Gobak Bakegen Blong Sevem Sam Moa Man
1 God i wantem “sevem olgeta man, mo i wantem olgeta man bambae oli faenem trutok.” (1 Tim. 2:4) ?Yumi save mekem wanem blong halpem olgeta? Mekem ol visit bakegen wetem tingting blong tijim trutok long ol man. ?Bambae yu talem wanem? Ol tok we oli kam biaen oli save halpem yu.
2 Taem yu visitim wan man we i bin karem “Revelesen” buk, maet yu soem pija long pej 302 bakegen, mo askem se:
◼ “Taem yu lukluk buk ya we mi bin livim wetem yu mo yu tingbaot promes blong God blong mekem wol i kam paradaes, ?wanem tingting blong yu long ol nambawan promes ya?” Lesingud long ansa we man blong haos i givim mo talem tangkyu from. Nao yu save pulum tingting blong hem i go long haf 8 kasem 10, long pej 303, mo soem from wanem yumi save trastem ol promes blong God. Askem sipos hem i ting se God bambae i givim laef we i no save finis long enikaen man nomo. Nao talem se ol haf biaen oli tokbaot ol mak we yumi mas kasem blong kam naf blong stap long paradaes long wol ya.
3 Ale, taem yu kambak bakegen, maet yu gohed long storeyan ya se:
◼ “Mi laekem storeyan blong yumitu lastaem, mo mi glad blong kambak blong harem tingting blong yu long saed blong promes we God i mekem blong givim laef we i no save finis long yumi. Yumitu bin talem se ol rod we God i yusum oli olsem wora blong wan reva. Mo, mi bin askem kwestin ya long yu se: ?Hu bambae i kasem laef we i no save finis? ?Hem i blong enikaen man nomo?” Letem man i ansa. Openem Baebol long Revelesen 21:7. Nao, tokbaot haf 12 mo 13 long pej 304 mo 305 long buk. Askem ol kwestin mo lukluk ol vas blong Baebol we oli stap. Afta, maet yu soem buk ya Save.
4 Yu save gobak blong visitim man we yu bin givim “Revelesen” buk long hem, se:
◼ “Mi glad blong kambak blong soem long yu sam moa samting long saed blong stampa tingting we God i gat long wol ya.” Openem buk i go long pija long pej 303, ridim Revelesen 21:3, 4, mo yusum smoltaem blong eksplenem olsem wanem Kingdom blong God bambae i mekem promes ya i kamtru. Askem man sipos hem i wantem gat wan fri Baebol stadi long haos blong hem.
5 Rimemba se risen blong mekem ol visit bakegen i blong statem ol Baebol stadi. Nyufala buk ya, Save Blong Lidim Yu Long Laef We i No Save Finis, oli wokem blong yumi mekem stadi wetem ol man long hem. Taem yumi visitim bakegen olgeta we yumi bin livim wan narafala buk wetem olgeta, mo yumi statem stadi wetem olgeta, i gud blong pulum tingting blong olgeta i go long nyufala buk ya. Bambae yumi kasem bigfala glad taem yumi luk se olgeta we oli stadi, oli lanem blong singaot long Jeova blong hem i sevem olgeta.—Wok 2:21.