Kwestin Blong Olgeta We Oli Ridim Magasin Ya . . .

?I Gat Wan Stat Long Laef Blong God?

▪ Baebol i talem se i no gat wan stat long laef blong God. God i stap oltaem nomo. I hadwok long yumi blong kasem save long samting ya. Nating se i olsem, bambae yumi no sakemaot tingting ya jes from we yumi no kasem save long hem.

I stret nomo we yumi no kasem save long olgeta fasin blong God. Aposol Pol i talem se: “!Olgeta! !Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak! Yumi no save talemaot olsem wanem hem i jusumaot ol rod blong hem. Yumi no naf blong save ol plan blong hem, se bambae oli kamtru olsem wanem.” (Rom 11:33) Wan smol pikinini i no kasem save from wanem papa mama i mekem olsem no i talem wan samting olsem. I sem mak long yumi ol man. Tingting blong yumi i no naf blong kasem save long waes mo save blong God we i dip tumas. Tabu spirit i pulum Pol blong tokbaot ol samting we oli laenap wetem waes mo fasin sore we God nomo i stamba blong hem. Ol tok ya oli soemaot se i gat sam fasin blong Jeova God mo sam rod we hem i stap folem, we tingting blong yumi i no naf blong kasem save long olgeta. Wan long ol tingting ya hemia se God i no gat wan stat long laef blong hem. I hadwok long yumi blong kasem save samting ya. Be yumi mas trastem wanem we Baebol i talem long saed blong God. Jisas Kraes i tokbaot tabu tok blong God se: “Tok blong yu i tru olgeta.”—Jon 17:17.

Moses i prea long Jeova se: “Yu yu God we yu stap we yu stap, mo bambae yu save stap oltaem, gogo i no save finis.” (Ol Sam 90:2) Long ples ya, Moses i tokbaot tu samting long saed blong laef blong God. Faswan se, bambae hem i stap oltaem. Jeova i “God ya we i laef, mo i no save ded samtaem.” (Revelesen 4:9) Taswe, God bambae i laef blong olwe. Seken samting we Moses i tokbaot se, God i laef bifo olgeta. Blong talem stret, i no gat man i mekem God mo laef blong hem i no stat samples. Defren olgeta, God i laef longtaem, bifo we bifo olgeta.

Taswe i stret we God nomo i karem taetel ya “King we rul blong hem i stap oltaem nomo, gogo i no save finis.” (1 Timoti 1:17) Traem tingbaot Jisas Kraes, olgeta milian enjel long heven, mo ol man long wol. Olgeta evriwan ya oli stat blong laef taem God i mekem olgeta. (Kolosi 1:15, 16) Be God i no olsem. Sipos yumi strong blong talem se i gat wan man we i mekem God, bambae yumi stap westem taem blong yumi nomo. Oltaem bambae yumi stap tingting bakegen mo bakegen se hu ya man ya we i mekem God, mo hu i mekem man ya we i mekem God. Mo i no gat ansa blong hem from we i no gat wan man we i mekem God. Yes, Jeova i wan ‘God we i stap we i stap, mo bambae i save stap oltaem, gogo i no save finis.’ (Ol Sam 90:2) Blong talem stret, Jeova i laef “bifo olgeta, i kam kasem naoia, gogo i no save finis.”—Jud 25.

Save ya se God i laef oltaem i pulum yumi blong kam klosap moa long hem. Prea blong Moses i soemaot se from we God i wan God we i laef olwe, yumi save trastem gud promes blong hem blong givim laef we i no save finis long yumi. Baebol i tokbaot God olsem se: “I stat bifo olgeta kam kasem tede, oltaem, yu yu olsem hom blong mifala.” Hemia i defren olgeta long laef blong yumi naoia we i sotfala tumas. Jeova i wan Papa we i lavem yumi. Hem i laef bifo finis, hem i stap naoia, mo long fiuja bambae hem i stap oltaem wetem ol man blong hem. !Yumi mas harem gud long nambawan trutok ya!—Ol Sam 90:1.