Ansa Long Wan Kwestin
◼ ?Olsem wanem yumi save meksua se ol haf blong miting oli no bitim taem blong olgeta?
Taem yumi stap serem wan gudfala samting wetem ol fren blong yumi, taem i save pas hareap nomo we yumi no luksave. From samting ya, maet i no isi blong givim wan tok we i finis stret long taem we oli givim blong mekem tok ya. ?Wanem i save halpem yumi long saed ya?
Stat long stret taem. Taem ful kongregesen i kam wanples, maet i gud blong singaot ol man blong oli sidaon wan no tu menet bifo long stret taem, nao miting i save stat long taem mo folem oda. (Pri. 3:1) Taem ol smosmol grup oli miting wanples, olsem miting blong prij, yumi mas stat long stret taem tu, i no nid blong wet long olgeta we oli kam let.
Reregud. Wan gudfala samting we i givhan blong no bitim taem long ol tok we yumi givim, hemia blong reregud fastaem. Tingting blong yu i mas kliagud se wanem bigfala tingting nao we i stap long tok ya. Luksave ol stamba poen, mo mekem ol poen ya oli kamaot klia. Lukaot blong no letem sam smosmol poen we oli no impoten tumas oli pulum yu yu gowe long bigfala poen. Toktok blong yu i mas klia, i nogud i fasfas wetem tumas poen. Sipos i gat sam pleplei no inteviu long tok blong yu, reregud olgeta. I gud yu ripitim tok blong yu long bigfala voes mo makem taem blong hem.
Seraotem tok blong yu i go long ol smosmol haf. Maet yu givim wan tok no maet tok blong yu i blong askem kwestin long olgeta we oli lesin, be i gud blong seraotem tok blong yu i go long ol smosmol haf. Ale, tingbaot hamas taem we bambae yu mas spenem blong tokbaot wanwan haf ya, mo raetemdaon samting ya long pepa we i gat ol not blong yu long hem. Nao taem yu stap lanem tok blong yu long haos, lukluk waj blong yu blong meksua se yu stap folem stret taem. Taem yu mekem wan tok we yu mas askem kwestin long olgeta we oli lesin, lukaot blong no foldaon long wan trap. Trap ya hemia blong askem tumas kwestin long fashaf blong tok blong yu. Samting ya bambae i mekem taem blong yu i sot, nao yu no save spenem taem blong kliarem ol poen we oli rili impoten. Ol brata we oli lukaot long Wajtaoa stadi, oli mas mekem se i gat naf taem i stap long en blong stadi blong askem ol kwestin blong tingtingbak. Oli mas lukaot tu se oli no yusum smol taem ya long en blong miting we i blong laswan singsing mo prea.
Finis long stret taem. Taem i gat plante defdefren tok long wan miting, olsem Miting blong Kingdom Wok, wanwan spika i mas tingrere long wetaem hem i mas stat mo wetaem hem i mas finis. ?Be olsem wanem sipos ol brata oli luk se miting bambae i go ova taem? Maet wan no tu brata oli naf blong katem taem blong tok blong olgeta sipos oli lego sam smosmol tingting we oli no impoten tumas mo oli tingting moa blong soemaot ol impoten poen long tok blong olgeta. Olgeta we oli gat gudhan blong tij bambae oli naf blong mekem olsem.
Yumi we yumi sidaon mo lesin, yumi save givhan tu long brata we i givim tok, sipos yumi mekem we ol ansa blong yumi oli sot mo oli go stret long poen. Yes, yumi evriwan i save givhan blong mekem we ol miting oli gohed “long fasin we i stret gud, we ol man oli glad long hem.”—1 Kor. 14:40.