Program Blong Nyufala Spesel Dei Blong Asembli
1 Stadi blong yumi long buk ya Man We i Hae Moa i mekem fasin tangkyu blong yumi long Jisas Kraes i kam bigwan moa. Program blong spesel dei asembli ya bambae i stat long Septemba we stampa blong hem se, “Folemgud Man We i Bigfala Eksampel Long Yumi,” i save halpem yumi blong kasem save moa long wanem mining blong fasin blong folem hem.
2 Nomata hamas yia yu gat no hamas yia yu stap long trutok, asembli ya i save leftemap tingting blong evriwan we oli stap long hem blong oli folem moa fasin blong Kraes. Haf blong program bambae i givim advaes blong ol yangfala. I save givhan long olgeta blong fesem ol hadtaem we oli kasem long skul, ol pleplei, mo fasin blong wantem tumas ol sas samting blong wol. Bambae i gat ol tok, ekspiryens, mo ol pleplei we oli save halpem yumi olsem wanem blong winim ol samting blong wol we oli save gat paoa long yumi mo folem eksampel blong Kraes.—1 Pita 2:21.
3 Ol nyuwan we oli jes givim laef blong olgeta finis, oli gat wan jans blong soemaot long ol man taem oli tekem baptaes se oli kam man we i biaen long Kraes. Fastaem, bambae i gat wan gudfala tok we i stanap long Baebol long saed blong baptaes. Olgeta we oli wantem baptaes long spesel dei asembli ya oli mas talem long presiden elda fastaem blong hem i save mekem rere blong ol elda oli save go tru long ol kwestin wetem olgeta.
4 Wan brata we i visitim ples blong yumi bambae i givim bigfala tok ya blong asembli we stampa blong hem se, “Folem Man We Hem i Bigfala Eksampel Long Yumi—?Bambae i Lidim Yumi Long Wanem?” Mekem sua blong invaetem ol man we oli intres long program ya we i save leftemap tingting blong olgeta mo i save mekem bilif blong olgeta i moa strong. I no gat wan rod we i moa gud mo i save mekem yumi haremgud moa bitim we yumi folem Bigfala Eksampel ya blong yumi, Jisas Kraes.—Mat. 19:27-29.