Pulum Ol Narafala Blong Ridim Wajtaoa
1 Long Epril mo Mei, yumi wantem pulum ol man we oli laekem trutok blong ridim Wajtaoa oltaem. From ekspiryens blong yumi nomo, yumi save se i no gat wan narafala magasin we oli prentem tede, we i save givim impoten kakae long saed blong speret, olsem Wajtaoa i givim. Olgeta we oli stap wari mo krae from ol nogud samting we i kamaot long wol, oli nidim kakae ya.—Esik. 9:4.
2 Wajtaoa i bin givhan long yumi blong kasem save long ol profet tok blong Baebol. Hem i talem se yumi stap laef long taem blong en, mo i no longtaem Kingdom blong God bambae i mekem pis i kamaot long wol ya. Yumi stap tingbaot laef blong ol narafala man, nao samting ya i pusum yumi blong serem gudfala hop ya wetem olgeta. Mo taem yumi luk we plante man we oli gat gudhat oli stap hivap blong kasem sef, samting ya i leftemap tingting blong yumi.—Jon 10:16.
3 Wajtaoa long Bislama long Epril 1, 1991 i karem wan haf we i save pulum tingting blong ol man, nem blong hem: “?Sol i Laef Yet Afta Ded?” Wajtaoa blong Mei 1 i tokbaot se: “!Yu Save Faenem Samting We i Moa Gud Bitim Gol!” Yumi save joenem ol magasin ya wetem Stampa Tok Blong Prij: “Baebol—Buk We i Givim Hop.” Blong luksave sipos man blong haos i rili intres long gud nyus, yu save pulum hem blong storeyan gud long saed blong Baebol. Blong mekem olsemia, yu mas rere gud fastaem. Yu mas rere blong soemaot ol tok blong ol nyu magasin we oli save givhan long man blong haos blong kasem moa save long samting we yu stap storebaot.
4 Aposol Pol i no slak blong serem gud nyus wetem ol narafala. Hem i “strong tumas . . . blong prij . . . long nem blong Jisas.” (Wok 9:27) Yumi tu, taem yumi prij, yumi mas gat strong tingting we i kamaot long God. Mo yumi mas no fraet nating blong oferem sabskripsen long olgeta haos evriwan.—1 Tes. 2:2.
5 Long Epril mo Mei, bambae yumi gat plante jans blong seremaot gud nyus blong Kingdom blong Jeova long olgeta haos wanwan. Mo tu, yumi save tekem evri jans blong storeyan wetem man long evri ples. Yumi save se Jeova bambae i gohed blong blesem wok blong yumi, sipos yumi traehad blong faenem mo givim kakae long saed blong speret long olgeta man we oli gat tingting daon long teritori blong yumi.