Mekemrere Blong Seremaot Ol Magasin Long Epril
Olsem yumi luk long 1996 Calendar, bambae yumi mekem Memoriol long Epril 2. Nambawan lafet ya i mas leftemap tingting blong yumi blong wok strong blong seremaot ol magasin long Epril. !Bambae yumi seremaot ol magasin we oli stretgud long taem blong yumi! Wajtaoa blong Epril 1 bambae i tokbaot pablik tok blong distrik asembli las yia, “!Presem King Blong Olwe!” Wajtaoa blong Epril 15 bambae i tokbaot spesel pablik tok blong Epril las yia, “En Blong Ol Gyaman Skul i Kolosap.” Spesel tok blong yia ya long Epril 21, hemia: “Holemtaet Fasin Blong No Gat Poen, Long Medel Blong Ol Rabis Man Blong Naoia.” Tok ya i mas pusum yumi blong wok strong moa long wok blong prij. Bambae yumi yusum Wekap! blong Epril 22 we i tokbaot: “Taem i No Moa Gat Ol Faet.”
Blong go moa long wok we yumi mekem long Epril las yia taem yumi bin seremaot Kingdom Nyus, Epril long yia ya i mas nambawan long saed blong wok blong seremaot ol magasin. Naoia i stret taem blong mekem ol plan. Plante bambae oli fulumap pepa blong mekem haftaem paenia. Yufala i save mekem ol plan blong ol spesel dei blong seremaot magasin, we evriwan oli save joen—long moning, dina mo sapa. Yumi evriwan i mas kam ol man blong ‘mekem ol samting we Tok blong God i talem.’ I gud sipos yumi save talem olsem profet tok long saed blong Mesaea i talem long Ol Sam 69:9, i se: ‘Tingting long saed blong haos blong yu, i stap wok insaed long mi, olsem faea we i stap laet.’—Jem. 1:22; Jon 2:17.