Yumi Gohed Nomo Blong Tijim Ol Man
1 Baebol i storeyan plante long olkaen ples we ol aposol mo ol faswan Kristin oli prij long hem, hem i no letem yumi hafhaf long saed ya. Smoltaem afta we Jisas i ded, ol haeman oli tok strong long ol Kristin blong ‘oli no moa yusum nem blong Jisas blong tok long ol man mo blong tijim olgeta.’ (Ol Wok 4:18) ?From wanem? Ol lida ya oli tok strong olsem from plante risen. Be wan blong ol risen ya, se ol Kristin oli stap kasem plante gudfala frut from wok we oli mekem. Plante taosen man oli stat blong bilif long Jisas. Poen ya i klia nomo taem yumi ridim Ol Wok 4:4. Vas ya i talem se: “Be plante man we oli harem tok blong tufala, oli bilif long hem. Mo namba blong ol man nomo we oli bilif, kolosap i kasem faef taosen man.”
2 Tede, from we yumi tu yumi gohed nomo blong tijim ol man, fulap handred taosen man, yes sam milyan man oli kam Kristin. Long manis Oktoba, bambae yumi gat jans blong askem long ol man sabskripsen long Wekap! mo Wajtaoa. I klia nomo se Wekap! magasin i givhan bigwan long plante man finis, ale oli luksave ol nid we oli gat long saed blong speret. Plante long olgeta oli stap glad from we oli lanem finis fasin blong mekem ol samting we Jeova i wantem.—Ridim Matyu 5:3.
YUMI TRAEM TOKTOK LONG OLGETA MAN
3 Nating se yumi pablisa yumi prij oltaem long wan ples, maet i gat sam man we oli no gat jans blong harem gud nyus yet. Taswe, taem yumi prij long sapa no long en blong wik, yumi mas wok had blong toktok wetem hed blong famle we yumi visitim. Sipos yumi tekem ol gudfala not long olgeta haos wanwan, bambae yumi gat jans blong mitim ol narafala man we oli stap wetem famle ya. Maet bambae yumi toktok wetem bubu woman blong famle ya, wan nefyu no wan kasin brata we i stap long ples ya blong go long skul no samfala bakegen we oli wok long medel wik. Sipos yumi mekem sam moa had wok blong toktok wetem olgeta long famle we yumi visitim, bambae yumi save kasem plante gudfala frut.
4 I gat plante wei blong mekem sabskripsen long manis ya. Yumi save askem sabskripsen long olgeta we yumi stadi wetem, no maet long ol man we oli intres long trutok. Maet wan stadi blong yumi i mekem sabskripsen long wan blong tufala magasin ya finis: ?From wanem yumi no talem long hem se i moa gud sipos hem i kasem tufala magasin ya wantaem? Long ol famle, yumi save enkarajem olgeta wanwan blong gat prapa Wajtaoa sabskripsen blong hem. Sipos oli mekem olsem, bambae oli save rere gud long Wajtaoa stadi we i kamaot evri wik. Wan gudfala advaes bakegen se yumi mas mekem plante moa rod-magasin mo yumi save askem sabskripsen long olgeta we oli soemaot big intres long trutok. Wan moa samting tu, yumi mas askem Baebol-stadi long olgeta we oli rili intres.
YUMI FULUMAP GUD MINISTA WOK BLONG YUMI
5 I oraet yet blong fulumap wan pepa blong mekem haftaem paenia long manis Oktoba. ?Long famle blong yufala, hu i gat tingting blong mekem paenia taem bambae hem i spel long manis Disemba? Sipos yufala i wantem kasem mak ya, yufala i mas tingrere naoia. Yufala i mas faenemaot olsem wanem bambae yufala i kasem mak ya. ?Sipos evriwan long famle oli no save mekem wok ya, yufala i save toktok tugeta blong luk sipos wan no plante moa long famle oli save mekem wok ya? ?Sipos no, maet yufala i save spenem moa taem long minista wok blong askem sabskripsen long Wekap! mo Wajtaoa magasin?
6 Yumi glad tumas long ol haf blong Wekap! mo Wajtaoa magasin from we yumi kasem plante gudfala frut mo plante blesing long saed blong speret. Yumi evriwan i save we ol man we oli ridim oltaem ol magasin blong yumi oli save kasem plante gudfala blesing from. Long manis Oktoba, bambae yumi gohed nomo blong tijim ol man. Bambae yumi yusum gud ol tul we Jeova i givim long yumi. Sipos yumi gohed nomo blong mekem olsem, bambae Jeova i blesem yumi mo yumi tu bambae yumi stap blesem ol narafala man.—Gal. 6:9.