Yumi “Gat Evri Samting Blong Mekem Ol Gudfala Wok We i Stap”
1 Tede ol man blong Jeova oli kasem blesing from we oli gat fulap kakae long saed long speret. (Aes. 25:6) I gat plante buk blong stadi Baebol we oli mekem se yumi glad taem yumi stadi wanwan, wetem famle blong yumi, long ol miting blong kongregesen, mo ol asembli. ?Be yumi yusum fulwan ol samting ya, blong kasem mak we yumi gat ‘gudhan long olgeta samting, mo yumi gat evri samting blong mekem ol gudfala wok we i stap’?—2 Tim. 3:17.
2 !Tingbaot ol kakae long saed long speret blong yia 1998, we yumi stap long medel blong hem finis! Long ol miting blong kongregesen, yumi stap stadi long sam impoten poen long 23 buk blong Grik haf blong Baebol. Yumi stap lukluk bakegen ol save long Insight in the Scriptures, long saed long laef blong 49 man, mo tu, 138 pej blong Proclaimers buk. Yumi stap lukluk bakegen wan haf blong Save buk, tu haf i stap, mo bitim stret haf blong buk ya Man We i Hae Moa. Mo tu, yumi kasem kakae long saed long speret long ol 12 Kingdom Wok Blong Yumi, 52 haf blong stadi long Wajtaoa, mo kolosap 52 pablik tok tu we oli tokbaot ol defren samting long saed long Baebol. Antap long ol samting ya, i gat ol nambawan save we i kamaot long ol asembli. !Hemia oli sas samting long saed long speret we yumi kasem!
3 Soem Tangkyu From Olgeta Samting We Jeova i Givim: Blong yumi haremgud fulwan long ol samting we Jeova i givim long yumi, yumi mas kasem save from wanem Jeova i stap givim fulap kakae long saed long speret. Sipos yumi tekem ol gudfala kakae ya, bilif blong yumi mo fasin fren blong yumi wetem God, bambae i kam strong moa. (1 Tim. 4:6) Be ol kakae long saed long speret i no blong tijim yumi nomo. Hem i pusum yumi tu blong serem trutok wetem ol narafala, mo hem i givim evri samting we yumi nidim blong mekemgud wok ya blong talemaot gud nyus.—2 Tim. 4:5.
4 Yumi no mas fogetem ol kakae ya we yumi nidim long saed long speret. Oltaem yumi mas traehad blong kasem fasin we yumi wantem tumas strong kakae we i stap long tebel blong Jeova, mo we i mekem yumi haremgud long saed long speret. (Mat. 5:3; 1 Pita 2:2) Blong haremgud fulwan long ol samting ya, yumi nidim blong makemaot naf taem blong mekem ol impoten samting olsem stadi wanwan, famle stadi, mo go long ol miting. (Efes. 5:15, 16) Gudfala pei we bambae yumi kasem sipos yumi mekem ol samting ya, bambae i stret long ol tok blong leftemap tingting long Hibrus 13:20, 21, we God i givim long Pol blong raetem i go long ol Hibru Kristin we oli stap tru long God.