Advaes i Go Long Olgeta We Oli Gat Ol Haf Long Miting Blong Kingdom Wok

Stat long manis ya, yumi jenisim sam smosmol samting mo karemaot sam save we oli no impoten tumas long program blong Kingdom Wok Blong Yumi. Hemia i blong traem mekem we ol toktok blong program oli moa klia mo isi blong kasem save. Long haf ya bambae yumi tokbaot bakegen, mo mekem i klia, ol advaes we oli kamaot long Kingdom Wok Blong Yumi blong Mei 2009 we i se, “?Olsem Wanem Blong Rerem Miting Blong Kingdom Wok?

◼ Tok: Hemia wan tok we i stanap long ol save we i kamaot long wan buk no magasin, we Kingdom Wok Blong Yumi i talem. Tok ya i no gat kwestin mo ansa. Brata we i mekem tok ya i mas soemaot ol impoten poen we bambae oli givhan gud long kongregesen.

◼ Kwestin Mo Ansa: Haf ya i lelebet sem mak olsem taem yumi mekem Wajtaoa Stadi. Brata we i mekem haf ya bambae i talem wan smol fastok blong statem, mo i askem ol kwestin blong ol wanwan paragraf, mo biaen i talem wan smol lastok blong finisim. Brata ya i no mas toktok tumas. Sipos i gat inaf taem, yufala i save ridim ol stamba vas we i stap. I no nid blong ridim ol paragraf sipos Kingdom Wok i no talem blong mekem olsem.

◼ Pulum Ol Man Blong Givim Ansa: Hemia wan tok we i gat sam kwestin long hem. Brata bambae i mekem haf ya olsem wan tok be wanwan taem bambae hem i askem sam kwestin long olgeta we oli lesin.

◼ Ol Pleplei Mo Askem Kwestin Long Samfala: Taem Kingdom Wok i givim save se bambae i gat pleplei, hemia i min se brata we i mekem wan haf olsem, hem nao i mas rerem pleplei we sam brata sista bambae oli mekem. Olgeta brata sista we hem i jusum blong oli mekem ol pleplei ya, oli mas naf blong soemaot ol impoten poen long pleplei ya, mo oli mas gat gudfala fasin. Brata i mas talemaot long olgeta we oli joen blong mekem pleplei ya, longtaem bifo long dei blong miting ya. Pleplei i blong soemaot olsem wanem blong mekem gud wok blong prij. Taswe, i gud sipos brata we i mekem haf ya i no askem long wan niufala pablisa mo wan pablisa we i no gat inaf ekspiriens yet long wok blong prij blong mekem pleplei ya, nating sipos brata i wantem givim janis long ol pablisa ya blong kam long platfom. Be brata we i mekem haf ya i save yusum ol pablisa olsem, blong oli mekem man blong haos long pleplei ya. Ol pablisa we oli mekem pleplei oli mas lukluk i go long ol man we oli lesin. Ol pablisa we brata bambae i askem kwestin long olgeta, oli mas go antap long platfom blong ansa long ol kwestin blong olgeta, i bitim we oli sidaon nomo long jea blong olgeta. Ol pablisa we oli joen long ol pleplei mo ansa long ol kwestin, oli mas rere gud fastaem. Sipos miting i bitim taem mo brata i mas sotem tok blong hem, hem i no mas karemaot ol pleplei mo ol haf we i blong askem kwestin long samfala. Ol man blong givhan oli mas toktok wetem kodineta blong kampani blong ol elda bifo we oli jusum ol pablisa we bambae oli joen long ol haf olsem.

Sipos i gat wan haf blong Kingdom Wok we i gat wan spesel save long hem, brata we i mekem haf ya i mas folemgud save ya. Taem ol brata oli mekem gud ol haf blong olgeta long Miting Blong Kingdom Wok, olsem ol haf antap oli soemaot, bambae oli mekem se Miting Blong Kingdom Wok i folem oda ‘i stret gud, mo ol man oli glad long hem.’—1 Kor. 14:40.