Gobak Long Ol Man We Oli Intres Long Kingdom Nyus
1 Long ol wik we oli pas, yumi bin haremgud long wok blong seremaot Kingdom Nyus Namba 35, “?I Save Gat Wan Taem We Olgeta Man Bambae Oli Laeklaekem Olgeta?” Ol pablisa long evri ples oli stap traehad blong faenem olgeta man we oli rere blong lesin long trutok, mo givim nyufala Kingdom Nyus ya long olgeta. (Mat. 10:11) Yumi bin makem Sande, Novemba 16, olsem dei blong finisim spesel wok ya. Be sipos i gat sam teritori we yufala i no prij long hem yet, maet ol elda oli askem long yufala blong gohed blong seremaot Kingdom Nyus Namba 35 gogo yufala i finisim olgeta pepa ya evriwan.
2 Kingdom Nyus ya i wekemap intres blong plante man finis. Oli luksave se fulap man oli no moa gat sore. From samting ya, oli stap tingbaot wanem bambae i hapen long fyuja. (2 Tim. 3:3) Yumi mas gobak blong mekem intres blong olgeta ya i gru moa.
3 Kingdom Nyus i Karem Frut: Taem yumi bin seremaot Kingdom Nyus long 1995, wan woman we i kasem pepa ya i kam long miting long Haos Kingdom, from we hem i wantem save moa long saed blong bilif blong ol Wetnes blong Jeova. Long miting ya, hem i agri we wan i kam mekem Baebol stadi wetem hem. Kam kasem naoia, kolosap evri taem hem i kam long miting. Smoltaem biaen long faswan miting ya, hem i raetem leta i go long jyos blong hem, blong talem se hem i no moa wantem stap olsem wan memba blong jyos ya.
4 Naoia, plante handred man long teritori blong yumi oli ridim finis Kingdom Nyus Namba 35. ?Wanem tingting blong olgeta long saed ya? Nating sipos plante oli laekem ol tok we oli ridim, ating oli no save mekem wan samting olgeta nomo, be bambae oli wet blong wan Wetnes blong Jeova i kam luk olgeta bakegen. ?Yu yu stap mekem plan blong gobak long olgeta? Lav we yumi gat long ol man i mas pusum yumi blong mekem olsem. Yumi mas gobak long olgeta man we oli soem intres long Kingdom Nyus.
5 ?Bambae Yu Talem Wanem?: Maet yu toktok smoltaem long saed blong mesej long Kingdom Nyus, se hem i stretgud long taem blong yumi. Nao askem wan kwestin we i pulum tingting blong man blong haos. Lesingud long ansa blong hem, olsem nao, bambae yu save wanem i stap long tingting blong hem. Nao, openem buklet ya we Kingdom Nyus i tokbaot, Samting We God i Wantem. Ale, soem wan poen we i joen wetem tingting we man ya i bin talemaot. Sipos man ya i glad, traem statem wan Baebol stadi wetem hem stret long taem ya.
6 Hemia sam rod blong storeyan we yu save yusum taem yu gobak long olgeta we oli bin soem intres long “Kingdom Nyus” Namba 35:
◼ “Maet yu rimemba we mi bin livim wan smol pepa wetem yu i no longtaem i pas. Hem i tokbaot wan bigfala samting we i stap seraotem ol man tede, hemia se oli no moa laeklaekem olgeta.” Soem ol pruf we i stap long pej 2 blong Kingdom Nyus aninit long smol stampa tok ya, “Ol Man Oli No Moa Laekem Ol Narafala Man Raonabaot Long Olgeta.” Nao askem se: “?Yu ting se God i wantem we ol man oli laef long fasin ya?” Wet long ansa. Openem buklet ya Samting We God i Wantem, i go long Stadi 5, mo traem statem wan Baebol stadi.
◼ “Lastaem, mi livim wan pepa wetem yu we i tokbaot, ‘?I Save Gat Wan Taem We Olgeta Man Bambae Oli Laeklaekem Olgeta?’ ?Yu ting se samting ya i save kamaot long wol ya?” Wet long ansa. Openem buklet ya Samting We God i Wantem, i go long Stadi 6, mo ridim haf 6. Nao ridim promes blong God long Maeka 4:3, 4. Sipos i luk olsem we man ya i intres, askem long hem blong karem buklet ya mo blong mekem wan Baebol stadi.
◼ “Lastaem mi luk yu, mi livim sam save wetem yu long saed blong ‘?I Save Gat Wan Taem We Olgeta Man Bambae Oli Laeklaekem Olgeta?’ Smol pepa ya i askem sipos yu wantem wan Baebol stadi we yu no pem. Mi mi kam luk yu bakegen tede blong soem buk ya we mifala i stap yusum blong mekem Baebol stadi wetem ol man. [Soem Save buk.] Buk ya i eksplenem klia wetaem nao olgeta man bambae oli laeklaekem olgeta, mo hem i ansarem plante narafala kwestin we ating yu bin tingbaot, olsem: ?From wanem yumi kam olfala mo yumi ded? ?From wanem God i letem ol man blong oli safa? ?Wanem i hapen long olgeta we yumi laekem olgeta tumas we oli ded finis?” Nao askem se: “?Yu wantem we mi soem long yu olsem wanem mifala i mekem Baebol stadi wetem ol man?” Sipos man blong haos i no wantem, askem long hem blong ridim buk ya, mo livim wetem hem blong stret praes. Mekem plan blong kambak bakegen.
7 Taem yumi finisim olgeta teritori blong yumi wetem Kingdom Nyus Namba 35, yumi save seremaot Save buk long lashaf blong manis. Yumi save faenem plante advaes olsem wanem blong seremaot buk ya, long laswan pej blong Kingdom Wok Blong Yumi blong Desemba 1995; Maj, Jun, mo Novemba 1996; mo Jun 1997.
8 Spesel wok ya blong seremaot Kingdom Nyus i mas pusum yumi evriwan blong traehad moa long wok blong prij. Yumi save gat strong tingting se, wetem help blong Jeova, spesel wok ya bambae i karem plante frut. Mo bambae hem i halpem ol man blong kasem save long stampa tingting blong God long saed blong wol ya, hemia se olgeta man bambae oli laeklaekem olgeta. Bambae Jeova i gohed blong blesem ol traehad blong yumi blong gobak long ol man we oli bin soem intres long Kingdom Nyus.