Yumi Stap Talemaot Gud Nius
1 !Hemia wan nambawan presen we yumi gat blong karem “gud nius long saed blong ol gudfala samting” long ol man! (Rom. 10:15 NW) Yumi gat wan nambawan mesej blong serem wetem ol man, we tingting blong olgeta i foldaon, from ol trabol raonabaot long olgeta. ?Olsem wanem yumi save givhan long olgeta blong luksave se mesej we yumi talemaot hem i “gud nius blong samting we i moa gud”?—Aes. 52:7, NW.
2 Rerem Wan Mesej We i Leftemap Tingting: Ol storeyan blong yumi long wok blong prij, oli save givhan moa long man, sipos yumi tokbaot ol gudfala samting. Taswe, taem yumi rerem storeyan blong yumi mo yumi lukluk bakegen long buk we bambae yumi seremaot, yumi mas yusum ol poen we oli leftemap tingting blong man. Taem yumi tokbaot hop blong yumi we i stanap long Baebol, wetem bilif mo bigfala glad, yumi sua se bambae i gat gudfala frut i kamaot from.—Prov. 25:11.
3 Nating se yumi gat sore long man taem oli tokbaot ol trabol we oli kasem from we wol i kam nogud, yumi mas soemaot long olgeta trufala rod blong winim ol problem blong man, hemia Kingdom blong God. Mo tu, taem yumi tokbaot “dei ya we hem [Jeova] i makem finis blong givimbak,” yumi wantem soemaot olsem wanem samting ya i rili wan “gud nius” blong olgeta we tingting blong olgeta i stap daon. (Aes. 61:1, 2) Yumi save eksplenem long olgeta we oli lesen long yumi, se evri samting we Jeova bambae i mekem, bambae i karem frut mo bigfala glad
4 Tokbaot Trutok Wetem Trufala Glad: Taem ol man oli luksave se fes blong yumi i glad mo yumi toktok wetem bilif, bambae oli glad moa blong lesin long yumi. Sipos yumi soem se yumi gat wan gudfala tingting long saed blong fiuja, ol man we oli lesin long yumi oli luksave se ‘yumi harem gud’ from we ‘tingting blong yumi i stap strong long God.’ (Rom. 12:12) Ating oli moa glad blong obei long gud nius. I tru se, yumi gat gudfala risen blong oltaem soemaot wan gudfala tingting, mo fasin glad long ol defren haf blong minista wok blong yumi.
5 Olsem ol man we oli talemaot gud nius, yumi mekem moa bitim we yumi jes talemaot mesej ya. Wok blong prij we yumi mekem i givhan long ol man blong gat wan trufala hop blong wan laef we i moa gud naoia mo long fiuja tu. (1 Tim. 4:8) Taem yumi go blong storeyan long wan man, bambae man ya i luksave gudfala tingting blong yumi from ol samting we yumi tokbaot. Mo samting ya bambae i halpem hem blong akseptem gud nius. !Taem yumi tingting gud long samting we yumi tokbaot mo fasin blong yumi blong tokbaot samting ya, yumi leftemap tingting blong ol man we hat blong olgeta i stret blong obei long nambawan nius ya we yumi stap talemaot!