hemia se ol man oli laef blong olwe. Taswe, ?from wanem laef tede i sot nomo? (Jenesis 1:​27, 28; Ol Sam 37:29) Fastaem God i wantem se yumi laef foreva. Be, ?from wanem bighaf blong yumi i gat jans blong laef samwe long 30,000 dei nomo? ?From wanem taem we man i gat blong laef, i sot olsemia? ?Hu, no wanem, i stamba blong samting ya? Baebol i givim gudfala ansa long ol kwestin ya.a

Taem i Sot Moa

Ol olfala oli luksave se long ol yia we oli jes pas, fasin blong laef i spid moa. Woman ya Dr. Sybille Fritsch, we i stap raetem ol stori long niuspepa, i talem se, long ol 200 yia we oli pas, ol aoa we man i spenem blong wok long wan wik, i no moa 80 be i godaon long 38 haoa. “Be samting ya i no mekem se ol man oli stop blong komplen long saed blong taem.” Woman ya i soemaot tingting blong plante man i se: “I no gat naf taem; taem i minim mane; yumi nidim taem olsem we yumi nidim blong pulum win; wan laef we i spid oltaem.”

Ol niufala samting we man i wokem tede, oli openem rod long plante samting we neva ol man blong bifo oli tingbaot. Be, naoia we i gat plante moa samting blong mekem, ol man oli harem nogud from we oli no gat inaf taem blong mekem olgeta samting ya. Long taem blong yumi, evriwan i gat wan program blong folem, we i mekem se oli spid long wan samting i go long narafala samting. Papa i mas aot long haos long 7 klok moning blong go long wok. Mama i mas karem ol pikinini oli go long skul long 8⁠:30 long moning. Bubu i mas pas long dokta long 9:40 long moning, mo long 7⁠:30 long naet, evriwan long famle oli mas reregud blong go long wan impoten miting. From we yumi stap resis oltaem blong kasem ol defren mak we yumi putum, klosap yumi no moa gat taem blong spel. Ale, yumi stat komplen long saed blong laef evri dei, se hem i neva jenis mo i stap mekem yumi resis olbaot nomo.

I No Blong Yumi Nomo We Taem i Sot

Devel Setan, we i Enemi blong God, hem nao i stamba blong sotfala laef blong ol man. Naoia hem tu i stap kasem ol nogud frut from prapa rabis fasin blong hem. (Skelem wetem Galesia 6:​7, 8.) Revelesen 12⁠:12 i givim hop long yumi taem hem i tokbaot taem ya we Kingdom blong Mesaea i bon long heven. Hem i se: “Nao from samting ya, yu heven mo yufala evriwan we i stap long heven, yufala i mas harem gud. Be sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.”

Fasin we Baebol i soem blong kaontem ol yia, mo ol profet tok we oli stap kamtru, oli soem klia se, tede, yumi stap laef klosap long en blong “smol taem” ya. !Yumi glad tumas blong save se taem we Setan i gat i stap yet, bambae i finis i no longtaem! Taem Setan bambae i stap kalabus, ol man we oli stap obei long God bambae oli kam stretgud olgeta. Nao, bambae oli save gat laef ya we Jeova i wantem fastaem, hemia laef we i no save finis. (Revelesen 21:​1-4) Bambae yumi neva trabol bakegen from we taem i sot.

Traem tingbaot sipos yu save laef gogo i no save finis​—laef blong olwe. Neva bambae yu wari from we yu no gat inaf taem blong finisim wan wok. Sipos yu nidim moa taem, bambae yu no wari from i gat tumora i stap yet, no nekis wik, no nekis yia. !Yes, bambae yu gat taem we i no save finis long fored blong yu!

Yusum Taem Blong Yu Long Fasin We i Waes

Setan i luksave se taem we hem i gat yet blong pulum ol man, i kam sot. Taswe, hem i traem mekem se ol man oli bisi tumas, nao oli no gat taem blong lesin long gud nius ya blong Kingdom blong God. From samting ya, i waes blong lesingud long advaes ya we God i givim, i se: “Yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis we yufala i kasem blong mekem ol gudfala wok, from we naoia, ol fasin nogud oli gat paoa. Bambae yufala i no krangke. Yufala i mas traem save olgeta samting we Masta blong yumi i wantem blong yufala i mekem.”​—Efesas 5:​15-​17.

I impoten tumas we yumi yusum taem blong yumi long waes fasin. Yumi mas mekem ol samting we oli impoten moa, i bitim we yumi westem taem blong mekem ol samting we bambae oli no givim gudfala frut long yumi. Yumi mas gat sem tingting olsem Moses, we i askem long Jeova se: “Plis yu mekem mifala i save we laef blong mifala i sotfala nomo, blong mifala i save kam waes.”​—Ol Sam 90:12.

Tru ya, long wol blong tede, evriwan i bisi. Be nating se i olsem, ol Witnes blong Jeova oli singaot yu blong yu putum sam taem i stap blong lanem ol samting we God i wantem yumi blong mekem. Samting ya bambae i givhan long yu blong kasem laef ya we i no save finis, aninit long rul blong Kingdom blong God. Sipos evri wik yu stap spenem wan aoa blong stadi long Baebol, blong ‘traem save olgeta samting we Jeova i wantem yu blong mekem,’ bambae yu luk we tok ya i kamtru long laef blong yu, se: “Yu mas tanem baksaed blong yu long ol rabis fasin, mo yu mas mekem ol samting we i gud, nao olgeta we bambae oli stap kamaot biaen long yu bambae oli stap oltaem long graon ya. Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—Ol Sam 37:​27, 29.

[Futnot]