Oli Wok Blong Givhan Long Ol Brata Long Fulwol
?YU HAREM tok ya finis se ol “intenasnal volontia”? Hemia ol Witnes Blong Jeova we oli givim taem mo save blong olgeta blong bildim ol branj ofis no narafala haos we Sosaeti i yusum blong prentem ol buk mo serem gud nius blong Kingdom. Ol volontia ya oli givhan tu blong wokem ol Haos Asembli mo ol Haos Kingdom, we oli yusum blong tijim ol man long Baebol. Tede, ol volontia ya oli stap mekem wok blong olgeta long 34 kantri, we plante blong ol kantri ya oli pua. ?Wanem ol traem mo ol glad we ol volontia ya oli kasem, taem oli wok blong givhan long ol Kristin brata long fulwol? ?Oli harem olsem wanem long “tabu wok” ya we oli stap mekem? (Revelesen 7:9, 15, NW) Blong kasem save, i gud yumi toktok wetem sam volontia we oli bin wok long Meksiko.
Long Mei 1992, ol volontia we oli kamaot long ol narafala kantri oli kasem Meksiko. Smol taem biaen, oli lidim wok blong bildim ol niufala bilding long branj ofis we i lukaot long wok blong ol Witnes Blong Jeova long Meksiko. Oli bildim 14 niufala bilding, long olgeta ya i gat wan ples blong slip blong olgeta we oli stap wok long branj ofis ya, wan haos blong prentem buk, mo wan bilding we i gat ol ofis long hem.
Bitim 730 volontia oli kamaot long ol narafala kantri blong bildim ol haos ya. Oli kamaot long Kanada, Inglan, Yunaeted Stet, mo sam narafala kantri bakegen. Oli wokgud tugeta wetem ol handred volontia we oli kamaot long ol defren ples blong Meksiko. Antap long namba ya, bitim 28,000 Witnes we oli joen wetem ol 1,600 kongregesen raonabaot long branj ofis, oli kam evri wiken blong givhan long wok. Oli wantem tumas blong mekem wok ya mo oli no askem mane from. Oli harem se hemia wan nambawan janis long olgeta blong mekem wok blong Jeova. Taem oli bildim ol haos ya, oli holem tingting ya we i kamaot long Ol Sam 127:1 se: “Sipos Hae God i no givhan long man blong wokem haos, wok blong man ya i blong nating nomo.”
Ol Traem We Oli Fesem
?Wanem ol traem we ol intenasnal volontia oli fesem taem oli go wok long wan defren kantri? I gud yumi askem long sam long ol volontia ya. Curtis mo Sally, tufala i blong Yunaeted Stet, mo tufala i givhan blong bildim ol haos blong Sosaeti long Jemani, India, Meksiko, Paragwae, Romania, Rasia, Senegal, mo Sambia. Curtis i talem se: “Faswan traem, hemia taem mitufala i mas lego dota blong mitufala we i paenia [mekem fultaem wok blong prij], mo kongregesen blong mitufala long Minnesota. Mi mo waef blong mi, mitufala i bin joen long kongregesen ya blong 24 yia, mo mitufala i haremgud long hem.”
Sally i talem se: “I no isi blong laef long wan ples we yu no save, mo ating i hadwok moa long wan woman, i bitim wan man. Be mi lanem olsem wanem blong laef long wan ples we i defren. !Mo tu, mi lan blong laef wetem ol smolsmol bebet, we oli plante we plante!” Hem i ademap se: “Long wan kantri we mitufala i bin go long hem, mifala ten volontia i serem wan haos we i no gat kijin long hem, mo i gat tu ples blong swim nomo. Long ples ya mi lanem blong gat longfala tingting moa.”
Wan narafala traem blong olgeta ya, hemia taem oli mas lanem wan niufala lanwis. I nidim fasin traehad mo tingting daon blong mekem samting ya. Sharon i bin wok wetem man blong hem long defren kantri. Hem i talem se: “I no isi taem yu no save lanwis blong kantri ya we yu wok long hem. Fastaem, i had blong kam klosap long ol brata sista long saed blong spirit, from we yu no save talem ol filing blong yu. Mo samting ya i save mekem yu harem nogud. Be ol brata sista we mifala i mitim long ol defren kantri oli gat longfala tingting mo oli rili wantem se mifala i haremgud. Afta long smol taem nomo, mifala i stat storian tugeta nating se i no isi blong kasem save.”
I No Isi Blong Joen Long Wok Blong Prij
Ol volontia ya oli lego ol samting we olgeta wan oli laekem blong go bildim ol haos blong Sosaeti long fulwol, mo oli givhan bigwan long saed ya. Be nating se i olsem, oli luksave se fastaem long wok ya, oli mas talemaot gud nius blong Kingdom. Taswe oli sapotem wok blong prij wetem ol brata sista we oli talemaot gud nius long ol lokol kongregesen. Åke mo waef blong hem Ing-Mari, tufala i bin volontia long Guadeloupe, Malawi, Meksiko, mo Naejeria. Tufala i talem se yes, i no isi blong toktok wan defren lanwis taem yu prij long wan narafala kantri.
Ing-Mari i talem se: “Fastaem, mifala i no talem plante samting from we oltaem mifala i go prij wetem ol Witnes blong ples ya, mo mifala i sem blong toktok, ale mifala i letem olgeta nomo oli toktok long man. Nating se i olsem, wan dei mitufala i tekem disisen se mitufala i mas go prij mitufala nomo. Mitufala i go prij be hat blong mitufala i pam from we mitufala i fraet lelebet. Mitufala i mitim wan yangfala woman we i lesin long smol tok blong mi we mi rerem finis. Mi ridim wan vas long Baebol mo mi givim sam magasin long hem. Ale woman ya i talem se: ‘?Plis, yu save ansa long wan kwestin blong mi? Wan famle blong mi i stadi Baebol wetem ol Witnes Blong Jeova. ?Olsem wanem nao mi mi save stadi long Baebol tu?’ Mi sek mo mi no save wanem blong talem long hem. Ale, mi kwaetem tingting blong mi, mo mi talem long hem se mi mi save stadi long Baebol wetem hem.”
Ing-Mari i ademap se: “Mi haremgud mo mi tangkiu long Jeova from we hem i blesem traehad blong mifala mo strong tingting we mifala i gat blong wantem talemaot gud nius.” Woman ya i gohed gud mo i tekem baptaes long wan distrik asembli long Mexico City. Åke mo Ing-Mari tufala i tokbaot wok blong prij se: “Mitufala i tinghae long wok we mitufala i mekem long ol defren ples blong wol. Be i no gat wan narafala samting i mekem mitufala i haremgud moa, i bitim glad ya we mitufala i harem taem mitufala i halpem wan man blong i kam long trutok.”
Oli Lego Samting We Olgeta Nomo Oli Wantem
I tru we ol volontia we oli lego famle mo ol fren blong olgeta, oli lego ol samting we oli laekem blong go long ol narafala kantri blong givhan long ol brata blong olgeta. Be tu, oli kasem sam glad we oli bigwan we i bigwan. ?Wanem ol glad ya we oli kasem?
Howard wetem waef blong hem Pamela, tufala i bin wok long Angola, Ekwado, El Salvado, Guyana, Kolombia, Meksiko, mo Porto Riko. Howard i eksplenem se: “Mifala i gat wan spesel janis taem mifala i mitim ol brata sista long ol defren kantri. Mifala i luk wetem prapa ae blong mifala, lav ya we i joenemgud ol brata sista long fulwol. Plante taem mifala i ridim ol ekspiriens we oli tokbaot lav ya, be taem mifala i laef mo wok wetem ol brata sista we oli gat defren kalja mo fasin blong laef, nao mifala i gat moa tangkiu from nambawan fasin blong yumi blong joengud tugeta olsem brata sista.” Gary i bin givhan blong bildim sam haos blong Sosaeti long Ekwado, Kolombia, Kosta Rika, Meksiko, mo Sambia. Hem tu i harem se program ya i halpem hem bigwan, i se: “Long olgeta yia ya we mi spenem blong wok long narafala kantri, mi kampani plante wetem ol brata we oli stap longtaem long trutok. Samting ya i trenem mi, mo i halpem mi blong fesem ol traem long ol defren ples we mi go wok biaen. Wok ya i mekem bilif blong man i kam strong moa, from we long wok ya man i gat janis blong luk wetem prapa ae blong hem se ogenaesesen blong Jeova long fulwol i rili joengud—fasin joengud ya i strong inaf blong mekem we man i no moa tingbaot lanwis, kala, no kalja blong narafala.”
Naoia wok long Meksiko i finis finis, mo oli dediketem ol niufala bilding blong branj ofis long yia ya. Lav we ol intenasnal volontia oli gat long God i pusum olgeta, nao oli givhan bigwan blong mekem trufala wosip i kam antap long Meksiko mo long sam narafala kantri tu. Raon long wol, ol Witnes Blong Jeova oli glad tumas long gudfala tingting ya blong ol intenasnal volontia, we oli wantem tumas blong givhan mo oli rere blong lego ol samting we olgeta wan i laekem blong go givhan long ol Kristin brata blong olgeta long fulwol.
[Tok blong pija long pej 25]
Ekwado
[Tok blong pija long pej 25]
Kolombia
[Tok blong pija long pej 25]
Angola
[Tok blong pija long pej 26]
Garen long branj ofis
[Tok blong pija long pej 26]
Wok i stat long ol niufala haos blong branj ofis blong Meksiko
[Tok blong pija long pej 26]
Daon: Sam memba blong ‘Construction Department’ long fored blong wan long ol niufala bilding
[Tok blong pija long pej 27]
Ol volontia oli glad blong joen long wok blong prij wetem lokol kongregesen