Givhan Long Olgeta Blong Wok Strong Bakegen

¹ Aposol Pol i luksave se ol Kristin brata blong hem oli save kasem wan trabol long saed blong speret, taswe hem i raetem se: “Hemia i taem blong yufala i wekap, yufala i no moa slip bakegen. Fastaem, long taem we yumi jes bilif long Kraes nomo, taem ya we bambae hem i sevem yumi i stap longwe yet long yumi. Be naoia, taem ya i stap kam kolosap.” (Rom 13:11) Pol i wari long ol brata blong hem we oli stap slip long saed blong speret. Hem i wantem tumas blong wekemap olgeta blong oli wok strong bakegen.

² I tru tumas, se tudak blong olfala wol ya, kolosap nomo bambae i finis, mo delaet blong nyufala wol ya i stap jes long fored blong yumi. (Rom 13:12) Yumi gat gudfala risen blong wari long ol brata blong yumi we oli no moa joen wetem yumi blong talemaot gud nyus. Long laswan sevis yia, long Vanuatu nomo, i gat bitim 12 pablisa we oli joen long wok blong prij bakegen. ?Olsem wanem yumi save givhan long olgeta we oli no moa prij, blong oli mekem wok blong Jeova bakegen?

³ Samting We Ol Elda Oli Save Mekem: Bighaf blong olgeta we oli no moa prij, oli no lego trutok. Maet oli no moa prij from we tingting blong olgeta i foldaon, oli gat ol prapa trabol blong olgeta, oli stap ronem ol sas samting, no from sam narafala wari long laef. (Luk 21:​34-​36) I moagud blong givhan long olgeta bifo we oli kam slak mo lego long wok blong prij, sipos yumi save mekem olsem. Sekretari blong kongregesen i mas talem long brata we i lidim Buk Stadi blong Kongregesen taem wan pablisa i no moa putum ripot blong prij. Oli save mekem wan plan blong go visitim hem mo leftemap tingting blong hem. Oli mas traem blong faenemaot stampa blong problem blong hem, mo luksave olsem wanem blong givhan long hem.​—Lukluk Wajtaoa, Septemba 15, 1993, pej 20-23.

⁴ Samting We Ol Narafala Oli Save Mekem: Bighaf blong yumi i save wan we i no moa prij. Maet hem i wan we bifo yumi frengud wetem hem. ?Yumi save mekem wanem blong givhan long hem? I gud blong visitim hem blong smoltaem. Talem long hem se yu sore we hem i no moa joen wetem yu. Soem se yu glad blong toktok wetem hem, mo toktok long fasin we i leftemap tingting. Soem se yu wari long hem, be yu no mas toktok olsem we hem i sik long saed blong speret. Talem sam gudfala ekspiryens no sam narafala gudfala samting we kongregesen i stap mekem. Toktok wetem glad long saed blong Distrik Asembli, “Ol Man Blong Talemaot Pis Blong God,” mo leftemap tingting blong hem blong kam. Sipos hem i joen bakegen wetem kongregesen, samting ya i save halpem hem moa bitim ol narafala samting. Taswe, yu save talem long hem se yu glad blong tekem hem i go long miting. Talem long ol elda wanem i bin hapen taem yu visitim hem.

⁵ Taem wan we i no moa prij i kambak long ol miting, ating bambae hem i sem blong luk ol narafala we hem i save olgeta bifo. I nogud blong askem long hem se: “?From wanem mifala i no luk yu longtaem?” Long defren fasin, mekem hem i haremgud. Storeyangud wetem hem. Tekem hem blong sekhan long olgeta we hem i no save olgeta. Sidaon kolosap long hem long miting, givim wan singsing buk mo ol buk blong miting long hem. Pulum hem blong kambak bakegen, mo talem long hem se yu glad blong givhan long hem sipos hem i nidim.

⁶ From we Jeova mo Jisas oli laekem tumas ol man blong olgeta, oli glad tumas taem wan we i slak i kam strong bakegen long saed blong speret. (Mal. 3:7; Mat. 18:​12-​14) Yumi save kasem glad ya tu sipos yumi givhan long samfala blong mekem wok blong Jeova bakegen.