Tiokratik Skul Blong 1998

Blong skulgud i minim se, “yumi kasem gudfala tijing mo trening blong gat wan spesel save, no blong gat gudhan long wan samting.” Ale, Tiokratik Skul i stap tijim yumi long ol save blong God. Mo tu, taem yumi joen long skul ya, yumi kamgud moa long fasin blong toktok mo tijim man. Program blong skul ya blong 1998 bambae i givim plante jans long yumi blong gohed moa long saed blong speret.

Taem yu luklukgud long program blong skul ya blong nekis yia, bambae yu luk se sam samtaem Tok N. 3 i stanap long store blong wan man blong Baebol, we i stap long tufala buk ya Insight. Mo tu, bambae yumi yusum Hapi Famle buk long 1998. Sloslou, bambae Tok N. 3 mo N. 4 i kavremap olgeta haf blong buk ya. Taem Tok N. 4 i stanap long Hapi Famle buk, wan brata i mas mekem tok ya i go stret long kongregesen. Mo i gud blong tingbaot se, evriwan long skul ya oli no mas bitim taem blong olgeta.

Wan Nyufala Samting: Blong givhan moa long yumi wanwan, i gat wan “Program Blong Narafala Baebol Riding” i stap long ol braket, stret biaen long namba blong singsing evri wik. I no gat wan haf blong skul we i stanap long Baebol riding ya, be i gud we yu traehad blong folem. Samting ya bambae i givhan long yu blong lanem fasin blong ridim Baebol evri dei, sipos yu no stap mekem olsem finis.

Blong kasem moa save long saed blong ol tok, advaes, mo ol kwestin we yumi raetem ansa blong olgeta, plis ridim haf ya “Rod Blong Mekem Skul Ya” long “Program Blong Tiokratik Skul Blong 1998,” wetem pej 3 blong Kingdom Wok Blong Yumi blong Oktoba 1996.

Sipos yu no givim nem blong yu yet blong joen long Tiokratik Skul, mifala i pulum yu blong mekem olsem kwiktaem. Spesel skul ya i stap mekem wan impoten wok blong trenem ol man blong Jeova we oli gat tingting daon mo oli onagud long hem, blong oli kamgud moa long wok blong prij.​—1 Tim. 4:13-​16.