‘Jeova i Stap Givhan Long Mi’

Kasem Blesing Blong Jeova From Fasin Blong Lego Ol Samting We Yumi Nomo i Wantem

TINGBAOT wanem samting long trifala stori ya we i sem mak. Wan man i ron long baskel blong hem long medel bus blong Kamerun. Blong fo aoa, hem i ron long ol rod we oli fulap long wota mo sofmad, hem i fesem denja long ol rod ya blong go leftemap tingting blong ol narafala. Sam man long Simbabwe oli wokbaot fiftin kilometa krosem ol bigbigfala reva we oli kam antap kasem nek blong olgeta, blong go mekem stadi long wan smol grup. Ol man ya oli mas putum ol klos mo sus blong olgeta antap long hed blong olgeta blong oli no wetwet. Long wan narafala ples, wan woman i girap long fo klok long moning blong go visitim mo tijim wan nes we i bisi tumas mo we hem i fri wan aoa nomo long eli moning blong stadi.

?Wanem samting we ol man long trifala stori ya oli mekem we i sem mak? Oli ol Witnes blong Jeova we oli wok fultaem blong tijim ol man long ol trutok blong Baebol. Long olgeta ya i gat ol fultaem mo spesel paenia, ol misinari, ol elda we oli visitim ol kongregesen mo plante taosen man bakegen we oli wok fri nomo long ol haos Betel raon long wol. Stamba fasin blong olgeta hemia blong lego ol samting we olgeta nomo oli wantem.a

Fasin We i Mas Pusum Yumi Blong Mekem Wok

Ol Witnes blong Jeova oli tingting dip long advaes we aposol Pol i talem long Timoti se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.” (2 Timoti 2:15) ?Be wanem i pusum plante handred Witnes blong Jeova blong oli mekem wok blong Jeova fultaem?

Taem oli askem long olgeta we oli mekem wok blong Jeova fultaem se wanem nao i pusum olgeta blong traehad blong mekem wok ya, oli ansa se hemia lav we oli gat long Jeova mo ol man raonabaot long olgeta. (Matiu 22:​37-39) I stret nomo we lav nao i pusum olgeta from sipos no, ol traehad we oli mekem i blong nating nomo.​—1 Korin 13:​1-3.

Wan Wok We i Pulum Man Blong Lego Ol Samting We Hem Wan i Wantem

Olgeta Kristin we oli givim laef blong olgeta i go long God finis, oli agri long tok blong Jisas se: “Man we i wantem kam biaen long mi, hem i mas blokem ol samting we hem nomo i wantem, nao i mas karem [“pos,” NW ] blong hem, i biaen long mi.” (Matiu 16:24) Fasin blong blokem ol samting we yumi nomo i wantem i minim se yumi glad nomo blong letem Jeova mo Jisas oli bos mo lidim laef blong yumi. From samting ya, plante oli lego ol samting we olgeta nomo oli wantem blong mekem wok blong Jeova fultaem.

Plante Witnes oli traehad bigwan blong mekem moa long wok blong Jeova. Tingbaot Júlia we i gat 56 yia blong hem mo i fultaem paenia long São Paulo, long Brasil. Hem i talem se: “Wan Jaenis brata i telefon long mi mo i askem mi sipos mi wantem lanem lanwis Jaenis. Be from we mi olfala, mi no tingbaot blong lanem wan niufala lanwis. Be sam dei biaen, mi agri blong lanem lanwis Jaenis. Tede mi naf blong ridim Baebol long ol man long lanwis Jaenis.”

Branj ofis blong ol Witnes blong Jeova long Peru i givim ripot ya se: “Long ol yia we oli jes pas, plante handred fultaem paenia oli muv i go long ol ples we Sosaeti i talem long olgeta blong go wok long hem, mo ol paenia ya oli soemaot strong tingting we oli gat blong lego ol samting we olgeta nomo oli wantem. Oli muv i go long ol taon farawe mo laef blong ol taon ya i no gat plante samting mo i had blong faenem wok. Ol brata mo sista ya oli glad nomo blong laef long ol ples olsem blong gohed blong mekem wok blong Jeova. Be samting we i moa impoten hemia se ol wok we olgeta ya oli mekem i karem frut long plante ples. Ol elda we oli stap visitim ol kongregesen oli talem se ol niufala grup we oli stat long ol defren ples, oli kamaot from wok blong ol paenia ya we oli rere blong lego ol samting we olgeta nomo oli wantem.”

Sam Kristin oli rere blong lusum laef blong olgeta blong givhan long ol Kristin brata. (Rom 16:​3, 4) Wan seket elda long wan ples long Afrika we i gat faet, i talem se: “Bifo we mifala i kasem laswan rod we ol ami oli blokem blong makem teritori we ol rebol oli bos long hem mo hemia we gavman i bos long hem, fo komanda blong ol rebol ami mo ol gad blong olgeta, oli raonem mi mo waef blong mi mo oli stap askem ol pepa blong mitufala. Taem oli stap jekemap ol pepa blong mitufala, oli luk se mitufala i kam long teritori we gavman i bos long hem, taswe oli kros long mitufala. Ol rebol ya oli talem se mi mi kam blong spae long olgeta. Afta oli talem se bambae oli sakem mi mi go long wan hol we i tudak we i tudak. Mi eksplenem long olgeta wanem we mitufala i stap mekem mo biaen oli letem mifala i go.” !Traem tingbaot glad we ol kongregesen oli kasem taem elda ya mo waef blong hem, tufala i rere blong lego ol samting we tufala nomo i wantem blong kam visitim olgeta!

Nating se i gat ol hadtaem, namba blong ol man we oli joen long wok blong Jeova fultaem i stap kam antap moa long fulwol. (Aesea 6:8) Ol gudfala brata mo sista ya we oli wokhad oli glad tumas long janis ya we oli gat blong mekem wok blong Jeova. Naoia, plante milian man oli wosip long Jeova wetem semfala tingting ya blong lego ol samting we olgeta nomo oli wantem. Ale, Jeova i blesem olgeta bigwan. (Ol Proveb 10:22) From we oli sua se Jeova bambae i blesem olgeta mo i gohed blong sapotem olgeta, ol brata mo sista ya oli gat sem filing olsem man blong raetem Sam we i singsing se: ‘Jeova i stap givhan long mi.’​—Ol Sam 121:2.

[Futnot]

[Tok blong makem poen pija long pej 9]

“Long dei ya we bambae yu go faet long ol enemi blong yu, ol man blong yu bambae oli glad blong kam joen long yu.”​—OL SAM 110:3.

[Bokis blong pija long pej 8]

JEOVA I TINGHAE LONG OL MAN BLONG HEM

“Yufala i mas stanap strong. Yufala i no mas slak. Oltaem yufala i mas wok strong long ol wok ya blong Masta blong yumi, from we yufala i save finis, se taem yufala i wok blong Masta ya blong yumi, be wok ya bambae i mas gat frut blong hem.”​—1 Korin 15:58.

“God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.”​—Hibrus 6:10.