Yumi Mas Gat Gudfala Tingting Long Saed Blong Ol Man
1 Gudfala tingting long saed blong ol man i save givhan plante long yumi blong yumi kasem glad mo karem frut long wok blong prij. Taem yumi talemaot gud nius, nating sipos long ol haos wanwan, no long ol rod no long narafala ples bakegen, yumi mas tingbaot se bambae yumi karem gudfala frut. Yumi mas toktok long wanwan man, mo tingbaot olgeta olsem se oli ol sipsip, mo se bambae oli lesin long gud nius blong Kingdom. Taem Jisas i sanem ol disaepol blong hem oli goaot, hem i givim advaes ya: “Taem yufala i go stap long wan haos, yufala i mas toktok gud long olgeta se, ‘Pis i stap wetem yufala.’ ” (Mat. 10:12, 13) Yumi no mas jajem olgeta fastaem se maet ‘oli no glad long yumi.’ !Yumi mas gat gudfala tingting long saed blong ol man! ?Olsem wanem yumi save gat gudfala tingting long saed blong ol man taem yumi prij?
2 Toktok Wetem Bilif: !Yumi stap prij, i no blong talemaot wan narafala jos nomo, be blong talemaot trutok we i save lidim man i go long laef! Yumi save wanem bambae i hapen long fiuja. Yumi save from wanem tede ol man oli fesem hadtaem mo wanem samting ol man we hat blong olgeta i stret oli mas mekem blong luksave rod blong stretem ol trabol ya. Bilif ya i mas halpem yumi blong toktok olsem ol aposol. Ol aposol bifo oli toktok we oli no fraet nating, mo ol enemi blong olgeta tu oli luksave samting ya. Makem Ol Wok 4:13, we i talem se: “Ol memba blong Kaonsel ya oli sapraes tumas, from we oli luk we Pita mo Jon, tufala i no seksek nating. . . . Nao oli save we tufala i bin stap wokbaot wetem Jisas.”
3 Ol toktok we yumi talem i save givhan long yumi blong kasem hat blong olgeta we oli lesin. Yumi no save kasem gudfala ansa sipos yumi no yusum ol gudfala tok. Mo bambae ol tok blong yumi oli no save kasem hat blong wan man mo pusum hem blong wok. Gudfala frut i save kamaot moa taem yumi talem ol gudfala toktok olsem: “Mi sua we yu yu luksave se i impoten blong lanem moa long saed blong Baebol.” Sipos no, yu save talem se: “Mi mi glad blong lego buk ya wetem yu. Hem i nambawan blong halpem yu blong stadi Baebol mo bambae i givhan bigwan long yu mo famle blong yu.”
4 Tokbaot Ol Gudfala Samting: Taem yumi prij, plante taem yumi tokbaot ol problem long wol. Be i nogud blong tokbaot ol trabol ya longtaem tumas. I gud blong jenisim kwiktaem i go long rod we God bambae i yusum blong stretem ol trabol ya mo tokbaot ol blesing we bambae oli tekem ples blong ol trabol we yumi luk tede. Yumi mas traem faenem ol gudfala toktok we bambae i halpem man blong haos blong luksave se ol tok we yumi talemaot i rili gud nius.
5 Taem yumi gat gudfala tingting long saed blong ol man we yumi talemaot gud nius long olgeta, bambae yumi kasem moa glad long wok blong prij. Bambae yumi luk wanwan man olsem ol man we bambae yumi mekem Baebol stadi long olgeta long fiuja, ol man we oli nidim trutok. Mo taem sam man oli no wantem lesin no oli toktok strong long yumi, bambae tingting blong yumi i no foldaon from. Hem i wan bigfala blesing blong gat stret save blong trutok we i mekem yumi fri. I sua se yumi wantem givimaot save ya long fasin we i soem long ol man se hem i wan gudfala samting tumas.