Ebraham—Wan Man We i Bilif Long God

Ebraham i stanap afsaed long naet, ples i kwaet gud, i no gat win. Taem hem i lukluk i go antap long skae, hem i luk ol sta we oli stap saen. Hem i tingbaot promes blong God se ol pikinini we oli kamaot biaen long hem, bambae oli plante olsem ol sta long skae. (Jenesis 15:5) Ol sta oli olsem wan saen blong soemaot we God bambae i mekem promes blong hem i kamtru. Sipos Jehova i gat paoa blong mekem heven mo wol wetem olgeta samting we i stap long hem, hem i save mekem Ebraham mo Sera tufala i gat pikinini. Hemia nao strong bilif we Ebraham i gat long God.

?MAN WE I BILIF LONG GOD I OLSEM WANEM? Taem Baebol i yusum tok ya “bilif,” hem i stap tokbaot man we i gat strong bilif long wan samting we hem i no save luk, be hem i save pruvum se samting ya i tru. Man we i bilif long God i putum tingting blong hem i stap long ol promes blong God. Long tingting blong hem, i olsem se ol promes ya oli kamtru finis, from we hem i save se oli tru.

?EBRAHAM I MEKEM WANEM BLONG SOEMAOT SE HEM I BILIF LONG GOD? Ebraham i soemaot se hem i bilif long ol promes blong God. From we Ebraham i bilif long Jehova, hem i lego kantri blong hem. Hem i save se Jehova bambae i holem promes blong Hem blong soemaot wan narafala kantri long hem. From we Ebraham i bilif long God, hem i wokbaot olbaot long kantri ya Kenan. Hem i save se ol pikinini we oli kamaot biaen long hem bambae oli tekem graon ya i blong olgeta. Mo from we Ebraham i bilif long God, hem i obei taem God i talem long hem blong i kilim Aesak i ded blong mekem sakrefaes. Hem i save se sipos Aesak i ded, bambae Jehova i mekem hem i laef bakegen.—Hibrus 11:8, 9, 17-19.

Ebraham i putum tingting blong hem i stap long samting we bambae i hapen, i no long samting we i hapen finis. I tru se Ebraham mo Sera tufala i gat plante samting taem tufala i stap long Uru, i winim ol samting we tufala i gat long Kenan. Be ‘tingting blong tufala i no stap gobak long ples blong tufala, we tufala i aot long hem finis.’ (Hibrus 11:15) Tufala i putum tingting blong tufala i stap long samting we God bambae i mekem blong blesem tufala mo ol pikinini we oli kamaot biaen long tufala.—Hibrus 11:16.

?Olsem wanem? ?Ol promes we Ebraham i bilif long olgeta oli kamtru? Yes. Jehova i mekem olgeta promes blong hem oli kamtru. Ol pikinini we oli kamaot biaen long Ebraham oli plante we plante, nao oli kam neson blong Isrel. Biaen, oli tekem kantri ya Kenan i blong olgeta. Kantri ya nao we Jehova i promes blong givim long Ebraham.—Josua 11:23.

?YUMI LANEM WANEM? Yumi save trastem Jehova se bambae hem i mekem ol promes blong hem oli kamtru. Maet sam man oli ting se ol promes blong God oli no save kamtru. Be yumi gat strong tingting se “God i save mekem olgeta samting.”—Matiu 19:26.

Narafala samting we yumi lanem long fasin blong Ebraham, hemia se yumi mas putum tingting blong yumi long laef we bambae yumi harem gud long hem, be i no long laef blong yumi bifo. Hemia nao wanem we Jason i mekem. Hem i harem nogud from wan strong sik we i mekem se bodi blong hem i ded. Hem i talem se: “I tru, samtaem mi stap tingting long laef blong mi bifo.” Mo hem i se: “Ol samting we oli mekem mi harem nogud tumas hemia ol smosmol samting we mi no moa save mekem. Wan long ol samting ya, hemia se mi no moa save putum han blong mi i goraon long woman blong mi Amanda.”

Be Jason i bilif strong se Jehova bambae i mekem ol promes blong hem oli kamtru. Wan long ol promes ya se i no longtaem bambae wol i kam wan paradaes, mo ol man we oli bilif long God bambae oli laef olwe we oli no moa sik.a (Ol Sam 37:10, 11, 29; Aesea 35:5, 6; Revelesen 21:3, 4) Jason i talem se: “Oltaem mi tingbaot se laef we i beswan bambae i kamtru yet. I no longtaem bambae olgeta trabol oli finis. Bambae i no moa gat ol samting we oli mekem yumi tingting tumas, yumi wari, yumi harem nogud, mo yumi harem se yumi mekem i no stret. Olgeta trabol bambae oli lus blong olwe.” !I gud yumi folem gudfala fasin blong Jason we i bilif strong long God olsem Ebraham!

[Futnot]