Talemaot Gud Nyus—Long Famle Blong Yumi
1 Sipos long wan Kristin famle, papa mama mo ol pikinini oli traehad blong mekem wok blong Jeova long fulhat blong olgeta, famle ya i rili presem nem blong Jeova. Yumi glad tumas blong luk se raonabaot long wol, fulap famle oli mekem olsem long ol kongregesen blong ol man blong Jeova.
2 Baebol i soemaot klia se insaed long wan famle, papa nao i mas lukaot long ol famle blong hem long saed blong speret. (1 Kor. 11:3) Sipos waef mo ol pikinini blong hem oli sapotem hem, bambae famle blong olgeta i save givhan long fulap narawan bakegen. (Mat. 5:16) ?Olsem wanem ol memba blong famle oli save joen gud tugeta?
Ol Papa Mama Oli Mas Soemaot Rod
3 Plante taem, taem famle i gohed gud olsem, papa hem i elda no hem i man blong givhan. Hemia i min se hem i mas spenem taem wetem famle blong hem mo lukaot gud long famle blong hem, be moa yet, hem i gat wok long kongregesen. Wan papa we i gat wok olsem i mas yusum gud taem we hem i gat blong mekem se hem i no lego famle blong hem wan saed. Samting ya i no isi from we taem i gat wan samting long kongregesen, maet ol brata oli go wantaem nomo long papa ya blong askem sipos hem i save mekem samting ya, no maet papa ya i no gat tumas taem we i fri. Wan papa olsem i no mas foget se hem i mas lukaot gud long famle blong hem fastaem. Hem i mas spenem wan haf blong taem blong hem wetem famle blong hem blong stadi, blong prij, blong go long ol miting mo blong mekem sam pleiplei tugeta wetem famle blong hem. I tru se samtaem sam samting oli mekem se famle i no gat rod blong prij wanples, be i impoten we papa i tekem taem blong prij wetem ol memba blong famle blong hem evri manis.
4 Sipos wan famle i gat plan blong gohed gud long saed blong speret, waef blong brata ya i mas givhan long hem. Hem i save mekem olsem taem hem i givhan long ol pikinini blong oli kam gud moa long minista wok. Sipos wan mama olsem i fas gud long God mo hem i wok had long minista wok, bambae ol pikinini blong hem oli mekem sem mak long hem mo bambae oli laekem minista wok.—2 Tim. 3:14, 15.
5 Plante ekspiryens oli soemaot se wan papa no mama i mekem gud wok blong tijim ol pikinini blong hem long saed blong speret mo biaen ol pikinini blong ol oli kam sam gudfala minista blong God. Yes, plante yangfala i tekem disisin blong stanap long saed blong trutok mo sam long olgeta tu oli joen long fultaem minista wok from wan samting nomo, hemia from we papa mo mama blong olgeta oli rili soemaot nambawan eksampel long ol.
Wok Blong Ol Pikinini
6 ?Ol pikinini oli mas mekem wanem wok insaed long famle? Nating se Jisas i stret pikinini blong God, be taem we hem i yangfala, hem i obei oltaem mo hem i stap aninit long loa blong papa mo mama blong hem. (Luk 2:51) Taswe, taem we papa mo mama oli mekem plan blong ful famle i joen tugeta long minista wok, ol pikinini oli mas soemaot se oli fas gud long God mo oli joen tugeta wetem ol papa mama blong ol.—Efes. 6:1-3.
7 Sipos ol memba blong wan famle oli gat plan blong joen gud tugeta olsem wan famle, ful famle i mas wosip long Jeova. Samting ya i min se famle i mas stadi long Baebol. Evriwan long famle oli mas prij mo oli mas go long ol miting tugeta. Papa mama mo ol pikinini, evriwan oli gat wok blong olgeta insaed long wan famle.