Yumi Talemaot Tok Blong God, We Tingting Blong Yumi i Strong
1 Jeova God i mekem plante gudfala samting mo hem i strong blong mekem olsem. Ol samting we hem i mekem oli halpem gud ol man we oli mekem wok blong hem. Jisas i mekem sem mak long Papa blong hem, hem tu i wok strong. Hem i soemaot fasin ya long yumi, blong bambae yumi biaen long hem. Jisas i wok strong blong mekem we haos blong Jeova i stap klin oltaem, ale wan taem, hem i ronemaot ol man we oli stap mekem bisnes insaed long haos blong God. (Jon 2:14-17) Long sem fasin, yumi tu yumi mas wok strong blong ol man oli luksave se yumi man blong God from we “yumi strong blong mekem ol gudfala samting.”—Taet. 2:14.
2 Ol gudfala wok we ol Kristin oli stap mekem oli save givhan bigwan long ol man raonabaot long olgeta. Sipos yumi givhan long wan man blong hem i kasem save mo hem i mekem wok blong Jeova, yumi rili givhan long hem. Wok ya we yumi stap mekem i impoten moa bitim ol narafala samting we yumi save mekem. (Jon 17:3) Sipos yumi wok strong blong talemaot Kingdom mo blong mekem disaepol, yumi stap givhan long ol man we oli nidim help.
3 ?Fasin blong gat strong tingting blong mekem wan wok i olsem wanem? Fasin ya i kamaot long hat blong man, ale man i wok strong oltaem. Sipos wan Kristin i rili wantem mekem samting we i stret mo samting we i tru, bambae hem i gat strong tingting blong mekem wok blong Jeova. “Fasin blong gat strong tingting blong mekem wan wok” i kamaot long wan Grik tok we i min se “i boel”. Yumi minista blong God, taswe taem yumi go talemaot mesej blong Kingdom yumi mas gat strong tingting blong mekem wok. ?Olsem wanem long yu, yu yu wok strong long minista wok? ?Yu yu rili mekem olgeta samting blong halpem ol narafala man blong oli kasem save long ol plan blong Jeova?
Yumi Mekem Tingting Blong Yumi i Strong Blong Seremaot Ol Buklet
4 Long manis Ogis, bambae yumi gat bigfala jans blong seremaot wan buklet blong 32 pej. Bambae yumi save seremaot ol buklet Yu Yu Save Laef Foreva Long Wol, “Look, I Am Making All Things New”, Should We Believe In Trinity?, Divine Name, no Gavman Ya We Bambae i Mekem Paradaes. Yumi mas reregud blong save se long ol buklet ya weswan i stret gud long ples we bambae yumi prij long hem mo weswan i stret long ol man we bambae yumi mitim olgeta long evri doa.
5 Sipos yumi gat strong tingting blong mekem gudfala wok, yumi mas reregud fastaem. ?Olsem wanem long yu? ?Yu save finis wanem stampa tok blong prij yumi yusum long manis ya? ?Olsem wanem bambae yu seremaot buklet long man? ?Wanem poen bambae yu tokbaot? Yumi mas tektaem blong ridim ol faef buklet we yumi gat mo yumi mas mekem tingting blong yumi i strong from ol tok we yumi faenem long ol buklet ya. Sipos yumi mekem olsem, bambae yumi gat strong tingting blong seremaot ol buklet ya taem yumi prij, from we yumi rere gud.
Sam Advaes Blong Seremaot Ol Buklet
6 Taem yumi talem halo finis long man, biaen yumi save talem se: “?Maet yu tu yu wantem save sipos God bambae i stretem ol nogud fasin we oli stap kamaot long wol tede? [Letem man i ansa.] Baebol i talem we i no longtaem, God bambae i spolem ol man nogud. [Ridim Sam 92:7.] ?Sipos i olsem, hu bambae i lidim yumi mo i protektem yumi? [Ridim Sam 145:20.] Sipos yumi wantem sef, i gat wan rod nomo: Yumi mas frengud wetem man ya we i wokem yumi, Jeova God. Yumi mas tintinggud long ol gudfala blesing we God i save givim long ol man we oli obei long hem.” Yu yu save tekem buklet Yu Yu Save Haremgud Blong Olwe Long Wol mo yu yu save soemaot pija 49. Ridim ol tok we i stap kolosap long pija ya mo tokbaot ol blesing we pija i soemaot. No maet yu save openem buklet Gavman Ya We Bambae i Mekem Paradaes long pej 29 mo yu save tokbaot ol blesing we i stap long pej ya. Maet sam narafala oli laekem moa blong yusum ol haf 49 mo 50 blong buklet “Look” blong eksplenem ol samting we Kingdom blong God bambae i mekem blong ol man.
7 Tede, taem i sot, en i kolosap nomo, mo mesej we yumi stap talem long ol man i impoten tumas. From samting ya nao, yumi mas wok strong blong talemaot mesej blong Kingdom, mo yumi mas halpem ol narafala blong oli save God mo Baebol. Sipos yumi wok strong blong tijim ol man long ol gudfala samting we oli save kasem laef from, yumi soemaot we yumi fasgud long Jeova mo yumi laekem hem. Tingbaot ol kwestin ya yu wan: ‘?Mi mi strong blong mekem ol gudfala wok? ?Mi mi wokhad mo mi rili givim ful paoa blong mi long wok blong prij?’ Ansa blong yu long tufala kwestin ya i soemaot hadwok blong yu long wok blong Jeova. Sipos yumi gohed oltaem blong talemaot mesej blong Kingdom, bambae yumi wantem mekem moa wok bakegen. Olgeta man we oli stap wajem yumi bambae oli luksave se yumi rili wan kampani blong man we i wok strong blong mekem ol gudfala wok.