Joen Long Tiokratik Skul
1 Tiokratik Skul i bin trenem plante milyan Wetnes blong Jeova blong talemaot gud nyus. Plante blong yumi i save rimemba se fastaem we yumi joen long skul ya, yumi fraet mo yumi harem se yumi no naf. Naoia, yumi luksave wetem fasin tangkyu se skul ya i bin givhan bigwan long yumi blong gru long saed blong speret, olsem ol man blong talemaot Tok blong God mo tijim ol narafala long hem. (Skelem wetem Ol Wok 4:13.) ?Yu yu joen finis long nambawan skul ya?
2 ?Hu i save joen long skul ya? Pej 73 blong buk ya Ol Rul Blong Mekem Minista Wok Blong Yumi i givim ansa ya: “Olgeta we oli stap joen oltaem wetem kongregesen, oli save joen long skul ya. Olgeta we oli bin kam long ol miting i no longtaem, oli save joen tu sipos laef blong olgeta i laenap wetem ol Kristin rul.” Mifala i singaot olgeta we oli kasem ol mak ya—ol man, ol woman, mo ol pikinini—blong go luk elda we i lukaot long skul ya, mo askem long hem sipos oli save joen.
3 Program Blong Skul Blong 1997: Program blong Tiokratik Skul blong 1997 i stap tokbaot plante tijing blong Baebol mo plante man insaed long Baebol. Mo tu, hem i tokbaot histri blong ogenaesesen blong God. Hem i givhan long yumi blong kamgud moa long fasin blong toktok mo tij. Antap long hemia, evri wik yumi lanem plante samting long saed blong speret, from ol nambawan tok long program ya. (Prov. 9:9) Sipos yumi reregud from skul ya, we i min se yumi mas mekem Baebol riding evri wik tu, mo sipos yumi go long miting ya evri wik, program ya i save givhan bigwan long yumi long saed blong speret.
4 Long 1997, bighaf blong ol Baebol riding long Tok N. 2, oli sot nomo. Taem studen i mekemrere tok ya, hem i mas jekemgud taem we hem i tekem blong ridim haf blong hem. Nao bambae hem i save hamas long ol faef menet i stap, blong hem i save mekem fastok mo lastok blong hem. Samting ya bambae i givim jans long studen ya blong yusum taem blong hem fulwan, mo blong kamgud moa long fasin blong rid, mo long fasin blong toktok we hem i no ridim ol tok blong hem long wan pepa.—1 Tim. 4:13.
5 Program i talem se olgeta we oli mekem Tok N. 3 we i stanap long Save buk, naoia oli save mekem tok ya long fasin we oli tekem jans blong prij tu. Taswe, maet wan sista i jusum blong mekem tok ya olsem wan visit bakegen, wan Baebol stadi, no tekem jans blong prij. Be, hem i mas gohed blong tingbaot se samting we i moa impoten bitim ples we hem i mekem, hemia fasin blong hem blong tijgud.
6 Nating se yu yu gat jans blong givim Tok N. 1, Ol Poen Blong Baebol Riding, no wan narafala tok, yu save soemaot se yu gat tangkyu from Tiokratik Skul, taem yu reregud mo lanemgud tok we yu mekem, taem yu toktok wetem bilif mo glad, taem yu no bitim taem blong yu, taem yu lesin mo folem advaes blong elda we i lukaot long skul, mo taem yu traehad blong no mestem tok we yu mas mekem. Olsem nao, bambae yu kasem blesing from we yu joen long skul ya, mo olgeta we oli lesin long ol tok bambae oli kasem blesing tu.