?Olsem Wanem Blong Mekem Wan Rod Magasin i Kam Wan Baebol Stadi?
1. ?Wanem mak blong yumi taem yumi seremaot Wajtaoa mo Wekap!?
1 Long ol Sarede blong manis, yumi yusum ol Wajtaoa mo Wekap! long wok blong prij. Be, hemia i wan stat nomo we i givhan long yumi blong kasem mak blong tijim ol man we hat blong olgeta i stret long trutok blong Baebol. Long haf ya blong Kingdom Wok daon, i gat sam tingting i stap we oli save givhan long yumi olsem wanem blong statem wan Baebol stadi long buk ya Baebol Tijim taem yumi gobak luk ol man. Maet yu jenisim ol fastok ya lelebet blong mekem oli stret long teritori we yu prij long hem, mo yu save yusum prapa toktok blong yu taem yu storian long man. I stret nomo blong yusum wan narafala fastok sipos yu luk se i wokgud.
2. ?Olsem wanem yumi save yusum ol faswan pej blong buk ya Baebol Tijim blong statem wan Baebol stadi?
2 Yusum Ol Faswan Pej Blong Buk: Taem yu gobak luk man we yu bin givim Wajtaoa mo Wekap! long hem, yu save talem se: “Tufala magasin we mi bin givim long yu oli pulum tingting blong man i go long Baebol. Makem from wanem i impoten tumas blong ridim Baebol.” Ridim Aesea 48:17, 18; Jon 17:3; no yu save tekem wan narafala vas bakegen. Biaen yu save soem buk ya Baebol Tijim mo givim wan kopi long man blong haos, olsem nao yu save jusum wan long ol toktok ya daon blong gohed blong storian wetem hem.
◼ “Baebol i givim wan trufala hop long saed blong fiuja.” Nao yu save soem long man blong haos pej 4-5 blong buk ya mo askem long hem se, “?Weswan long ol promes ya we yu yu wantem se i kamtru?” Pulum tingting blong man i go stret long japta we i tokbaot promes ya blong Baebol we hem i jusum, mo sipos hem i glad, yutufala i save storebaot wan no tu paragraf.
◼ Yu save talem long hem se, “Baebol i ansarem ol impoten kwestin long saed blong laef.” Pulum tingting blong man i go long pej 6 mo askem hem sipos hem i wantem kasem ansa blong wan long ol kwestin we oli stap daon long pej ya. Openem buk long japta we i givim ansa mo storian kwiktaem long wan no tu paragraf.
◼ Yu save soem long hem sam stamba tok we i stap long lis blong ol japta mo askem long hem weswan japta we hem i intres long hem. Openem buk i go long japta ya mo soem kwiktaem olsem wanem blong stadi long Baebol.
3. ?Olsem wanem yumi save statem wan Baebol stadi afta we yumi seremaot magasin we i tokbaot (a) laef blong wol ya we i kam nogud olgeta? (b) famle? (c) yumi save trastem Baebol?
3 Stanemap Wan Kwestin Long Faswan Taem We Yu Mitim Man: Wan narafala rod hemia blong putum fandesen blong nekiswan visit long faswan taem we yu mitim man. Afta we man blong haos i tekem ol magasin, stanemap wan kwestin, mo talem long hem se bambae yu kambak blong givim ansa blong kwestin ya. Yu mas traehad blong putum wan stret taem blong visitim man ya bakegen, mo yu mas meksua se yu holem promes blong yu. (Mat. 5:37) Taem yu gobak visitim man ya, talem bakegen kwestin we yu bin stanemap, mo tekem smoltaem blong ridim mo tokbaot haf blong buk ya Baebol Tijim we i givim ansa long kwestin ya. Givim wan buk long hem blong mekem se hem i save folem riding. Hemia sam eksampol:
◼ Sipos magasin we yu givim i tokbaot laef blong wol ya we i kam nogud olgeta, yu save talem se, “Nekis taem bambae yumitu tokbaot ansa we Baebol i givim long kwestin ya se, ?Wanem ol jenis we God bambae i mekem oli kamaot long wol ya?” Yusum pej 4-5 taem yu gobak visitim man ya. No yu save stanemap kwestin ya se, “?Hemia plan blong God blong mekem ol trabol ya i kamaot long wol?” Taem yu go blong visitim hem bakegen soem long hem paragraf 7-8 long japta 1.
◼ Sipos magasin we yu givim i tokbaot famle, bifo we yu livim man blong haos, maet yu save stanemap kwestin ya se, “?Wanem samting we wanwan memba blong famle i save mekem blong famle laef blong olgeta i hapi?” Taem yu gobak, soem long hem paragraf 4 long japta14.
◼ Sipos magasin we yu givim i tokbaot se yumi save trastem Baebol, yu save stanemap kwestin ya blong nekis storian blong yutufala, “?Baebol i talem trutok taem i tokbaot ol samting long saed blong saens?” Taem yu gobak visitim hem, yu save tokbaot paragraf 8 long japta 2.
4. ?Bambae yumi mekem wanem sipos man blong haos i no wantem tekem buk ya Baebol Tijim?
4 Long en blong evri storian we yu mekem wetem man blong haos, yu mas stanemap wan kwestin we bambae yu givim ansa blong hem long nekis visit. Taem visit ya i kam wan Baebol stadi, statem gud stadi blong hem long japta wan blong buk ya i go kasem laswan japta. ?Be, olsem wanem sipos man blong haos i no wantem tekem buk ya Baebol Tijim? Yu mas gohed blong mekem rod magasin wetem hem mo tokbaot ol samting long saed blong Baebol. Olsem nao yu stap mekem intres blong hem i gru sloslo, nao afta we sam taem i pas, maet hem i agri blong stadi Baebol.
5. ?From wanem yumi mas traehad blong go moa i bitim we yumi livim magasin nomo wetem ol man?
5 Maet Wajtaoa mo Wekap! we yumi givimaot i pulum wan man blong wantem lanem samting we Baebol i rili tijim. From samting ya, i gud we yumi mekem wan spesel traehad blong statem ol Baebol stadi wetem ol man we oli tekem tufala magasin ya. Long rod ya, bambae yumi obei long tok blong Jisas we i talem long yumi blong “pulum olgeta oli kam man blong [Jisas] . . . tijim olgeta.”—Mat. 28:19, 20.