Mekem Ol Baebol Stadi We Oli Gohed Gud

¹ ?Wanem samting i sem mak long saed blong trifala woman ya: wan nes long Tansania, wan yangfala long Ajentina, mo wan mama long Latvia? Buk ya 1997 Yearbook (pej 8, 46, mo 56) i soem se ol trifala woman ya oli gohed kwiktaem nomo long Baebol stadi blong olgeta, from we oli wantem stadi bitim wan taem evri wik long buk ya Save. Sosaeti i talem finis se i gud we ol pablisa oli traem stadi long wan ful japta blong buk ya evri taem, sipos oli save mekem olsem. Yumi no mas tingbaot samting ya olsem wan strong rul. Be, i gud we yumi traem stadi long plante paragraf lelebet evri taem. Samting ya i dipen tu long laef blong ol studen wanwan, mo long hamas poen oli naf blong kasem save long hem. Olgeta we oli bin tijim ol man long trutok longtaem finis, oli bin kasem gudfala risal taem oli folem ol advaes we i kam biaen.

² Pepa we i stap long medel blong Kingdom Wok Blong Yumi blong Jun 1996 i soem se, yu mas lanem long ol studen blong mekemrere stadi blong olgeta. Long faswan taem, i gud blong eksplenem mo soemaot long olgeta olsem wanem blong mekem samting ya. Soem prapa Save buk blong yu long olgeta. Mekemrere faswan stadi tugeta. Halpem studen blong faenem ol stampa tok no haf blong paragraf we i ansa stret long kwestin we oli raetem aninit, nao makem no putum laen aninit long ol tok ya. Sam pablisa oli bin givim wan pen long studen tu blong makem ol ansa. Pulum olgeta blong ridim ol vas long Baebol taem oli mekemrere stadi blong olgeta. Taem yu tijim olgeta blong mekem ol samting ya, yu stap trenem olgeta blong mekemrere blong kam long Buk Stadi blong kongregesen mo long Wajtaoa Stadi.​—Luk 6:​40.

³ Wan gudfala tija i no toktok tumas, be hem i askem kwestin long studen, blong pulum hem blong toktok. Hem i no tekem tumas taem blong tokbaot ol smosmol poen. Sam samtaem nomo, maet hem i tokbaot wan samting we i no stap long buk. I moa impoten we hem i soemaotgud ol bigfala poen long stadi. Sam tija oli givim sam narafala buk long ol studen, blong halpem olgeta blong faenem ansa long sam kwestin we oli gat. Mo tu, olgeta we oli intres, bambae oli kasem moa save long ol smosmol poen sipos oli kam long ol miting blong kongregesen.

⁴ Maet i no gat nid blong ridim olgeta vas we oli stap long ol paragraf. Yu save yusum ol vas we oli raetem finis long paragraf, blong eksplenem sam bigfala poen. Long ol poen blong tingtingbak long en blong stadi, makem ol impoten vas we yufala i bin tokbaot, mo leftemap tingting blong studen blong traem holem olgeta long tingting blong hem.

⁵ ?Stadi i Mas Longfala Olsem Wanem?: Maet stadi i save gohed bitim wan haoa. Sam man we oli stadi oli gat plante taem, mo maet oli wantem se stadi i gohed smoltaem moa. Maet studen i wantem mekem stadi bitim wan taem evri wik. Sipos hem i save mekem olsem, samting ya bambae i givhan bigwan long hem.

⁶ Olsem Aesea 60:8 i soem, tede i gat plante handred taosen man we oli stap joen wetem yumi blong presem Jeova. Oli “stap flae i kam olsem klaod, mo olsem ol sotleg we oli stap go long haos blong olgeta,” blong joen wetem ol kongregesen blong ol man blong Jeova. Yumi evriwan i save mekem plante samting blong wok wetem Jeova, long taem ya we hem i mekem wok blong hivimap olgeta we oli olsem sipsip, i spid moa.​—Aes. 60:⁠22.