Baebol i Impoten Olsem Wanem Long Wol Tede
1 Plante oli luk Baebol olsem wan buk we i blong bifo mo i no stret long laef blong yumi tede. Nating se hem i wan buk we oli seremaot plante moa long hem bitim ol narafala buk mo buk we oli transletem moa long olgeta histri, be smol man nomo oli stap ridim mo sam long olgeta ya nomo oli stap folem ol rod blong hem.
2 Be, yumi respektem Baebol olsem Tok blong God. Ol pruf oli soem se ol store blong histri blong hem oli tru. Antap moa, hem i joen gud, ol profet tok blong hem, ol waes blong hem, mo paoa we hem i gat blong pusum ol man blong gat gudfala fasin long laef blong olgeta i soemaot se Baebol “i kamaot long God fastaem.” (2 Tim. 3:16) Ekspiryens blong yumi wanwan mo fasin tangkyu we yumi gat long nambawan presen ya i mas pusum yumi blong leftemap tingting blong ol narafala blong lukaot gudfala samting we hem i save givim we oli tru.
3 Maet wan fastok i olsem:
◼ “From ol nogud trabol we oli stap kasem ol man tede, plante man oli faenem i had blong bilif long God, no oli stap askem kwestin se God i naf blong finisim ol trabol we oli stap kasem no no gat. ?Wanem tingting blong yu long samting ya? [Wet long ansa.] Makem stampa tok blong traket ya, From Wanem Yu Yu Save Bilif Long Baebol.” Pulum tingting long pija we i stap long skin blong hem, afta ridim faswan mo seken paragraf long pej 2. Sipos man blong haos i soem intres, maet yu save ridim mo storeyan long ol vas we oli stap long seken paragraf. Afta yu save seremaot buk ya “The Bible—God’s Word or Man’s?” long smol mane we yumi stap askem from.
4 Maet wan nara fastok i olsem hemia:
◼ “?Yu yu agri se ol man oli nidim advaes blong winim ol trabol blong laef? [Wet long ansa.] Long bifo, ol man oli luk oltaem long Baebol blong lidim olgeta, be ol taem oli stap jenis naoia. ?Yu ting se Baebol i save wokgud yet tede? [Wet long ansa.] Makem wanem Baebol i talem long 2 Timote 3:16. [Ridim.] Baebol i givhan long yumi blong mekem ol waes disisen, be i no hemia nomo, hem i givim wan nambawan hop long fyuja tu.” Ridim Jon 17:3. Afta soemaot wan no tu poen we yu bin jusum finis long buk ya The Bible—God’s Word or Man’s? blong soemaot ol gudfala samting we Baebol i talem we oli save wok.
5 Blong halpem yu maet yu save yusum sam long ol fastok we oli stap long pej 10 long Reasoning buk aninit long stampa tok ya “Bible/God.” Sam narafala save oli stap long pej 58-68 (F. 51-61) we i save givhangud blong ansa long ol kwestin we man blong haos i askem no blong winim ol tok we man i sakem blong blokem yu.
6 Seremaot New World Translation: Long fastaem we yu toktok wetem man maet yu save soemaot New World Translation. Maet yu save askem long man blong haos sipos hem i gat wan Baebol mo sipos hem i faenem i isi blong ridim. Stret long ansa we man i givim, pulum tingting long sam long ol haf long New World Translation we oli save halpem man. Maet yu save talem wan no tu bigfala poen long pej 276-280 (F. 408-411) long Reasoning buk.
7 Stap wekap blong holem ol jans blong leftemap tingting blong ol man blong oli ridim Baebol. Halpem ol man we oli intres blong bildim respek mo lav long tok blong God, Baebol. Taem oli mekem ol rul blong hem i wok long prapa laef blong olgeta wanwan mo kasem save long trutok, bambae oli haremgud naoia mo long fyuja tu.—Ol Sam 119:105.