Yusumgud Taem Blong Yu
1 Jeova i no stap westem taem. Hem i wantem se yumi tu, yumi mas yusumgud taem blong yumi. Tru long ogenaesesen blong hem, hem i halpem yumi blong no westem taem. Yumi kasem advaes se, oltaem yumi mas ‘gat plante samting blong mekem long wok blong Masta.’ (1 Kor. 15:58) Long rod ya, yumi save karem moa frut long wok blong Jeova.
2 Evriwan long yumi i gat sem namba blong haoa long wan wik—168 haoa. ?Yumi yusumgud taem ya? ?Yumi stap soem se yumi rili luksave impoten taem we yumi stap long hem naoia, folem tingting blong Jeova? ?Yumi letem ol narafala wok we oli no impoten, oli pulum tingting blong yumi?
3 I impoten we yumi folem wan gudfala plan. Plante oli raetem wan lis. Ol faswan samting long lis ya, oli moa impoten long ol narafala samting we oli kam biaen. ?Olsem wanem blong save wanem i moa impoten? Baebol i talem se wan man i mas ‘luk gudfala frut blong ol hadwok blong hem.’ (Ekles. 3:13) Sam wok oli karem moa frut bitim ol narafala wok. Tingbaot frut blong ol wanwan wok long lis blong yu. ?Bambae i gat impoten frut i kamaot sipos yu finisim wan wok? ?Bambae yu ‘luk gudfala frut’ blong ol hadwok blong yu? Sipos no, maet hem i wan wok we i no impoten tumas.
4 Long Minista Wok: Yumi glad taem ol man oli no kam let long ol miting blong prij, mo taem oli lesingud long ol toktok, mo biaen oli go kwik long wok blong prij. Yumi laekem moa blong bisi long wok blong prij, bitim we yumi stap wet. I klia se Pol i gat strong tingting long saed blong nid blong gat gudfala oda. Hem i raetem se: ‘Yufala i mas mekem olgeta samting long fasin we i stretgud, folem wan plan.’—1 Kor. 14:40.
5 Taem yumi stap prij, yumi save westem impoten taem long ol spel blong dring wan samting. Be, taem ples i hot tumas, wan smol spel i save mekem yumi haremgud mo givim paoa long yumi blong gohed. Plante oli laekem moa blong gohed blong prij nomo gogo oli finisim taem we oli bin makemaot, bitim we oli joen wetem ol narafala brata sista blong storeyan, taem oli spel blong dring wan samting. Yumi mas skelemgud.
6 Baebol i talem se: “Pijin ya stok . . . i savegud ol stret taem blong hem,” blong flae i go long narafala ples. Mo wan anis i “stap mekemrere kakae blong hem long hot taem,” blong hem i save stap gud long koltaem. (Jer. 8:7; Prov. 6:6-8) Hemia nao rod blong yusumgud taem blong yumi. Yumi tu, yumi mas save ‘ol stret taem blong yumi.’ Yumi no wantem kam strong bitim mak, be yumi mas lukaot blong no westem taem tu. Yumi mas save ol samting we yumi nidim blong mekem. Be tu, yumi mas save wan stret taem blong mekem ol samting ya. Yumi mas traem blong wokem fasin ya we yumi tingrere long ol samting ya, mo livim smoltaem long plan blong yumi from sam samting we oli save kamaot blong blokem yumi mo mekem wok ya i kam longfala moa. Mo tu, yumi mas rere blong sotem sam wok, blong mekem taem blong ol samting we oli moa impoten, olsem rere long ol miting, wok blong prij, mo sam narafala tiokratik wok.
7 Yumi wantem folem fasin blong Papa blong yumi long heven, Jeova God. Hem i tijim yumi se, “evri samting i gat wan taem we i stret long hem.” (Ekles. 3:1) Sipos yumi yusumgud taem blong yumi, yumi save ‘finisim olgeta wok we God i givim long yumi.’—2 Tim. 4:5.