Ol Enjel—?Oli Gat Paoa Long Yu?

Long wan Sande aftenun, Kenneth mo Filomena, we tufala i laef long Curaçao, oli go visitim wan man mo waef blong hem we oli stap mekem Baebol stadi blong tufala.

Kenneth i talem se, “taem mitufala i go, doa blong haos i sat mo trak i no stap. Be mi harem se mi mas ringim waef blong man ya. Ale mi ring.”

Woman ya i ansa mo i talem se hasban blong hem i go wok. Be taem hem i kasemsave se Kenneth mo Filomena i stap afsaed, hem i kam openem doa mo i singaot tufala i go insaed.

Tufala i luksave se hem i stap krae. Taem Kenneth i stat blong prea blong statem Baebol stadi, woman ya i stat krae bakegen. Ale wetem kaen fasin Kenneth mo Filomena i askem sipos wan samting i rong.

Woman ya i talem se hem i wantem kilim hem wan i ded long aftenun ya, mo hem i stap raetem leta long hasban blong hem taem Kenneth i ring. Hem i se hem i harem nogud tumas from sik ya dipresen, ale tufala i soem sam vas blong Baebol blong leftemap tingting blong hem. Ol tok ya oli sevem laef blong hem.

Kenneth i se: “!Mitufala i talem tangkiu long Jehovaa from we hem i letem mifala i givhan long woman ya, mo from we hem i yusum wan enjel o tabu spirit blong hem blong mekem se mitufala i ringim hem!”

?I stret we Kenneth mo Filomena i bilif se God i yusum wan enjel o tabu spirit blong mekem tufala i ringim woman ya? ?O woman ya i sef, jes from we Kenneth i ring long stret taem?

Yumi no save stret. Be samting we yumi save se God i stap yusum ol enjel blong hem blong halpem ol man. Eksampol, Baebol i tokbaot se God i yusum wan enjel blong i lidim Filip i go long wan man Itiopia we i wantem save moa long Baebol.—Ol Wok 8:26-31.

Plante jos oli bilif se i gat ol enjel, mo oli bilif se sam long ol enjel ya oli kaen, oli stap mekem wok blong God, mo oli stap lukaot long ol wanwan man. Sam narafala oli no bilif nomo se i gat ol enjel, be oli bilif tu se ol enjel oli save gat bigfala paoa long man. Be sam narafala oli no bilif nating se i gat ol enjel.

?Ol enjel oli rili stap? Sipos yes, ?hu i wokem olgeta? ?Wanem trutok long saed blong ol enjel? ?Oli save gat paoa long laef blong yu? I gud yumi faenem ansa blong ol kwestin ya.