Yumi Statem Sam Stadi Wetem Laef Foreva Buk
1 Jisas Kraes i gat “ol tok blong laef ya we i no save finis.” (Jon 6:68) ?Hu i givim ol tok ya long hem? Long wan prea we hem i talemaot i go long Jeova, hemia nao wan ansa we hem i givim long kwestin ya: “Ol tok we yu yu givim long mi, mi mi givim long olgeta.” (Jon 17:8, NW) Long fasin ya nao, Jisas i talemaot long ol disaepol blong hem ol rul we Papa blong hem i bin talemaot long hem, blong mekem se ol sinman ya we oli mas ded nomo oli save wei blong fren wetem Jeova mo oli kasem laef foreva from.
2 Jisas i save se taem ol disaepol blong hem oli kasem save ya we i blong givim laef, bambae oli no holemtaet save ya blong olgeta nomo, no gat. Bambae oli save givhan long ol narafala man blong olgeta tu oli harem gud, “long tok blong olgeta.” (Jon 17:20) Long taem blong yumi naoia, moa long 4 milyan man oli ‘kasem save ya we i minim laef we i no save finis.’ (Jon 17:3, NW) Ol man ya oli kasem bigfala save ya we i kam long Jeova mo i save givim laef long olgeta. Mo tu, oli gat bigfala jans blong mekem ol narafala oli save ol samting ya.
3 I klia nomo se Laef Foreva buk i wan nambawan tul we yumi save yusum blong seremaot ol “tok blong givim laef we i no save finis.” Yumi wantem se ol man ya oli save gud long mining blong ol tok ya. Taswe yumi mas soemaot long olgeta olsem wanem ol vas ya we yumi talemaot long stampa tok blong prij blong yumi i joengud wetem ol tingting we buk ya i tokbaot. ?Olsem wanem blong kasem mak ya?
SAM GUDFALA PIJA TOK
4 Sipos yu ridim finis Jon 17:17, yu save talem se: “I klia nomo se Jisas i tingbaot Baebol olsem Tok blong God. Be, plante man tede oli wantem save sipos Baebol i tru no olsem wanem. ?Maet yu tu yu tingting finis long kwestin ya? [Yu wet blong man i ansa.] Mi mi faenem sam gudfala poen insaed long buk ya mo mi ting se yu tu yu wantem save ol samting ya.” Ridim haf 21, pej 53. Yu save storebaot sam samting we oli pruvum trutok blong Baebol long saed blong sayens, no sam kwestin we oli laenap wetem histri. No maet yu save talem long man ya se Baebol i talemaot longtaem bifo sam samting we bambae oli kamaot long fyuja. Blong finisim tok blong yu, yu save talemaot wanem i stap long ol pej 54 mo 55, no maet yu save yusum ol tok we i stap long pej 56, haf 28. Biaen, soemaot buk ya.
5 Wan narafala rod we yu save folem, hemia: Taem we yu ridim Jon 17:17 mo yu talemaot finis mining blong hem, yu save talem se: “Sipos wan store i tru, ol samting we hem i talem oli mas tru tu. Baebol i talem se i gat rod blong laef blong olwe. Taswe yumi save askem sam kwestin long yumi: ‘?Ol tok ya oli gyaman, no oli tru? ?I gat sam samting we oli save pruvum we tok ya i tru?’ Maet yu wantem save wanem samting sam man blong save oli faenemaot long saed ya, sipos ol man oli save laef blong olwe, no no gat. Yu luk ol tok we i stap long ples ya.” Yu save ridim haf 4 pej 7. Mekem sam tok blong pulum man blong kasem gud save long Baebol, mo seremaot buk. Yu save yusum sam narafala poen we oli stap long buk ya, samting ya i stap dipen nomo long ol nid blong man ya.
YUMI STATEM SAM BAEBOL-STADI FASTAEM NOMO
6 ?Yu yu traem finis blong statem wan Baebol-stadi fastaem nomo? I no longtaem tumas, wan sista i talem se wan man i rere blong goaot long ples blong hem blong go putum wan leta long postofis. Ale, hem i givim buk Laef Foreva long hem, nao hem i soemaot long man ya olsem wanem blong stadi long buk ya mo hem i promes blong kambak blong gohed long stadi ya. Nao taem sista ya i rere blong go, man ya i talem long hem se hem i wantem sanem leta blong hem i go long wan jyos blong askem wan Baebol-stadi.
7 ?Olsem wanem yumi save mekem blong statem wan Baebol-stadi fastaem nomo? Sipos man i tekem buk finis, yu save talem se: “Buk ya mifala i rerem blong ol man oli ridim hem. Mo tu, man i save stadi long buk ya blong go dip long Baebol. Yu luk, long en blong ol pej, i gat sam kwestin we oli stretgud wetem ol haf mo ol vas blong Baebol we oli stap long ol haf. Blong givhan long ol man, mifala i save mekem wan Baebol-stadi we i fri nomo long ol man we i wantem. Sipos yu gat smol taem, mi mi glad blong soemaot long yu olsem wanem mifala i mekem ol toktok ya wetem ol man.” Biaen, yu save toktok gud wetem man ya, mo storebaot sam haf long faswan japta no maet long wan narafala japta bakegen we man blong haos i intres long hem.
8 !I gud yumi hadwok oltaem blong joengud tugeta mo blong halpem ol narafala man, blong oli kasem save ya we i save givim laef long olgeta! !Jeova bambae i blesem wok ya blong yumi!