Ol Yangfala We Oli Saenaot Olsem Ol Laet
1. ?Olsem wanem Baebol i soem se ol man bambae oli makem ol Kristin se oli defren, mo olsem wanem ol tok ya oli stret long ol yangfala Kristin tede?
1 Jisas i talem long ol disaepol blong hem se: “Yufala i olsem laet long ol man long wol.” (Mat. 5:14, 16) Olsem wan taon we i stap antap long hil mo we san i saenem, ol man bambae oli makem ol disaepol ya se oli defren. Tede, plante yangfala Kristin oli ‘saenaot long medel blong ol man olsem ol sta long skae,’ taem oli mekem fasin blong olgeta i stretgud mo taem oli wok strong long wok blong prij.—Fil. 2:15; Mal. 3:18.
2. ?Wanem sam rod we yu yu save yusum blong prij long ol tija mo ol fren blong yu long skul?
2 Long Skul: ?Sipos long skul blong yu oli letem blong ol yangfala oli save prij, yu yu save mekem wanem? Sam yangfala oli yusum janis ya taem klas blong olgeta i tokbaot ol samting olsem drag, evolusen, mo rabis wok blong ol Nasi blong traem kilimaot sam laen blong man long taem blong Wol Wo Tu—mo sam narafala poen bakegen. Wan tija i talem long klas blong hem se oli mas raetem wan ripot long saed blong rabis wok blong ol teroris, nao wan sista i yusum janis ya blong prij long saed blong Kingdom blong God, se hemia nomo trufala hop blong olgeta man long wol. Tija i sapraes long gudfala ripot ya, mo hemia i openem rod blong sista ya i save prij moa long hem.
3. ?Olsem wanem yu save letem laet blong yu i saenaot long skul taem yu gat ol gudfala fasin?
3 Wan narafala rod blong saenaot olsem ol laet, hemia tru long fasin blong yu mo klos mo hea blong yu. (1 Kor. 4:9; 1 Tim. 2:9) Taem ol studen mo ol tija oli luk se fasin blong yu i defren, samting ya i save pulum sam long olgeta blong oli laekem trutok, mo hemia i save givim janis long yu blong tokbaot trutok blong Baebol long olgeta. (1 Pita 2:12; 3:1, 2) I no isi blong soemaot ol gudfala fasin we God i laekem, be sipos yu traehad blong folem ol fasin ya, Jeova bambae i blesem yu bigwan. (1 Pita 3:16, 17; 4:14) Blong wekemap intres blong ol studen long saed blong gud nius, maet yu save ridim ol buk we oli tokbaot Baebol long taem blong spel, no yu save putum ol buk ya long wan ples we ol narafala oli save luk.
4. ?Wanem sam gudfala samting we i save kamaot taem yu prij long skul?
4 Taem yu letem laet blong yu i saenaot long skul, hemia i mekem bilif blong yu i kam strong moa mo i givhan long yu blong yu praod blong mekem wok blong Jeova. (Jer. 9:24) Mo tu, hemia i lukaotgud long yu. Wan sista i talem se: “Wan gudfala samting we i kamaot taem mi tokbaot bilif blong mi, hemia se ol studen oli no traem fosem mi blong mekem ol samting we oli no laenap wetem Baebol.”
5. (a) ?Olsem wanem sam yangfala oli mekem moa long wok blong prij? (b) ?Wanem mak blong yu long saed blong spirit?
5 Mekem Moa Wok: Wan narafala rod we plante yangfala oli yusum blong mekem laet blong olgeta i saen, hemia taem oli mekem moa long wok blong prij. Wan brata i finis long hae skul, nao hem i go long wan ples we i nidim moa man blong talemaot Kingdom. Hem i joen long wan smol kongregesen we i gat wan elda nomo. Brata ya i raetem leta long wan fren blong hem, mo i talem se: “Mi mi gat wan gudfala taem long ples ya. !Wok blong prij i gud tumas! Mifala i stap storian klosap 20 minit long evri haos, from we ol man oli wantem harem evri samting we mifala i save talem.” Hem i gohed i se: “Mi mi wantem tumas se evri yangfala oli mekem olsem, mo oli kasem sem glad ya we mi mi kasem. I no gat wan samting we i gud moa i bitim we yumi yusum olgeta samting we yumi gat blong mekem wok blong Jeova.”
6. ?Wanem samting i mekem se yu yu praod long ol yangfala long kongregesen blong yu?
6 !Mifala i praod tumas long yufala ol yangfala we yufala i saenaot olsem ol laet long wol ya! (1 Tes. 2:20) Taem yu yu mekem wok blong Jeova wetem olgeta hat, laef, tingting mo paoa blong yu, yu ‘kasem wan handred taem antap bakegen, mo long niufala wol ya we bambae i kam, bambae yu gat laef we i no save finis.’—Mak 10:29, 30; 12:30.