Yumi Pulum Tingting Blong Ol Man Blong Oli Ridim Baebol
1 Long taem blong yumi tede, plante man oli gat tingting se Baebol i wan buk we i olfala tumas mo i no save givhan long ol man. Be oli gyaman. Tok blong God i gat paoa blong jenisim laef blong man. (Hib. 4:12). Samting ya i klia nomo from we sam man oli jenisim tingting blong olgeta, oli lego ol fasin we oli gat bifo, nao oli folem ol Kristin fasin mo oli jenisim fasin blong olgeta blong skelem ol samting. (Efes. 4:24). Sipos yumi mekem ol advaes blong Baebol oli wok long laef blong yumi, bambae famle blong yumi i hapi moa. Mo fasin olsem i save mekem se yumi fren gud wetem ol man raonabaot long yumi. Nating se oli blong naraples, kala blong skin blong olgeta i no sem mak long yumi, mo oli holem wanem kaen ples long fored blong ol man, be i gat rod yet blong fren gud long ol.—Luk 10:29-37.
2 Ol gudfala samting we yumi faenem long Tok blong God oli mas pusum yumi blong leftemap tingting blong ol narafala, blong olgeta tu oli skelemgud ol gudfala frut we Baebol i save karem long laef blong ol. Wan gudfala rod blong mekem samting ya i olsem: Yumi save tokbaot nyufala stampa tok blong prij, “?From Wanem i Gud Blong Ridim Baebol?” ?Be olsem wanem bambae yufala i yusum nyufala stampa tok blong prij taem yufala i seremaot New World Translation mo ol buklet Trinity no “Look” long minista wok blong manis Novemba?
YUMI YUSUM STAMPA TOK BLONG PRIJ
3 Fastaem yumi save mekem wan sot fas tok, nao yumi save talem se: “From we plante moa famle tede oli gat ol trabol mo ol wari, mifala i glad tumas blong soem long yu weples yumi save kasem ol advaes we i gudwan moa. Bifo, plante man oli ridim Baebol, be naoia i no moa gat tumas man i mekem olsem. ?Yu ting se Baebol i save givhan long yumi blong winim ol trabol blong yumi tede, trabol olsem ol drag, fasin blong brekem loa, mo divos? [Livim man ya i ansa.] Traem makem wanem samting Baebol i talem long 2 Timote 3:16. [Ridim vas ya.] ?Yu ting se Baebol i naf blong halpem man? [Livim man ya i ansa.] Bighaf blong ol man oli save se taem we oli kasem ol trabol long laef no taem we oli gat wan impoten disisin blong mekem, oli mas lukaot sam advaes. Naoia, bambae yumi luk wanem gudfala samting yumi save kasem sipos yumi folem ol samting we Tok blong God i talem. [Ridim Jon 17:3.] Baebol i soemaot stret rod blong fiksimap ol trabol blong yumi mo hem i givim wan hop long yumi long saed blong fyuja.” Nao sipos man ya i rili intres mo hem i wantem save moa long Tok blong God, yumi save soemaot long hem olsem wanem New World Translation no wan long tufala buklet bambae oli givhan long hem blong kasem save long Baebol.
4 Blong seremaot New World Translation, yu save askem long man blong haos sipos hem i gat wan Baebol, mo sipos hem i faenem i isi blong ridim Baebol ya. Lesingud long ansa we man i givim, nao biaen yu save yusum ol tok blong hem blong soemaot sam gudfala fasin blong New World Translation. Maet yu save tokbaot lanwis we isi nomo we oli raetem Baebol ya long hem mo soem long hem se nem blong God i stap long Baebol ya. Maet yu save rere gud long wan no tu poen we i stap long pej 276-280 [408-411] blong Reasoning buk. Talem long olgeta we oli soemaot intres se oli save gat wan Baebol-stadi.
5 Taem we yu seremaot buklet Trinity, yu save talem se: “Nating we oli no save gud long doktrin blong Triniti, be plante man oli bilif long Triniti from we man i tijim doktrin ya long ol. Buklet ya i lukluk bakegen long stampa blong doktrin blong Triniti, mo hem i skelem gud wanem i bin hapen long histri mo wanem Baebol i talem long saed ya. ?Yu yu wantem ridim buklet ya?” Blong seremaot buklet “Look,” yufala i save soemaot pija we i stap long faswan pej no haf “Bad Things—Why Does God Permit Them?” pej 15 [14].
6 Long manis Novemba, yumi mas tekem evri jans blong pulum ol man blong oli ridim Baebol. Visitim bakegen kwiktaem nomo olgeta we oli gat intres. Halpem olgeta blong oli gat bigfala tangkyu long paoa we Tok blong God i save gat long laef blong ol man. Sipos ol man ya oli stap folem ol rul blong Baebol long laef blong olgeta, bambae oli save kasem blesing naoia mo “bakegen long laef ya tu we bambae i kamtru biaen.”—1 Tim. 4:8.