Yumi Kasem Ol Samting We Yumi Nidim Long Saed Blong Speret
1 Jisas i talem se: “Olgeta we oli luksave se oli gat nid long saed blong speret, oli save harem gud, from we Kingdom blong God i blong olgeta.” (Mat. 5:3, NW.) ?From wanem tede i impoten tumas we yumi tekem ol kakae long saed blong speret? ?Olsem wanem yumi save soemaot se yumi tinghae long fasin ya? ?Yumi mas ronwe long wanem trap? ?Sipos yumi tekem ol kakae long saed blong speret, bambae yumi save kasem wanem blesing from?
2 Yumi evriwan i save se sipos yumi kakae gud, bambae bodi blong yumi i strong. Sipos yumi no lukaot gud long ol kakae we yumi tekem long saed blong bodi, yumi no save mekem gudfala wok longtaem. Samting ya i sem mak nomo long saed blong speret.—Mat. 4:4; Jon 17:3.
Ol Miting Oli Givhan Long Yumi Long Saed Blong Speret
3 Sipos yumi wantem stap strong long saed blong speret, yumi mas tekem ol kakae we yumi nidim long saed blong speret. “Slef we i stret mo waes” i givim fulap kakae long saed blong speret long yumi long taem blong ol miting. Ol kakae ya oli save givhan bigwan long yumi. (Matyu 24:45-47) Evri miting oli givhan long yumi blong mekem wan samting. Taswe yumi no mas lego wan miting nating. ?Yu yu mekem rere evri miting? ?Yu yu lesin mo yu ansa oltaem long ol miting ya?
4 Evri wik yumi gat 5 miting. Yumi save tingbaot 3 long olgeta. Wajtaoa-stadi i givhan long yumi blong wokbaot long rod blong trutok. Tiokratik Skul i givhan long yumi blong kam sam minista we oli naf gud. Buk-stadi i pulum yumi blong mekem wan dip stadi long ol poen we Baebol i tokbaot.
5 ?Yu yu mekem rere ol miting we oli kamaot long kongregesen? Samfala oli ridim ol haf we bambae oli kamaot long taem blong miting, oli putum sam mak aninit long ol ansa blong ol kwestin, be oli no jekemap ol vas we i stap. Maet bambae oli naf blong givim sam ansa long taem blong ol miting, ?be yu ting se olgeta ya oli tekem evri jans blong harem gud long saed blong speret? ?Yu ting se yu mo famle blong yu, yufala i save mekem ol miting oli rere long wan fasin we i gud moa?
Yumi Mas Yusum Gud Taem We Yumi Gat
6 Sipos yufala i mekem plan blong mekem ol miting oli rere, yufala i no mas letem video no sam pleplei bakegen oli spolem ol gudfala mak ya we yufala i putum. Bos blong famle nao i mas givhan long ol memba blong famle blong hem blong oli folem wan program we i gat defren haf long hem. Program ya i talemaot klia taem blong mekem stadi long Baebol, taem blong mekem rere ol miting mo taem blong joen long minista wok. Yumi mas tinghae long advaes ya blong Pol se ‘yumi mas yusum evri jans we yumi kasem blong wokem i gud’ mo yumi mas traehad blong kam sam bigman long saed blong speret.—Efes. 5:15-17.
7 Sipos yumi lukaot gud long ol nid we yumi gat long saed blong speret, bambae yumi neva talem se yumi save inaf samting finis. Yes, yumi mo famle blong yumi, yumi rili gat sam nid long saed blong speret tede. Sipos yumi wantem harem gud blong olwe, yumi mas wokhad blong tekem ol kakae long saed blong speret we yumi nidim.