Folem Fasin Blong Jeova, “Hapi God” Blong Yumi
1 Jeova i wantem we ol man oli glad. Taem yumi ridim Tok blong hem, yumi wantem tumas blong luk ol nambawan blesing we hem i rerem blong ol man. (Aes. 65:21-25) Ol narafala oli mas luk se yumi glad taem yumi joen blong talemaot “nambawan gud nius blong hapi God ya.” (1 Tim. 1:11, NW ) Fasin blong yumi mo ol tok we yumi yusum taem yumi tokbaot Kingdom i mas soemaot se yumi laekem trutok mo se yumi rili intres long ol man we yumi stap toktok wetem olgeta.—Rom 1:14-16.
2 I tru se samtaem i hadwok blong stap glad. Long sam ples, yumi faenem smol man nomo we oli wantem lesin long gud nius blong Kingdom. Mo tu, i gat sam dei we yumi fesem hadtaem long laef blong yumi wanwan. Blong gohed blong stap glad, yumi mas tingbaot olsem wanem ol man long ples blong yumi oli nidim tumas blong harem mo kasem save long gud nius blong Kingdom we yumi stap talemaot. (Rom 10:13, 14, 17) Sipos yumi tingting dip long samting ya, hemia bambae i givhan long yumi blong gohed wetem glad blong talemaot rod blong sevem ol man we Jeova i mekem from we hem i sore long olgeta.
3 Tokbaot Ol Gudfala Samting: Mo tu, yumi mas tingting gud long samting we bambae yumi tokbaot. Maet blong statem toktok blong yumi, yumi tokbaot wan trabol no wan nius we ol man oli save long hem, be yumi no mas mekem wan longfala storian long saed blong ol trabol nomo. Wok blong yumi i ‘blong karem gud nius, we i nius blong pis.’ (Aes. 52:7; Rom 10:15) Gud nius ya i stanap long promes blong God long saed blong wan gudfala fiuja. (2 Pita 3:13) Samting ya i mas stap long tingting blong yumi taem yumi yusum Baebol blong “mekem ol man we tingting blong olgeta i foldaon olgeta, oli harem gud bakegen.” (Aes. 61:1, 2) Hemia bambae i givhan long yumi wanwan blong holemtaet glad blong yumi mo blong gat gudfala tingting.
4 Ol man bambae oli makem glad blong yumi taem yumi stap prij. Taswe, taem yumi stap talemaot gud nius blong Kingdom long ol man long ples blong yumi, oltaem yumi mas tingbaot se God blong yumi Jeova, i wan “hapi God.”