Miting Blong Kingdom Wok i Mekem Se Yumi Gat Olgeta Samting Blong Mekem Ol Gudfala Wok
1 Stampa risen blong Miting Blong Kingdom Wok i blong pusum yumi mo mekem se yumi gat ol samting blong joen moa long wok blong prij mo mekem disaepol. (2 Tim. 3:17) Be, sipos yumi no reregud long miting ya mo yumi no mekem wanem we yumi stap lanem, bambae miting ya i no givhan long yumi.
2 Fasin blong mekemrere bifo miting bambae i halpem yu blong kasem ol advaes fulwan. Lukluk bakegen ol buk we bambae oli yusum, mo karem olgeta oli go wetem yu long miting, blong yu save folem tok we brata i givim mo blong yu save ansa. Lesingud, mo raetem sam not blong yusum afta.
3 Presiden elda i stap jekemgud program blong ol haf blong miting. Nao oli stap givimaot ol haf ya long ol elda mo ol man blong givhan we oli naf mo oli gat gudhan, blong oli mekemrere. (om p. 67) Ol kongregesen we oli no gat plante elda mo man blong givhan oli save askem sam narafala brata we oli naf blong givhan long olgeta. Ol wanwan brata we oli gat tok blong mekem, oli mas reregud, folemgud ol poen insaed long haf we oli mekem, mo mekem sua blong no bitim stret taem blong tok blong olgeta.
4 Miting i stat oltaem wetem ol lokol mesej. Brata we oli askem hem blong mekem ol lokol mesej, i mas toktok wetem presiden elda samtaem bifo blong faenemaot wanem samting i nidim blong talem. Long ol samting ya, maet i gat leta blong Sosaeti no talem bakegen ol plan blong prij no ol ripot blong manis. Maet yumi kasem nyus se i gat sam sik man we yumi nidim blong visitim olgeta, no harem sam poen long saed blong wok blong kongregesen long fyuja. Lesingud blong bambae yu kasem savegud mo bambae yu save rere blong givhan long ol wok blong kongregesen.
5 Sipos wan haf blong miting i nidim blong ol man we oli lesin oli givim ansa, taem yu rere i gud blong ridim haf ya mo jekem ol vas blong Baebol. Tingbaot olsem wanem yu save yusum ol advaes ya mo wanem ansa nao yu save mekem blong leftemap tingting blong ol narafala. Maet yu save tokbaot wan smol ekspiryens blong soemaot olsem wanem advaes ya i save wokgud.
6 Taem i gat wan pleplei, traem blong putum yu wan long ples blong man long pleplei, mo tingbaot wanem bambae yu save talem long taem olsem. Makem ol poen we oli yusum mo olsem wanem oli eksplenem. Traem blong tingbaot bakegen wanem yu bin talem lastaem we yu bin tokbaot samting ya, mo tingbaot olsem wanem ol poen we oli yusum long pleplei oli save givhan long yu blong kasem moa frut long fyuja.
7 Olgeta we oli mekem pleplei mo go antap blong ansa long ol kwestin we ol brata oli askem long olgeta, oli mas reregud long haf blong olgeta bifo. Wanwan long olgeta i mas save wanem bambae hem i talem mo wanem samting hem i mas mekem long platfom. Ol pleplei we oli no reregud long olgeta, oltaem oli no pusum no leftemap tingting blong ol man we oli stap lesin. Samfala we oli gat pleplei oli stap rere eli long haf blong olgeta, ale afta long Wajtaoa stadi we oli gat samtaem bifo long Miting Blong Kingdom Wok, oli save lan long platfom mo soem long ol brata we oli lukaot long maekrofon wanem bambae oli nidim.
8 Samtaem program bambae i gat wan tok long wan stret nid blong kongregesen no wan atikol blong Wajtaoa we i stret long nid blong kongregesen. Lesingud, tekem ol advaes oli go long hat blong yu, mo traem blong mekem olgeta oli wok.
9 Yumi wantem “rere blong mekem wanem gudfala wok we i stap.” (2 Tim. 2:21) Miting Blong Kingdom Wok i wan rod we Jeova i mekem blong givhan long yumi blong mekem samting ya. Fasin blong joen oltaem long hem mo trufala fasin traehad blong yusum wanem we yumi lanem, bambae i sua blong halpem yumi, blong yumi save “finisim olgeta wok ya we God i givim long [yumi] blong mekem.”—2 Tim. 4:5.