Gohed Blong Talemaot Trutok
1 Ol aposol oli talem se: “Mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” (Wok 4:20) Tede tu, yumi mas gohed blong talemaot trutok. I tru se wok blong seremaot Wajtaoa mo Wekap! i wan rod blong faenem olgeta we oli wantem lesin. Be yumi mas gobak blong tijim sam moa trutok long ol man we oli soem intres.
2 Taem yu gobak long wan man we i bin karem “Wekap!” blong Epril-Jun, “?Yu Save Trastem Hu?” yu save statem wan Baebol stadi wetem tok ya:
◼ “Lastaem, yumi tokbaot se God i no save gyaman long ol promes blong hem. Eksampel, ?yu yu save se ol samting we oli kamaot long wol naoia oli pruvum klia se yumi stap laef long taem ya we Baebol i kolem ol las dei? [Soem buk ya Save. Ridim faswan haf long japta 11, mo tokbaot bokis long pej 102.] Buk ya i eksplenem poen ya wetem 18 narafala poen we oli stap insaed long ol japta ya. [Soem pej 3.] Sipos yu glad, bambae mi soem long yu olsem wanem buk ya i save givhan long yu blong kasem save long ol impoten poen ya blong Baebol.” Sipos hem i glad, statem wan stadi long pej 6.
3 Sipos yu bin talem lastaem se bambae yu kambak mo eksplenem olsem wanem yumi save harem sefgud long laef blong yumi naoia, maet yu talem samting olsemia:
◼ “Taem yumitu storeyan lastaem, mi soem long yu, wan vas blong Baebol we i givim risen long yumi blong bilif se bambae i gat wan gudfala fyuja blong ol man. Tede, mi glad blong soem long yu hu nao i save mekem yumi harem se yumi stap sefgud naoia.” Ridim Ol Sam 4:8. Openem buk ya Save i go long pej 168 mo ridim haf 19. Nao yu save askem se: “?Yu yu glad sipos mifala i kam mekem wan Baebol stadi wetem yu we yu no pem, blong yu lanem olsem wanem yu tu yu save harem sefgud long laef blong yu?” Sipos hem i talem yes, stat long japta 1.
4 Sipos lastaem yu bin tokbaot nid blong soem respek long gavman, taem yu gobak yu save talem olsem:
◼ “Maet yu rimemba se yumitu bin tokbaot Matyu 22:21, we Jisas i talem se ol Kristin oli mas obei long God mo long gavman tu. Be maet samtaem i no isi blong obei long tufala evriwan, ?i tru? ?Yu ting se weswan long tufala i hae moa?” Wet long ansa. Nao openem buk ya Save i go long japta 14, pej 130, mo ridim haf 3. Soem se i impoten blong stadi Baebol evri wik. Askem hem sipos i wantem mekem wan Baebol stadi long buk ya Save.
5 Taem yu gobak, yu save askem stret long man blong haos blong mekem wan stadi. Yu save talem se:
◼ “Mifala i stap givimaot ol magasin blong mifala long ful wol, blong givim save long ol man long evri ples long saed blong ol tijing blong Baebol. Sipos ol man ya oli glad long ol samting we oli lanem long ol magasin ya, mifala i askem sipos mifala i save kam mekem wan Baebol stadi wetem olgeta, we oli no pem. [Tokbaot smol haf long laswan pej blong Wajtaoa, ‘?Yu Yu Wantem Wan Man Blong Kam Luk Yu?’] Mifala i yusum buk ya Save Blong Lidim Yu Long Laef We i No Save Finis olsem wan plan blong folem long stadi ya. Blong smoltaem, bambae mi soem long yu olsem wanem mifala i mekem stadi wetem ol man.”
6 Sipos yumi gohed blong talemaot trutok, yumi save sua se bambae i gat samfala we oli lesin mo bilif long hem.—Mak 4:20.