Yusum Ol Magasin Blong Talemaot Trutok
1 Ol man tede oli no moa ting se i impoten we ol save oli tru mo stret, from ol pablisiti we oli no tru, ol promes long saed blong politik we oli lidim ol man oli go krangke, mo ol bigfala toktok we ol kantri oli mekem blong trikim ol man nomo. Wajtaoa mo Wekap! oli spesel from we olgeta nomo oli talemaot trutok long saed blong Kingdom blong God mo eksplenem wanem samting ol man oli mas mekem blong haremgud long blesing blong olwe we Kingdom bambae i givim.
2 Long wan kantri wan haeman long “ministri blong infomesen” we i laekem tufala magasin ya, i wok had blong askem blong gavman i agri blong oli save seremaot. Hem i talem se: “Mi tingbaot Wajtaoa olsem wan long ol beswan magasin; mi glad tumas blong givhan long saed ya.” Hem i bigfala blesing blong yumi blong givhan long ol narafala taem yumi seremaot tufala magasin ya we oli givim save we i save lidim man blong kasem laef. (Jon 17:3) ?Yu save talem wanem blong seremaot tufala impoten magasin ya long Mei? Maet ol poen we oli kam biaen bambae oli givhan long yu.
3 Sipos yu stap soemaot ol faswan atikol long Mei 15, “Wajtaoa,” yu save talem se:
◼ “Mifala i stap toktok wetem ol man long saed blong buk we oli salem moa bitim ol narafala buk long wol. ?Yu save wanem buk ya? [Wet long ansa.] Mifala i stap tokbaot Baebol. I mas gat wan gud risen from wanem plante man oli pem wan Baebol. Yumi save faenem risen ya long 1 Timote 3:16.” Afta we yu ridim vas ya, talem sam long ol bigfala poen long wan haf blong magasin mo askem man blong karem magasin ya.
4 No afta wan smol fastok, yu save talem wan samting olsem se:
◼ “Maet yu makem se long ol yia we oli jes pas olgeta man long wol oli wari moa long ol problem we oli stap kasem ol pikinini. ?Wanem ol problem long saed blong ol pikinini we yu luk long ples blong yu we yu wari long olgeta?” Wet long ansa. Soem sam long ol problem we ol pikinini oli stap fesem long olgeta ples long wol olsem we oli tokbaot long ol faswan atikol long Wekap! blong Mei 8 (Engglis no Franis), mo pulum tingting i go long ansa we Kingdom blong God i givim.
5 Long buk we yu stap raetem ol visit bakegen long hem, maet yu gat wan lis blong olgeta man we oli soem smol intres long fastaem we yu toktok wetem olgeta, be i no gat samting i kamaot afta. From we oli no bin soem bigfala intres, maet yu harem se yu no nidim blong gobak plante taem. Be maet yu save yusum lis ya blong mekem ol rod blong magasin. Taem yu faenem wan atikol we yu ting se i stret long wan man, yu mas sua blong visitim man ya mo askem hem blong karem magasin ya.
6 Tekem Olgeta Jans Blong Prij: Hemia wan nambawan rod blong wokem intres long ol magasin. Waes fasin blong soem ol faswan pej blong magasin we oli save pulum ae blong man, maet samting ya nomo i naf blong statem wan storeyan. Wan sista i putum sam magasin long desk blong hem blong ol man we oli wok wetem hem oli save luk taem oli pas long ples ya; hem i seremaot plante. Tingbaot blong karem sam magasin, mo no fraet blong askem ol man blong karem olgeta long manis ya taem yu go pem ol samting long stoa, go long skul, ron long bas, no taem yu toktok wetem ol man long sam narafala ples.
7 Wetem help blong Wajtaoa mo Wekap!, yumi faenem finis ansa long ol impoten kwestin long saed blong Jeova mo wosip blong hem. Yumi wantem yusum ol magasin ya long olgeta rod blong halpem ol man blong kasem save long ‘Jeova, God blong trutok.’—Sam 31:5.