Halpem Ol Nyuwan Mo Olgeta We Oli No Gat Ekspiryens Blong Yusum Baebol

¹ I gud tumas blong luk se plante taosen nyufala pablisa oli stap joen wetem yumi long impoten wok blong talemaot Kingdom. Be, olgeta ya oli nidim blong kasem moa tijing, blong oli save gat gudhan mo karem frut long wok blong talemaot “gud nyus.” Jisas Kraes i givim eksampel long yumi taem hem i talem ol tok blong lidim ol disaepol blong hem. Hem i sanem sevente man oli go prij, nao hem i talem long olgeta, i se: ‘Taem yufala i go stap long wan haos, fastaem yufala i mas talem se, “Pis bambae i stap wetem yufala long ples ya.” Taem we yufala i go insaed long wan velej, mo olgeta oli tekem yufala i go insaed long ol haos blong olgeta, yufala i mas talemaot long olgeta se, “Kingdom blong God i stap kolosap long yufala.” ’​—Luk 10:​5, 8, 9.

² Tede, plante we oli joen long wok blong prij, oli mekem wan gudfala wok taem oli givimaot plante magasin. Sam narafala, oli yusum ol magasin, be antap long hemia, oli kasem nambawan frut taem oli pulum tingting blong ol man “from ol tok blong Baebol.” (Ridim Ol Wok 17:​2-4.) !I gud tumas sipos plante moa pablisa oli save kasem help blong yusum Baebol long sem fasin ya!

³ Olgeta we oli stap mekem ol Baebol stadi, oli gat jans blong halpem ol studen blong olgeta blong yusumgud Tok blong God. Oli save leftemap tingting blong studen blong yusum ol save we hem i stap lanem. Eksampel, taem oli stap stadi long japta fo blong Laef Foreva buk, (“God​—?Hem i Hu?”), brata no sista we i stap lidim stadi i save askem long studen se, ‘?Olsem wanem yu save eksplenem long wan fren blong yu se i no gat wan Triniti? ?Wanem ol vas we yu save ridim long hem?’ Long en blong stadi, maet hemia we i lidim stadi i askem long studen blong yusum Baebol blong eksplenem long hem se God hem i hu. Sipos hem i gohed oltaem blong givhan long studen ya blong yusum ol samting we hem i stap lanem, bambae studen i naf blong yusum Baebol long smol fasin, taem hem i stat blong joen long wok blong prij. Bambae hem i save olsem wanem blong eksplenem ol bilif blong hem, mo soemaot klia from wanem ol bilif ya oli tru. Nao biaen, taem hem i prij wetem ol narafala pablisa we oli gat ekspiryens, bambae hem i gohed moa. Bambae hem i lanem plante samting from eksampel mo ol toktok blong olgeta, nating se hem i baptaes finis.

⁴ Ol papa mama nao oli gat moa jans blong halpem ol pikinini blong olgeta. Oli mas yusum sam taem long stadi we oli stap mekem wetem famle, blong trenem ol pikinini blong yusum Baebol. Taem oli stap storeyan long ol trabol we i kamaot long skul, maet ol papa mama oli save askem ol pikinini blong soem sam vas long Baebol blong sapotem disisen we oli mekem long ol taem olsem. Mo tu, oli save askem ol pikinini blong mekemrere sam toktok, we oli save yusum blong givim ansa long ol man we oli traem blong blokem storeyan long wok blong prij. Taem i gat sam gudfala poen long Baebol stadi we oli save yusum long wok blong prij, ol papa mama oli save makemgud ol poen ya.

⁵ Sem mak, ol brata we oli lukaot long wan buk stadi long kongregesen, oli gat jans blong halpem ol pablisa long grup blong olgeta blong kamgud moa long fasin blong yusum Tok blong God. Maet ol brata ya oli save toktok wetem elda we i lukaot long wok blong prij blong faenemaot hu i nidim help, mo wanem we oli save mekem blong givhan long olgeta. Sipos samfala we oli joen wetem kongregesen longtaem finis oli stap seremaot ol magasin nomo long wok blong prij, ?wanem samting i save givhan long olgeta blong gohed moa blong yusum Baebol? ?Maet oli nidim help blong mekemrere sam toktok we i stanap long wan no tu vas blong Baebol we oli savegud? Sipos brata we i lukaot long buk stadi no wan narafala pablisa we i gat gudhan blong yusum Baebol, i prij wetem olgeta, maet samting ya i givhan long olgeta. Maet sam samtaem, i gat wan vas we i kamaot long buk stadi we i gud blong yusum long wok blong prij. Nao brata we i lidim stadi i save tekem smoltaem blong soem olsem wanem blong yusum vas ya.

⁶ !Taem yumi ekplenem Baebol long ol man long ples blong yumi, hemia i wan bigfala blesing long olgeta! Taem yumi traehad blong yusum Baebol long ol storeyan blong yumi, yumi stap givhan long ol man we oli gat gudhat, blong luksave gudfala samting we i save kamaot from stadi long Tok blong God. ?Yu ting se hemia i wan gudfala mak blong kasem?