Jeova i Givim “Tabu Spirit Long Ol Man We Oli Askem Long Hem”
“Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.”—LUK 11:13.
1. ?Wetaem yumi nidim moa se tabu spirit i givhan long yumi?
‘MI NO save winim traem ya mi wan. !Mi mas gat tabu spirit blong givhan long mi blong stanap strong!’ ?Yu yu bin talem ol tok olsem samtaem? Bighaf blong ol Kristin oli bin talem. Maet yu bin talem tok ya taem yu faenemaot se yu gat wan bigfala sik. No ating yu bin talem, taem hasban no waef blong yu i ded afta we yutufala i bin stap tugeta longtaem. Maet yu bin talem tok ya taem tingting blong yu i foldaon mo glad blong yu i lus. Ating plante taem long laef blong yu, yu bin fesem bigfala trabol mo traem, mo yu bin harem se yu no save gohed, se yu nidim tabu spirit blong Jeova blong givim ‘paoa we i bigwan tumas i blong God, i no blong yu.’—2 Korin 4:7-9; Ol Sam 40:1, 2.
2. (a) ?Wanem ol trabol we ol trufala Kristin oli fesem? (b) ?Long stadi ya, bambae yumi tokbaot wanem tufala kwestin?
2 Long wol ya we ol man oli no moa kea long God, evri dei ol trufala Kristin oli fesem plante moa problem mo fasin agens. (1 Jon 5:19) Setan tu i stap wok agensem ol man blong Kraes. Hem i stap faet strong agensem olgeta we “oli stap obei long ol tok blong God, mo we oli stap holem ol tok we Jisas i talemaot se i tru.” (Revelesen 12:12, 17) From samting ya, yumi no sapraes se yumi nidim tabu spirit blong God moa naoia, i bitim olgeta taem bifo. ?Olsem wanem yumi save mekem se yumi kasem fulap tabu spirit blong God oltaem? ?From wanem yumi save bilif strong se Jeova i wantem tumas blong givim paoa we yumi nidim blong winim ol traem? Yumi faenem ansa blong tufala kwestin ya long tu stori we Jisas i talem.
Prea Oltaem
3, 4. ?Wanem stori we Jisas i talem, mo olsem wanem stori ya i joen wetem prea?
3 Wan disaepol blong Jisas i askem se: “Masta. Plis yu tijim mifala, blong mifala i prea.” (Luk 11:1) Blong ansa long hem, Jisas i talem tu stori. Faswan i long saed blong wan man we i mas kasem sam kakae blong givim long wan man we i kamtru long haos blong hem. Sekenwan i long saed blong wan papa we i lesingud long pikinini blong hem. Bambae yumi tokbaot tufala stori ya.
4 Jisas i talem se: “Sipos wan man i kamtru long haos blong yu long medel naet, nao yu girap, yu go askem long wan fren blong yu se, ‘?Fren. Yu gat sam hafkakae i stap, we yu save letem long mi? Wan fren blong mi i wokbaot longwe tumas, mo i jes kamtru naoia, be mi mi no gat kakae nating blong givim long hem.’ Mo sipos hem i talem se, ‘Aa, yu gowe. Mi mi satem doa finis. Mi wetem ol pikinini blong mi, mifala i slip finis. Mi no save girap bakegen blong givim kakae long yu.’ ?Bambae i olsem wanem? Mi mi talem long yufala, maet hem i no wantem girap blong givim kakae long yu from we yu yu fren blong hem. Be sipos yu askem long hem plante taem, from we yu yu no sem blong askem, bambae hem i save girap blong givim evri samting long yu we yu yu sot long hem.” Nao Jisas i eksplenem olsem wanem stori ya i joen wetem prea, i se: “From samting ya, mi mi talem long yufala, se sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala. Man we i stap askem samting, oltaem hem i save kasem samting ya. Mo man we i stap lukaot samting, oltaem hem i save faenem samting ya. Mo man we i stap kilkilim doa, oltaem doa i save open long hem.”—Luk 11:5-10.
5. ?Stori blong man ya we i askem fren blong hem plante taem blong givim samting we hem i nidim, i tijim yumi long wanem fasin long saed blong prea?
5 Stori blong man ya we i gohed nomo blong askem, i soemaot fasin we yumi mas gat long saed blong prea. Makem tok blong Jisas se man ya i kasem samting we hem i nidim from we hem i ‘no sem blong askem plante taem.’ (Luk 11:8) Olfala tok ya we i minim ‘no sem blong askem plante taem’ i stap wan taem nomo long Baebol. Tok ya i kamaot long wan Grik wod we i minim “no gat sem.” Sam samtaem, fasin ya blong no gat sem i wan fasin we i nogud, olsem, taem man i gohed blong mekem samting we i no stret mo i no sem from. Be sipos man i gohed blong mekem wan samting from wan gudfala risen mo i no gat sem, hemia wan gudfala fasin. Hemia nao fasin blong man ya long stori blong Jisas. Hem i no sem nating blong askem long fren blong hem plante taem blong i givim samting we hem i nidim. Jisas i yusum fasin blong man ya olsem wan eksampol we yumi mas folem. Hem i soem se sipos yumi wantem samting, yumi mas askem plante taem long ol prea blong yumi. Jeova i wantem se yumi ‘gohed blong askem, gohed blong lukaot, gohed blong kilkilim doa.’ Nao hem bambae i “givim Tabu Spirit long ol man we oli askem long hem.”
6. ?Long taem blong Jisas, wanem tingting blong ol man long saed blong kastom ya blong mekem i gud long man we i kam long haos blong olgeta?
6 Jisas i soemaot fasin we yumi mas gat long saed blong prea, hemia se yumi no mas sem blong askem plante taem. Mo hem i soemaot tu from wanem yumi mas gat fasin ya. Blong luksave poen ya, yumi mas tingbaot ol man we oli lesin long stori ya blong Jisas, mo kastom blong olgeta blong tekem man i kam long haos blong olgeta. Plante vas long Baebol oli soemaot se long taem bifo, ol man oli ting se i impoten tumas blong mekem i gud long ol man we oli kam long haos blong olgeta. Ol man blong God oli bin tinghevi moa long fasin ya. (Jenesis 18:2-5; Hibrus 13:2) Man we i no mekem welkam long narafala we i kam long haos blong hem, hem i mekem wan rabis fasin. (Luk 7:36-38, 44-46) Bambae yumi tingbaot poen ya taem yumi lukluk bakegen long stori blong Jisas.
7. ?From wanem man ya long stori blong Jisas i no sem blong wekemap fren blong hem?
7 Long stori blong Jisas, man ya i kamtru long medel naet. Man blong haos i harem se hem i mas givim kakae long hem, be i “no gat kakae nating blong givim long hem.” !Long tingting blong hem, hemia wan bigfala trabol! !Hem i nidim help kwiktaem! Hem i mas faenem sam kakae, nomata se i hadwok blong faenem. Ale hem i go long haos blong wan fren blong hem, mo i no sem blong wekemap fren ya. Hem i singaot se: “?Fren. Yu gat sam hafkakae i stap, we yu save letem long mi?” Hem i gohed blong askem gogo i kasem samting we hem i nidim. Taem hem i kasem kakae ya, long taem ya nomo, hem i save mekem i gud long man we i kam long haos blong hem.
Moa We Yumi Nidim, Moa We Yumi Askem
8. ?Wanem tingting bambae i pusum yumi blong gohed blong askem tabu spirit long ol prea blong yumi?
8 ?Stori ya i soemaot wanem long saed blong prea? ?From wanem yumi gohed blong askem long prea? Man ya i gohed blong askem kakae from we i impoten tumas we hem i kasem sam kakae, blong hem i save mekemgud wok we hem i mas mekem, hemia blong soem kaen fasin long man we i kam long haos blong hem. (Aesea 58:5-7) Sipos hem i no gat kakae, hem i no save mekem wok ya we hem i mas mekem. Long sem fasin, yumi luksave se yumi mas gat spirit blong God blong yumi save mekem wok blong prij we ol trufala Kristin oli mas mekem. Ale yumi gohed blong prea long God blong askem hem blong givim tabu spirit long yumi. (Sekaraea 4:6) Sipos yumi no gat tabu spirit, yumi no save mekemgud wok ya. (Matiu 26:41) ?Olsem wanem? ?Yu yu lanem wanem impoten poen long stori ya? Sipos yumi gat tingting ya se tabu spirit blong God i wan samting we yumi nidim tumas, bambae yumi no save sem blong gohed blong askem.
9, 10. (a) ?From wanem yumi mas gohed nomo blong askem God blong i givim spirit blong hem long yumi? Talem wan pijatok. (b) ?Wanem kwestin we yumi mas tingbaot, mo from wanem?
9 Blong mekem poen ya i laenap wetem laef blong yumi tede, tingbaot sipos wan memba blong famle blong yu i sik long medel naet. ?Olsem wanem? ?Bambae yu go wekemap wan dokta blong askem help blong hem? Ating bambae yu no mekem olsem sipos sik ya i smol nomo. Be sipos hem i kasem wan hat atak, bambae yu no save sem blong wekemap wan dokta. ?From wanem? From we yu yu fesem wan bigfala trabol. Yu yu luksave se yu nidim help blong wan dokta kwiktaem. Sipos yu no singaot wan dokta, sikman ya i save ded. Long sem fasin, ol trufala Kristin oli stap fesem ol bigfala trabol mo oli nidim help kwiktaem. Yes, Setan i wokbaot “olsem wan laeon we i stap singaot bigwan,” i stap traem blong kakae yumi. (1 Pita 5:8) Blong mekem fasin fren blong yumi wetem Jeova i stap strong oltaem, yumi nidim tumas we tabu spirit i givhan long yumi. Sipos yumi no askem God blong i halpem yumi, bambae yumi save ded. Taswe, yumi no sem blong gohed blong askem long God blong i givim tabu spirit long yumi. (Efesas 3:14-16) Long rod ya nomo, bambae yumi save kasem paoa blong “stanap strong gogo kasem en.”—Matiu 10:22; 24:13.
10 From samting ya, i impoten we sam samtaem yumi tektaem blong tingbaot se: ‘?Mi mi stap gohed nomo blong prea?’ Rimemba, sipos yumi luksave fulwan se yumi nidim help blong God, bambae yumi prea oltaem long hem blong askem tabu spirit.
?Wanem Bambae i Pulum Yumi Blong Prea Wetem Strong Tingting?
11. ?Olsem wanem Jisas i joenem stori blong ol papa mo pikinini blong olgeta wetem prea?
11 Stori blong Jisas long saed blong man we i gohed nomo blong askem kakae, i stap soemaot fasin blong man we i prea—wan man blong bilif. Be narafala stori blong Jisas i soemaot fasin blong Man we i harem prea—Jeova God. Jisas i askem se: “Yufala ol papa. ?I gat wan long yufala we taem pikinini blong hem i askem fis long hem, be hem i girap i givim snek long hem? ?No i gat wan long yufala we taem pikinini blong hem i askem eg long hem, be hem i girap i givim skopion long hem? !Nogat!” Nao Jisas i mekem tok ya i laenap wetem prea i se: “Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.”—Luk 11:11-13.
12. ?Olsem wanem stori blong ol papa we oli givim samting we pikinini blong olgeta i askem i soemaot se Jeova i glad tumas blong givim samting we yumi askem long ol prea blong yumi?
12 Stori ya blong Jisas long saed blong ol papa we oli givim gudfala samting long ol pikinini blong olgeta taem oli askem, i soemaot filing we Jeova i gat long olgeta we oli prea long hem. (Luk 10:22) Fastaem, traem luk olsem wanem stori ya i defren long faswan stori. Fren long faswan stori i no wantem givhan long man ya we i nidim help. Be Jeova i olsem wan papa we i laekem tumas pikinini blong hem, mo i glad blong givim samting we pikinini blong hem i askem. (Ol Sam 50:15) Jisas i i tokbaot olsem wanem Papa blong yumi long heven, i moagud i bitim ol papa long wol ya. Hem i mekem olsem blong soemaot se Jeova i glad tumas blong givhan long yumi. Hem i talem se, ol papa long wol ya we oli “man nogud” no oli sinman, oli givim ol gudgudfala samting long ol pikinini blong olgeta. Be from we Papa blong yumi long heven i moagud, yumi save se hem i glad moa blong givim tabu spirit long ol pikinini blong hem we oli wosipim hem.—Jemes 1:17.
13. ?Yumi save gat strong tingting long wanem samting taem yumi prea i go long Jeova?
13 ?Wanem samting we yumi lanem? Yumi save gat strong tingting se taem yumi askem Papa blong yumi long heven blong i givim tabu spirit long yumi, hem i glad tumas blong givim. (1 Jon 5:14) Taem yumi prea bakegen mo bakegen long Jeova, hem i no save talem se: “Aa, yu gowe. Mi mi satem doa finis.” (Luk 11:7) Jisas i talem se: “Yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.” (Luk 11:9, 10) Yes, Jeova bambae ‘i harem yumi, taem yumi singaot i go long hem.’—Ol Sam 20:9; 145:18.
14. (a) ?Wanem rong tingting we samfala oli gat taem oli kasem traem? (b) ?Taem yumi fesem wan traem, from wanem yumi save prea long Jeova wetem strong tingting?
14 Stori blong Jisas long saed blong ol papa we oli laekem tumas pikinini blong olgeta, i makem tu se Jeova i gud moa i bitim ol papa long wol ya. Taswe, yumi neva mas ting se ol traem we yumi kasem oli soem se God i no glad long yumi. Bigfala enemi blong yumi, Setan, hem i wantem se yumi tingting olsemia. (Job 4:1, 7, 8; Jon 8:44) Baebol i no sapotem nating fasin ya blong daonem no jajem yumi wan bakegen. Jeova i no save mekem “samting nogud” long yumi blong traem yumi. (Jemes 1:13) Hem i no save givim wan traem long yumi we i olsem snek, no wan trabol long yumi we i olsem skopion, nogat. Papa blong yumi long heven hem i givim “ol gudgudfala samting long ol man we oli askem samting long hem.” (Matiu 7:11; Luk 11:13) Tru ya, sipos yumi kasem save moa long gudfala fasin ya blong Jeova mo fasin blong hem blong wantem tumas blong halpem yumi, bambae yumi prea wetem tingting we i strong moa. Nao yumi save talem olsem man blong raetem Sam ya: “[God] i lesin long prea blong mi, i harem tok blong mi.”—Ol Sam 10:17; 66:19.
?Olsem Wanem Tabu Spirit i Givhan?
15. (a) ?Jisas i mekem wanem promes long saed blong tabu spirit? (b) ?Tabu spirit i stap givhan long yumi long wanem rod?
15 Smoltaem bifo we Jisas i ded, hem i talem bakegen promes ya we hem i bin mekem long tufala stori ya. Long saed blong tabu spirit, hem i talem long ol aposol blong hem se: “Bambae mi mi askem long Papa blong mi, mo hem bambae i givim wan narafala samting blong givhan long yufala, we i save stap oltaem, i no save finis.” (Jon 14:16, NW ) Olsem nao, Jisas i mekem promes se wan samting blong givhan, hemia tabu spirit, bambae i stap wetem ol man blong hem long ol yia afta we hem i aot long olgeta, kam kasem taem blong yumi tede. ?Tede, tabu spirit i stap givhan long yumi long wanem impoten rod? Hem i givhan long yumi blong stanap strong tru long ol traem. ?Olsem wanem i mekem olsem? Aposol Pol i fesem plante trabol mo traem, mo long leta we hem i raetem i go long ol Kristin long Korin, hem i eksplenem olsem wanem tabu spirit blong God i halpem hem. Bambae yumi lukluk smol long ol tok ya we hem i raetem.
16. ?Wanem samting we i save kamaot long laef blong yumi we i sem mak long samting we i hapen long Pol?
16 Fastaem, Pol i talem klia long ol Kristin brata sista blong hem se i gat wan ‘nil blong aranis we i stap stikim hem,’ hemia wan traem. Nao hem i gohed se: “Tri taem mi askem long Masta blong yumi [Jeova], blong hem i tekemaot.” (2 Korin 12:7, 8) Pol i askem bakegen mo bakegen blong God i tekemaot trabol ya, be trabol ya i stap nomo. Maet yu tu yu fesem wan traem olsem tede. Maet yu prea plante taem wetem strong tingting blong askem Jeova blong tekemaot trabol ya, olsem Pol i bin mekem. Be trabol ya i stap nomo. ?Olsem wanem? ?Hemia i soemaot se Jeova i no stap harem ol prea blong yu mo se spirit blong hem i no stap givhan long yu? !I no olsem nating! (Ol Sam 10:1, 17) Tingbaot ol narafala tok we aposol Pol i talem.
17. ?Olsem wanem Jeova i ansa long ol prea blong Pol?
17 Blong ansa long ol prea blong Pol, God i talem long hem se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” Pol i talem se: “From samting ya, mi mi glad moa blong tok flas from ol samting we i soemaot we mi mi no gat paoa. Long fasin ya, mi save harem we Kraes i stap lukaot long mi long paoa blong hem [“olsem wan haos tapolen we i kavremap mi,” NW ].” (2 Korin 12:9; Ol Sam 147:5) Taswe, Pol i harem se tru long Kraes, God i stap protektem hem olsem wan haos tapolen we i kavremap hem. Tede, Jeova i ansarem ol prea blong yumi long sem fasin. Hem i protektem ol man blong hem, olsem we i yusum wan samting blong kavremap no blokem olgeta.
18. ?From wanem yumi naf blong stanap strong tru long ol traem?
18 Wan haos tapolen i no save stopem ren blong i no foldaon, mo i no save stopem win blong i no blu. Be hem i blokem yumi long ren mo win, blong oli no spolem yumi. Long sem fasin, ‘paoa blong Kraes’ we i protektem yumi i no stopem ol traem mo trabol blong oli no kasem yumi, nogat. Be hem i protektem fasin fren blong yumi wetem Jeova, nao ol rabis fasin blong wol ya mo paoa blong rula blong hem, Setan, i no save spolem yumi. (Revelesen 7:9, 15, 16) From samting ya, sipos yu stap fesem wan traem mo Jeova i no “tekemaot” traem ya, yu save gat strong tingting se Jeova i stap luk bigfala traehad blong yu. Hem i harem yu finis taem ‘yu krae i go long hem,’ mo hem i stap ansa long yu. (Aesea 30:19; 2 Korin 1:3, 4) Pol i raetem se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.”—1 Korin 10:13; Filipae 4:6, 7.
19. ?Yumi mas gat strong tingting blong mekem wanem, mo from wanem?
19 I tru se “ol las dei” blong rabis wol ya oli ‘strong tumas, [mo] i had blong winim ol trabol.’ (2 Timoti 3:1, NW ) Nating se i olsem, yumi ol man blong God yumi gat rod blong stanap strong tru long ol trabol ya. ?Wanem rod? Tabu spirit blong God i save givhan long yumi mo protektem yumi. Mo Jeova i glad blong givim fulap tabu spirit long olgeta we oli gohed nomo blong askem long hem wetem strong tingting. From samting ya, yumi mas strong blong gohed blong prea evri dei blong askem tabu spirit.—Ol Sam 34:6; 1 Jon 5:14, 15.
?Bambae Yu Yu Ansa Olsem Wanem?
• ?Yumi mas mekem wanem blong kasem tabu spirit blong God?
• ?From wanem yumi save gat strong tingting se Jeova bambae i ansa long ol prea blong yumi blong askem tabu spirit?
• ?Olsem wanem tabu spirit i givhan long yumi blong stanap strong tru long ol traem?
[Tok blong pija long pej 9]
?Yumi lanem wanem long stori blong Jisas long saed blong man we i gohed nomo blong askem fren blong hem blong givim kakae?
[Tok blong pija long pej 10]
?Yu yu stap gohed nomo blong prea long God, blong askem tabu spirit blong hem?
[Tok blong pija long pej 11]
?Stori blong ol papa we oli lavem ol pikinini blong olgeta i tijim yumi long wanem samting long saed blong Jeova?