Givim Wetnes Tru Long Gudfala Fasin Blong Yumi
1 Long wol tede, ol man oli mekem enikaen samting we oli wantem, mo plante yangfala oli no fraet blong spolem laef blong olgeta wetem ol drag, fasin nogud long saed blong seks, fasin rebel mo raf fasin. Samting we i defren olgeta se, yumi haremgud taem yumi luk ol nambawan fasin blong ol yangfala long Kristin kongregesen, mo i sua se hemia wan samting we i naes tumas long ae blong Jeova. Hemia wan gudfala wetnes, we i save pulum ol narafala blong kam long trutok.—1 Pita 2:12.
2 Plante store oli soem se ol gudfala fasin blong ol yangfala Kristin oli gat bigfala paoa long ol man we oli luk olgeta. Wan tija long skul i tokbaot wan yangfala Wetnes studen long fored blong ful klas. Hem i talem se God blong yangfala gel ya, Jeova, hem i trufala God. Hem i talem samting ya from we oltaem, gel ya i soem respek. Wan narafala tija i raetem leta i go long Sosaeti, i talem se: “Mi wantem presem yufala from ol nambawan yangfala we yufala i gat long jyos blong yufala. . . . Ol yangfala ya oli rili soem ol gudfala fasin. Oli respektem ol olfala, oli kaengud, mo oli no bitim mak long ol klos blong olgeta. !Mo oli rili savegud Baebol blong olgeta! !Hemia nao samting we jyos i mas mekem!”
3 Ol nambawan fasin blong wan Wetnes we i gat seven yia nomo, oli gat paoa long tija blong hem. Tija ya i laekem kwaet mo gud fasin blong boe ya, we i mekem se hem i defren olgeta long ol narafala boe. Tija i sapraes blong luk strong tingting blong yangfala ya long ol bilif blong skul blong hem, mo we hem i no sem blong stap defren long ol narafala from bilif blong hem. Mo tu, hem i luk se boe ya i trenemgud tingting blong hem blong i lidim hem long gudfala rod, mo i save “jusumaot wanem fasin i gud mo wanem fasin i nogud.” (Hib. 5:14) Biaen, mama blong boe ya i visitim tija, mo i statem wan Baebol stadi wetem hem. Samtaem biaen, tija ya i tekem baptaes mo i kam wan fultaem paenia.
4 Ol gudfala fasin blong wan Wetnes gel long skul i gat paoa long wan yangfala man. Gel ya i rili defren, hem i kaengud, hem i stadigud, mo hem i neva putum klos we oli bitim mak. Mo tu, hem i defren long ol narafala gel, hem i no pleplei wetem filing blong ol boe. Yangfala man ya i luksave se gel ya i folem ol rul blong Baebol long laef blong hem. Hem i askem sam kwestin long gel ya long saed blong ol bilif blong skul blong hem, mo hem i intres gud long ol samting we hem i faenemaot. Hem i stat blong stadi, mo i no longtaem biaen, hem i tekem baptaes. Biaen bakegen, hem i joen long wok blong paenia, mo i wok long Betel.
5 Sipos yu yu wan yangfala Kristin we i wantem givim wan nambawan wetnes long ol narafala, lukaot long olgeta fasin blong yu. Sipos yu stat blong agri long ol fasin olbaot, ol tingting mo fasin blong laef blong ol man blong wol, bambae yu no moa luksave ol denja. Yu mas soem wan nambawan eksampel long toktok, klos, mo fasin blong mekem hea blong yu, i no taem yu joen long wok blong prij mo long ol miting blong kongregesen nomo, be tu, taem yu stap long skul mo taem yu pleplei wetem ol narafala yangfala. (1 Tim. 4:12) Bambae yu save haremgud tumas, taem wan man i rili intres long trutok from we yu bin ‘letem laet blong yu i saenaot’ tru long gudfala fasin blong yu.—Mat. 5:16.