Halpem Ol Narafala Blong Luksave Samting Ya We i Sas Moa
1 Taem yumi talemaot gud nyus blong Kingdom long ol narafala, mak blong yumi i blong halpem ol man we hat blong olgeta i stret blong luksave ol gudfala samting long Tok blong God. (Fil. 3:8) Ol buk blong yumi we oli stanap long Baebol oli wokem wan bigfala haf blong wok ya blong mekem mesej blong Kingdom i goaot. Eksampel, Laef Foreva buk i bin halpem plante handred taosen man blong wosip long Jeova olsem frut blong trutok blong Baebol we oli bin lanem.
2 Minista wok blong yumi i go moa long fasin blong jes livim buk nomo long eni man. Yumi nidim blong statem mesej blong yumi long wan fasin we i pulum tingting blong man, lesingud long samting we man blong haos i talem, mo rere blong ‘mekem plante toktok from ol tok blong Baebol’.—Ol Wok 17:2.
3 ?Olsem Wanem Blong Mekem Samting ya? Ol fastok blong yumi oli save openem rod blong man blong haos i soemaot sipos oli intres tru long Baebol mo long mesej blong hem.
Yu Save Talem se:
◼ “Mifala i kam blong storeyan long mining blong ol samting we oli stap hapen raon long yumi long wol tede. Plante man tede oli stat blong lusum intres blong olgeta long God mo long rul we Hem i putum we oli stap long Baebol. Samting ya i gat bigfala paoa long fasin we man i gat long narafala. ?Yu luksave samting ya? [Wet long ansa. Yu save tokbaot sam stret eksampel.] Plis makem fasin blong ol man we 2 Timote 3:1-5 i tokbaot, mo talem long mi sipos yu ting se samting ya i sem mak long wol tede. [Ridim; wet long ansa.] ?Yu ting se i gat risen blong tingbaot wan gudfala laef long fyuja?” Lukluk pija long pej 12 mo 13 long Laef Foreva buk mo pulum tingting long paragraf 12 mo 13.
4 Sipos wan papa no mama i kam long doa, yumi save statem fastok blong yumi olsem se:
◼ “Mifala i stap toktok wetem ol man we oli intres blong save olsem wanem yumi save winim ol trabol blong famle. Yumi evriwan i traehad, be sipos i gat wan samting we i save givhan moa long yumi, yumi intres long samting ya, ?i tru? [Wet long ansa.] Baebol i givim wanem rod we yumi save folem long saed ya long Kolosi 3:12-14. [Ridim.] Ale, ?i nidim wanem blong haremgud long famle laef? Makem wanem i stap long buk ya long japta ya we stampa tok blong hem se ‘Mekem Laef Blong Famle i Gud.’ ” Ridim paragraf 3 long pej 238 long Laef Foreva buk. Sipos man blong haos i bisi no hem i no intres tumas, traem soemaot wan magasin we i jes kamaot we i tokbaot laef long famle no traket ya Haremgud Long Famle.
5 Yumi neva wantem fogetem plan blong yumi blong talemaot Kingdom fulwan. (Mat. 24:14) Taem yumi yusumgud Baebol mo ol gudfala tiokratik buk we yumi gat, yumi save trastem Jeova se bambae Hem i blesem yumi long ol wok we yumi stap mekem long ol impoten taem ya.—Gal. 6:9.